ថៃ​បង្ហាញ​គោលនយោបាយ​ជនភៀសខ្លួន​ ដែលមាន​លក្ខណៈ​អត់ធ្មត់​ជាង​មុន​បន្ទាប់ពី​ករណី​របស់​ជនជាតិ​អារ៉ាប៊ីសាអ៊ូឌីត

កាលពី​ថ្ងៃ​ពុធ ប្រធាន​ផ្នែក​អន្តោប្រវេសន៍​របស់​ប្រទេស​ថៃ​ បាន​ប្តេជ្ញា​ថា​ នឹងមិន​បង្ខំ​ឲ្យ​ជនភៀសខ្លួន​វិល​ត្រលប់​ទៅផ្ទះ​វិញ​ដោយ “​មិន​ស្ម័គ្រចិត្ត​” នោះ​ទេ​ បន្ទាប់ពី​ការ​អំពាវនាវ​របស់​ស្ត្រី​អារ៉ាប៊ីសាអ៊ូឌីត​សុំ​ការតាំង​ទីលំនៅ​ថ្មី​បាន​ទាក់ទាញ​ឲ្យ​មានការ​យកចិត្តទុកដាក់​ជា​សកល​ចំពោះ​ប្រទេសមួយ​ដែល​មិន​ទទួលស្គាល់​អ្នកស្វែងរក​សិទិ្ធ​ជ្រកកោន​។​

ប្រទេស​នេះ​មិនមែនជា​ហត្ថលេខី​នៃ​អនុសញ្ញា​អង្គការសហប្រជាជាតិ​ស្តីពី​ជនភៀសខ្លួន​ទេ​ហើយ​ត្រូវ​រង​ការរិះគន់​ជា​យូរណាស់​មកហើយ​ដោយសា​រ​ការឃុំខ្លួន​ពួកគេ​នៅក្នុង​មណ្ឌល​ឃុំឃាំង​ឬ​បញ្ជូន​ពួកគេ​ទៅ​របប​ឃោរឃៅ​វិញ​ដែលជា​កន្លែង​ពួកគេ​ត្រូវ​ប្រឈមមុខ​នឹង​ការជាប់​ពន្ធនាគារ​ឬ​រឿងរ៉ាវ​កាន់តែ​អាក្រក់​។​

ករណី​ជាច្រើន​ មិន​បង្ក​ការភ្ញាក់ផ្អើល​ទេ​ ប៉ុន្តែ​រឿងរ៉ាវ​បាន​ផ្លាស់ប្តូរ​កាលពី​ដើមខែ​នេះ​នៅពេល​ជនជាតិ​អារ៉ាប៊ីសាអ៊ូឌីត​ឈ្មោះ Rahaf Mohammed al-Qunun អាយុ​១៨​ឆ្នាំ​បានមក​ដល់ទី​ក្រុង​បាងកក​និង​ចៀសវាង​ការ​និរទេស​ដោយ​បង្ខាំង​ខ្លួនឯង​ក្នុង​សណ្ឋាគារ​មួយ​នៅ​ព្រលានយន្តហោះ​។

នាង​ត្រូវបាន​គេ​ប្រគល់​ទៅ​ឲ្យ​ភ្នាក់ងារ​ជនភៀសខ្លួន​របស់​អង្គការសហប្រជាជាតិ​ក្នុង​រយៈពេល​ប៉ុន្មាន​ថ្ងៃ​ហើយ​បាន​តាំង​ទីលំនៅ​នៅក្នុង​ប្រទេស​កាណាដា​ក្នុង​រយៈពេល​១​សប្តាហ៍​ដែល​នៅ​ទីនោះ​នាង​ត្រូវបាន​ស្វាគមន៍​ដោយ​រដ្ឋមន្ត្រីការបរទេស​លោកស្រី Chrystia Freeland បន្ទាប់ពី​ចុះចត​នៅ​ទីក្រុង​តូ​រ៉ុ​ន​តូ​កាលពី​ថ្ងៃ​សៅរ៍​។​
​
ដំណើរការ​នៃ​ករណី​របស់​នាង​គឺ​មិន​ធ្លាប់មាន​ពីមុនមក​ឡើយ​សម្រាប់​ប្រទេស​ថៃ​ហើយ​ត្រូវបាន​ត្រួតពិនិត្យ​ចាប់តាំងពី​ដំបូង​រហូត​ដល់ទី​បញ្ចប់​ដោយ​ប្រធាន​អន្តោប្រវេសន៍​លោក Surachate Hakparn ដែល​ទើបត្រូវ​បានតែងតាំង​ឲ្យ​កាន់​មុខតំណែង​នេះ​និង​ប្តេជ្ញា​ធ្វើកំណែទម្រង់​។​
​
ឆ្លើយតប​នឹង​សំណួរ​អំពី​បញ្ហា​ជនភៀសខ្លួន​របស់​ថៃ លោក Surachate បាន​ប្រាប់​នៅ​ក្លឹប​អ្នកឆ្លើយឆ្លង​ព័ត៌មាន​បរទេស​ថា គាត់​នឹង​ចាត់វិធានការ​ថ្មី​ហើយ​ថា ក្រោម​ការគ្រប់គ្រង​រប​ស់​គាត់ នឹង​គ្មាន​នរណាម្នាក់​ត្រូវបញ្ជូន​ត្រលប់​ទៅ​ប្រទេស​របស់​ពួកគេ​វិញ​ទេ​ប្រសិនបើ​ពួកគេ​មិន​ចង់​វិលត្រឡប់​ទៅវិញ​។​
​
លោក​បាន​បន្ថែមថា ក្នុងឋានៈ​ជា​ប្រធាន​នាយកដ្ឋាន​នេះ “​យើង​នឹង​ធ្វើតាម​បទដ្ឋាន​អន្តរជាតិ​”៕ AFP

​

Source: Kampuchea Thmey Daily