ចាន់ សំអាត អ្នកប្រដាល់ជើងខ្លាំងកម្ពុជា នៃក្លិបអប់រំកាយកីឡាស្រុកអន្លង់វែង នឹងត្រូវជួបប្រកួតជាមួយអ្នកប្រដាល់ថៃឈ្មោះ Phat Senchhai នៅក្នុងកម្មវិធីប្រដាល់Wurkz លើសង្វៀនSEA-TV រសៀលថ្ងៃអាទិត្យទី០៩ធ្នូ២០១៨នេះ។
អ្នកប្រដាល់ថៃ Phat Senchhai ដែលមកជួបចាន់ សំអាត នេះ គេជាអ្នកប្រដាល់ថៃចំណូលថ្មី មិនធ្លាប់មកប្រកួតនៅកម្ពុជានោះទេកន្លងមក ។ ពួកគេប្រកួតគ្នាក្នុងប្រភេទទម្ងន់៦០ គីឡូក្រាម ។
តាមលោកញាណ សុធី អ្នកចាត់ចែងក្នុងកម្មវិធីប្រដាល់SEA-TV អោយដឹងថា Phat Senchhai នេះ នៅស្រុកថៃគេជាជើងខ្លាំងមួយដែរនៅក្នុងប្រភេទទម្ងន់៦០គ.ក្រនេះ ។ អ្នកប្រដាល់ថៃនេះ មានកំនត់ត្រាប្រកួតចំនួន៦៤លើក ឈ្នះ៥៣លើក និង ចាញ់១១លើក មិនដែលស្មើ ។
ទោះជាយ៉ាងណា អ្នកប្រដាល់ថៃរូបនេះ មិនប្រាកដថាអាចឈ្នះ ចាន់ សំអាត នោះឡើយ ។ចាន់ សំអាត ជើងខ្លាំងរបស់កម្ពុជានេះ ធ្លាប់បំបាក់ថៃអស់ប្រមាណជាង១០នាក់មកហើយ ពិសេសនោះគេធ្លាប់ឈ្នះជើងចាស់ថៃថែមទៀត ។ សំអាត គេមានកណ្តាប់ដៃល្អ វាយចេញចូលរហ័ស ហើយស្នៀតទាត់ និងជង្គង់ កែង ក៏ល្អថែមទៀត ។
ទោះជាបែបនេះក្តី មិនទាន់ហ៊ានសន្និដ្ឋានថា ចាន់ សំអាត ជួបសំណាងល្អនៅក្នុងការប្រកួតជាអ្នកប្រដាល់ថៃ Phat Senchhai នេះឡើយ ?។ សំអាតគេប្រកួតជាមួយថៃលើកចុងក្រោយនៅសង្វៀន SEATVនេះ វាយឈ្នះChhmuok Phat ក្នុងទឹកទី៤ ។
ចាន់ សំអាត មានប្រវត្តិប្រកួតចំនួន៧២លើក ឈ្នះ៥៥លើក ចាញ់១៥លើក ស្មើ០២លើក ។ ចាំមើល តើចាន់ សំអាត អាចយកឈ្នះអ្នកប្រដាល់ថៃPhat Senchhai បានឬអត់ នៅក្នុងការជួបប្រកួតគ្នាលើកដំបូងនេះ ? ។
សារឿន ច័ន្ទ អ្នកប្រដាល់ក្លិបសម្រែករាជសីហ៍ ត្រូវជួបជាមួយអ្នកប្រដាល់ថៃឈ្មោះYorth Savich ដោយប្រកួតក្នុងទម្ងន់៦០គីឡូក្រាមដែរ ។ អ្នកប្រដាល់ថៃរូបនេះ ក៏មិនធ្លាប់ មកប្រកួតនៅស្រុកខ្មែរនោះទេកន្លងមក។
Yorth Savich អ្នកប្រដាល់ថៃរូបនេះ មានកម្ពស់ប្រហាក់ប្រហែលសារឿន ច័ន្ទដែរតែ ប្រវត្តិប្រកួតរបស់គេ គឺតិចជាងសារឿន ច័ន្ទ ។ Yorth Savich ប្រកួតបានចំនួន៥៨លើក ដោយឈ្នះ៤៩លើក ចាញ់០៩លើក មិនដែលស្មើ ខណះដែលសារឿន ច័ន្ទ អ្នកប្រដាល់កម្ពុជាយើងប្រកួតបានចំនួន៩៩លើក ឈ្នះ៧៩លើក ចាញ់១៨លើក និងស្មើ០២លើក ។
សារឿន ច័ន្ទ ធ្លាប់ប្រកួតជាមួយថៃច្រើនលើកហើយ ដោយវាយឈ្នះច្រើនជាងចាញ់ ។តែមួយរយៈចុងក្រោយនេះ សារឿន ច័ន្ទ មានការស្រុតធ្លាក់ចុះ ហើយវាយចាញ់ថៃជាបន្តបន្ទាប់ ។ ការប្រកួតជាមួយថៃលើកចុងក្រោយនេះ សារឿន ច័ន្ទវាយឈ្នះ Moeurn Pha ក្នុងទឹកទី៤ កាលពីថ្ងៃទី២៤វិច្ឆិកា២០១៨ ។
ជាអ្នកប្រដាល់ដែលមានកណ្តាប់ដៃលឿន រហ័ស និងខ្លាំងនោះ សារឿន ច័ន្ទ វាយសម្រុកមិនបណ្តាក់ដៃនោះទេ ប៉ុន្តែគេឆាប់អស់ស៊ុហ្វ នៅចុងទឹក ។ចាំមើល តើសារឿន ច័ន្ទ អាចយកឈ្នះ Yorth Savich បានឬអត់ ? ។
ចំពោះការប្រកួតរវាងអ្នកប្រដាល់រួមជាតិវិញ វៀត ប៊ុនឌឿន អ្នកប្រដាល់សមាគមកីឡាប្រដាល់ក្រសួងការពារជាតិ ត្រូវគេផ្គូអោយជួបប្រកួតជាមួយអ្នកប្រដាល់ពុទ្ធ សំបូរ ក្លិបពុទ្ធសេរីវង្សកីឡា ដោយប្រកួតក្នុងប្រភេទទម្ងន់៦០គីឡូក្រាម ។ យ៉ាងណា ពីរនាក់នេះមិនអាចទស្សន៍ទាយមុនថា អ្នគណាឈ្នះអ្នកណាចាញ់នោះឡើយ ។
គ្រី សុខលីន អ្នកប្រដាល់ក្លិបយុវវាលស្បូវខណ្ឌច្បារអំពៅ នឹងជួបប្រកួតជាមួយធីម ទាន់ អ្នកប្រដាល់ក្លិបបូរីរាជសីហ៍ខេត្តរតនគិរី ក្នុងប្រភេទទម្ងន់៦៣,៥០០គីឡូក្រាម ។អ្នកប្រដាល់ទាំងពីរនាក់នេះ ពួកគេមានស្នៀតគុនល្អប្រហាក់ប្រហែលគ្នា ។ចាំមើល តើនរណាឈ្នះនៅក្នុងការជួបគ្នាលើកដំបូងនេះ ? ៕
Source: Kampuchea Thmey Daily
0 Comments