សៀមរាប ៖ សម្ដេចអគ្គមហាពញាចក្រី ហេង សំរិន ធានរដ្ឋសភា បានទទួលជួបពិភាក្សាការងារជាមួយ លោកជំទាវ អុលហ្គា យេពីហ្វាណូវ៉ា(Olga Epifanova) អនុប្រធានសភាឌូម៉ា សហព័ន្ធសហព័ន្ធរុស្ស៊ី នៅព្រឹក ថ្ងៃទី១៦ ខែមករា ឆ្នាំ២០១៩ នៅសណ្ឋាគារ សុខាសៀមរាប ខណៈលោកជំទាវ ដឹកនាំគណៈប្រតិភូ មកចូលរួមកិច្ចប្រជុំលើកទី២៧ APPF ដែលសភាកម្ពុជាកំពុងធ្វើជាម្ចាស់ផ្ទះ។
លោកជំទាវ អុលហ្គា យេពីហ្វាណូវ៉ា បានថ្លែងអំណរគុណសភាកម្ពុជា ដែលបានជ្រើសរើសលោកជំទាវ ធ្វើជាសហប្រធានដឹកនាំកិច្ចប្រជុំសមាជិកសភាស្ត្រី APPF ដ៏មានសារៈសំខាន់។
លោជំទាវ បានជម្រាបសម្ដេចប្រធានរដ្ឋសភាថា ខ្លឹមសារកិច្ចប្រជុំ សមាជិកសភាស្ត្រីAPPF មានសារៈសំខាន់ណាស់ក្នុងការពង្រឹងតួនាទីស្ត្រីក្នុងការចូលរួមចំណែកកសាងសុខសន្តិភាពនៅក្នុងសង្គមជាតិ។ លោកជំទាវបានគូសបញ្ជាក់ថា នៅក្នុងដំណើរបំពេញទស្សនកិច្ចនៅកម្ពុជានេះ គណៈប្រតិភូសភាឌូម៉ា សហព័ន្ធសហព័ន្ធរុស្ស៊ី ក៏បានជួបពិភាក្សាការងារជាមួយសមាជិកស្ត្រីរដ្ឋសភាកម្ពុជាផងដែរ ដើម្បីពង្រឹងពង្រីកកិច្ចសហប្រតិបត្តិការជាមួយគ្នាឲ្យកាន់តែរឹងមាំថែមទៀត។
ក្រៅពីនេះ លោកជំទាវ បានស្នើសម្តេចប្រធានរដ្ឋសភាជួយជំរុញទំនាក់ទំនងរវាងប្រជាជនទាំងប្រទេសទាំងពីរ កាន់តែរឹងមាំឡើង ពិសេសទំនាក់ក្នុងស្រទាប់យុវជនប្រទេសទាំងពីរ។
សម្តេចប្រធានរដ្ឋសភា បានសម្តែងក្តីសោមនស្ស រីករាយជាទីបំផុត ដែលលោកជំទាវ អុលហ្គា យេពីហ្វាណូវ៉ា បានដឹកនាំគណៈប្រតិភូជាន់ខ្ពស់ មកបំពេញទស្សនកិច្ចនៅកម្ពុជា និងចូលរួមកិច្ចប្រជុំ APPF លើកទី២៧។
វត្តមានសភាឌូម៉ារុស្ស៊ីនៅពេលនេះ បានរួមចំណែកដល់ការបន្តរឹតបន្តឹងទំនាក់ទំនង ចំណងមិត្តភាពជាប្រពៃណី និងកិច្ចសហប្រតិបត្តិការ រវាងប្រទេសយទាំងពីរ ជាពិសេសរវាងស្ថាប័ននីតិប្បញ្ញត្តិ កម្ពុជា-សហព័ន្ធរុស្ស៊ី ឲ្យកាន់តែរឹងមាំ និងជិតស្និទ្ធ។
សម្ដេចប្រធានរដ្ឋសភា បានចាត់ទុកប្រទេសរុស្ស៊ី ជាមិត្តចាស់ ជាមិត្តល្អ និងជាអ្នកជិតខាងល្អ របស់កម្ពុជា នៅគ្រប់កាលៈទេសៈ។ រុស្ស៊ី បានជួយគាំទ្រកម្ពុជាចាប់ពីទសវត្សឆ្នាំ១៩៨០ មកដល់បច្ចុប្បន្ននេះ។ ក្នុងការពង្រឹងកិច្ចសហប្រតិបត្តិការរដ្ឋសភាប្រទេសទាំងពីរ ប្រធានសភាសភាឌូម៉ា សហព័ន្ធសហព័ន្ធរុស្ស៊ី គ្រោងអញ្ជើញមកបំពេញទស្សនកិច្ចផ្លូវការនៅកម្ពុជាក្នុងឆ្នាំនេះផងដែរ៕
Source: Kampuchea Thmey Daily
0 Comments