នាយ ពែកមី ក្តៅស្លឹកត្រចៀក ទម្លាយការរិះគន់កប់ៗមាត់ លើទង្វើដ៏គឃ្លើន និងកាន់តែព្រហើនរបស់ក្រុមហ៊ុន Amazon !

ភ្នំពេញ ៖ តារាកំប្លែង នាយ ពែកមី ដោយសារអត់ទ្រាំពុំបាននឹងទង្វើដ៏គឃ្លើន និងចេតនាយ៉ាងព្រហើនរបស់ក្រុមហ៊ុនOnline ដ៏ល្បីរបស់អាមេរិក ឈ្មោះ អាម៉ាហ្សូន ដែលបានប្រមាថដល់ព្រះបាទជ័យវរ្ម័នទី៧ តាមរយៈការយករូបភាព មកធ្វើជាគម្របបង្គន់ និងកម្រាលជើង ដាក់លក់លើទីផ្សារនោះ ភ្លាមៗនេះដែរ នាយ ពែកមី ក៏បានបញ្ចេញប្រតិកម្មរិះគន់មិនសំចៃមាត់លើករណីបែបនេះ។

ការចេញមុខរិះគន់ និងបង្ហាញអារម្មណ៍មិនពេញចិត្តរបស់តារាកំប្លែងល្បីឈ្មោះ នាយពែកមី នាពេលនេះ បានធ្វើឡើងស្របពេលដែលមានការបែកធ្លាយ និងទម្លាយនូវរូបភាព នៃការប្រកាសតាំងផ្សព្វផ្សាយដាក់លក់នូវផលិតផលកម្រាលជើង និងបង្គន់ ដែលស្ថិតនៅលើគម្របមានរូបភាពរបស់ព្រះបាទជ័យវរ្ម័នទី៧ បង្កឲ្យមានការភ្ញាក់ផ្អើល និងរិះគន់ខ្លាំងពីសំណាក់មហាជនខ្មែរ លើទង្វើដ៏ព្រហើនរបស់ក្រុមហ៊ុនអាមេរិកដ៏ល្បីមួយនេះ។

ផ្អែមតាមរយៈសាររិះគន់របស់តារាកំប្លែង នាយ ពែកមី បានលើកឡើងថា មិននឹកស្មានថា ក្រុមហ៊ុន អាម៉ាហ្សូន នឹកឃើញគំនិតដែលនាំឲ្យខ្មែរយើងទទួលរងការប្រមាថអញ្ចឹងសោះ…។ ស៊ែរមួយបងប្អូន ដើម្បីឲ្យក្រុមហ៊ុននេះ លុបចេញនូវទំនិញប្រភេទនេះ។

ទន្ទឹមគ្នានឹងការរិះគន់ ដោយការមិនពេញចិត្តរបស់តារាកំប្លែង នាយ ពែកមី ខាងលើនេះដែរ គេក៏កត់សម្គាល់ឃើញមានប្រជាពលរដ្ឋខ្មែរមួយចំនួនធំ ក៏ហាក់មិនសប្បាយចិត្តលើទង្វើរបស់ក្រុមហ៊ុន Online ដ៏ល្បីរបស់អាមេរិក ឈ្មោះ អាម៉ាហ្សូន ដែលបានយករូបភាពព្រះបាទជ័យវរ្ម័នទី៧ មកធ្វើជាគម្របបង្គន់ និងកម្រាលជើងដាក់លក់លើទីផ្សារផងដែរ។

សូមបញ្ជាក់ថា កាលពីថ្មីៗកន្លងមកនេះ ធ្លាប់មានប្រជាពលរដ្ឋខ្មែរជាច្រើន បានផ្ទុះប្រតិកម្មម្តងរួចមកហើយ ចំពោះក្រុមហ៊ុន អាម៉ាហ្សូន ដ៏ល្បីឈ្មោះរបស់សហរដ្ឋអាមេរិក ដែលបានយករូបភាពប្រាង្គប្រាសាទអង្គរវត្តមកធ្វើជាគម្របបង្គន់ និងកម្រាលជើងដាក់លក់តាមទីផ្សារអនឡាញ ដែលទង្វើនេះ ត្រូវបានគេចាត់ទុកថា ជាការប្រមាថ និងជាចេតនាបន្ថោកតម្លៃកម្ពុជា។ ប៉ុន្តែខណៈពេលដែលរឿងរ៉ាវនេះមិនទាន់ត្រូវបានដោះស្រាយផង ក៏ស្រាប់តែផ្ទុះការប្រតិកម្មសាជាថ្មីលើក្រុមហ៊ុនមួយនេះ បន្ទាប់ពីបង្ហោះនៅលើទីផ្សាររបស់ខ្លួន តាមរយៈការយករូបព្រះបាទជ័យវរ្ម័នទី៧ ធ្វើជាគម្របបង្គន់ និងជាកម្រាលជើងដាក់លក់លើទីផ្សារ រហូតធ្វើឲ្យមានប្រតិកម្មពីប្រជាពលរដ្ឋខ្មែរគ្រប់មជ្ឈដ្ឋាន។

គិតរហូតមកទល់ពេលនេះ គេនៅមិនទាន់ឃើញមានស្ថាប័ន ឬ ក្រសួងពាក់ព័ន្ធណាមួយចេញប្រតិកម្មជុំវិញករណីខាងលើនេះនៅឡើយទេ ខណៈដែលប្រជាពលរដ្ឋខ្មែរមួយចំនួនធំកំពុងផ្ទុះការរិះគន់ និងស្នើឲ្យមានចំណាត់ការលើករណីរបស់ក្រុមហ៊ុនOnlineដ៏ល្បីរបស់អាមេរិក អាម៉ាហ្សូន ផងនោះ៕