លោក Donald Trump បានប្រាប់អ្នកដឹកនាំគណបក្សប្រជាធិបតេយ្យនៅសេតវិមានកាលពីថ្ងៃអង្គារថា លោកនឹងបិទរដ្ឋាភិបាលអាមេរិកពីព្រោះពួកគេបដិសេធអនុម័តកញ្ចប់ថវិការាប់ពាន់លានដុល្លារសម្រាប់ជញ្ជាំងព្រំដែនម៉ិកស៊ិកដ៏ចម្រូងចម្រាសរបស់លោក។
លោកប្រធានាធិបតីនិងមេដឹកនាំគណបក្សប្រឆាំងកំពូលៗត្រូវបានគេរំពឹងថានឹងរៀបចំពិធីថតរូបនៅការិយាល័យអូវ៉ាល់។ ផ្ទុយទៅវិញ ជម្លោះរបស់ពួកគេនៅមុខប្រព័ន្ធផ្សព្វផ្សាយរបស់ពិភពលោកបានបង្ហាញអោយឃើញពីអនាគតដ៏ចម្រូងចម្រាស ដែលលោក Trump ត្រូវប្រឈមមុខខណៈរឿងអាស្រូវផ្លូវច្បាប់បានកើនឡើងហើយគណបក្សសាធារណរដ្ឋរបស់លោកបានបាត់បង់ការគ្រប់គ្រងសភាទាំងស្រុង។
លោក Chuck Schumer ដែលជាអ្នកប្រជាធិបតេយ្យជាន់ខ្ពស់ក្នុងព្រឹទ្ធសភាដែលនៅតែគ្រប់គ្រងដោយគណបក្សសាធារណរដ្ឋនិងលោកស្រី Nancy Pelosi ដែលទំនងជានឹងក្លាយជាប្រធានសភាតំណាងរាស្ត្រទើបគ្រប់គ្រងដោយគណបក្សប្រជាធិបតេយ្យបានប្រាប់លោក Trump ថាលោកគ្មានឱកាសទទួលបានប្រាក់៥ពាន់លានដុល្លារដែលលោកចង់បានសម្រាប់ជញ្ជាំងនោះទេ។
លោក Trump បានបង្កើនការគំរាមកំហែងក្នុងការសងសឹកដោយបដិសេធចុះហត្ថលេខាលើវិក័យប័ត្រចំណាយរបស់សហព័ន្ធដែលតម្រូវអោយធ្វើនៅត្រឹមថ្ងៃទី២១ខែធ្នូនេះដើម្បីចៀសវាងការបន្សល់ទុករដ្ឋាភិបាលដោយគ្មានមូលនិធិ។
លោកបាននិយាយថា “មែនហើយ ប្រសិនបើយើងមិនទទួលបានអ្វីដែលយើងចង់បានតាមមធ្យោបាយមួយឬផ្សេងទៀតនោះ ខ្ញុំនឹងបិទរដ្ឋាភិបាល។ ខ្ញុំមានមោទនភាពក្នុងការបិទរដ្ឋាភិបាលនេះដើម្បីសន្តិសុខតាមព្រំដែន”។
ទោះបីជាយ៉ាងណាក៏ដោយ លោក Schumer បានជំទាស់ខណៈពេលដែលលោកស្រី Pelosi បានលើកឡើងថា ការជជែកវែកញែកមិនគួរធ្វើឡើងនៅចំពោះមុខអ្នកសារព័ត៌មានឡើយ។
ប៉ុន្តែលោក Trump ដែលគំនិតជញ្ជាំងអាមេរិក-ម៉ិកស៊ិករបស់លោកគឺជាចំណុចសំខាន់នៃជ័យជំនះក្នុងការបោះឆ្នោតឆ្នាំ២០១៦នោះគឺមិនអាចគ្រប់គ្រងកំហឹងរបស់លោកបានទេ។
លោកបាននិយាយថា ជញ្ជាំងនេះនឹងបង្ហាញពីការបញ្ចប់ការធ្វើអន្តោប្រវេសន៍ខុសច្បាប់នៅតាមផ្នែកខ្លះនៃព្រំដែន៕ AFP
Source: Kampuchea Thmey Daily
0 Comments