ការវាយប្រហារអត្តឃាតមួយបានសម្លាប់បុគ្គលិកអាមេរិកចំនួន៤នាក់នៅភាគខាងជើងប្រទេសស៊ីរីកាលពីថ្ងៃពុធ។ នេះជាការបាត់បង់យុទ្ធជនដ៏អាក្រក់បំផុតរបស់ទីក្រុងវ៉ាស៊ីនតោននៅក្នុងប្រទេសដែលហែកហួរដោយសង្គ្រាមមួយនេះចាប់តាំងពីឆ្នាំ២០១៤មកស្របពេលដែលខ្លួនកំពុងត្រៀមខ្លួនដកទ័ព។
ការបំផ្ទុះគ្រាប់បែកដែលអះអាងដោយក្រុមរដ្ឋឥស្លាមបានកើតឡើងបន្ទាប់ពីការប្រកាសដ៏ភ្ញាក់ផ្អើលរបស់លោកប្រធានាធិបតីអាមេរិក Donald Trump កាលពីខែមុនថា លោកបានបញ្ជាឲ្យដកកងទ័ពទាំងមូលចេញពីប្រទេសស៊ីរីដោយសារតែពួកជីហាដនិយមបានទទួលបរាជ័យយ៉ាងធ្ងន់ធ្ងររួចទៅហើយ។
មន្ទីរបញ្ចកោណបាននិយាយថា “សមាជិកយោធាសហរដ្ឋអាមេរិកពីរនាក់ ជនស៊ីវិលនៃក្រសួងការពារជាតិ (DoD) ម្នាក់និងអ្នកជួយឧបត្ថម្ភអ្នកជំនាញការម្នាក់ត្រូវបានសម្លាប់ហើយយោធាបីនាក់បានរងរបួសនៅទីក្រុង Manbij”។
មន្ទីរបញ្ចកោណបានឲ្យដឹងទៀតថា “របាយការណ៍ដំបូងៗបានបង្ហាញថា ការផ្ទុះនេះបានបង្កឲ្យមានជនរងគ្រោះហើយឧបទ្ទវហេតុនេះកំពុងស្ថិតនៅក្រោមការស៊ើបអង្កេត”។ មន្ទីរបញ្ចកោណបន្ថែមថា ឈ្មោះអ្នកស្លាប់មិនត្រូវបានបញ្ចេញទេរហូតដល់២៤ម៉ោងបន្ទាប់ពីក្រុមគ្រួសាររបស់ពួកគេត្រូវបានគេជូនដំណឹង។
ក្រុមឃ្លាំមើលសិទិ្ធមនុស្សស៊ីរីកាលពីពេលមុនបាននិយាយថា ទាហានអាមេរិកពីរនាក់ ជនស៊ីវិលស៊ីរី៩នាក់និងអ្នកប្រយុទ្ធដែលគាំទ្រដោយអាមេរិក៥នាក់ត្រូវបានសម្លាប់នៅក្នុងការវាយប្រហារលើភោជនីយដ្ឋានមួយនៅទីក្រុង Manbij ភាគខាងជើងក្បែរព្រំដែនប្រទេសទួរគី។
យោងតាមស្ថិតិរបស់មន្ទីរបញ្ចកោណបានឲ្យបង្ហាញថា ការបំផ្ទុះកាលពីថ្ងៃពុធនេះគឺជាការវាយប្រហារសម្លាប់មនុស្សច្រើនបំផុតសម្រាប់កងកម្លាំងអាមេរិកនិងកងកម្លាំងប្រឆាំងក្រុម IS នៅក្នុងប្រទេសស៊ីរីចាប់តាំងពីពួកគេបានដាក់ពង្រាយនៅក្នុងឆ្នាំ២០១៤។
ក្រុមឃ្លាំមើលមានមូលដ្ឋាននៅប្រទេសអង់គ្លេសដែលពឹងផ្អែកលើបណ្តាញនៃប្រភពមួយក្នុងប្រទេសស៊ីរីបាននិយាយថា វាជាការវាយប្រហារអត្តឃាតលើកដំបូងនៅទីក្រុងនេះក្នុងរយៈពេល១០ខែចុងក្រោយ។
ថ្លែងទៅកាន់ការជួបជុំរបស់ឯកអគ្គរដ្ឋទូតអាមេរិកនៅទីក្រុងវ៉ាស៊ីនតោន លោកអនុប្រធានាធិបតី Mike Pence មិនបានធ្វើអត្ថាធិប្បាយស្តីពីការវាយប្រហារនេះទេដោយគ្រាន់តែនិយាយថា សហរដ្ឋអាមេរិកនឹងធានានូវការបរាជ័យរបស់ក្រុម IS៕ AFP
Source: Kampuchea Thmey Daily
0 Comments