តាកែវ ៖ រយៈពេល២ថ្ងៃជាប់គ្នានេះ ប៉ូលិសស្រុកគីរីវង់ បានបើកប្រតិបត្តិការជាថ្មីឡើងភ្នំស្វែងរកទីតាំងលួចលាក់ដំណាំកញ្ឆាដោយខុសច្បាប់បាន១០ទីតាំង ដែលមានដើមកញ្ឆារហូតដល់៣២៣៩ដើម ត្រូវបានកាប់ និងដុតបំផ្លាញចោល។
លោកវរសេនីយ៍ឯក យ៉ុគ សារ៉ាត់ អធិការនគរបាលស្រុកគីរីវង់បានឲ្យដឹងថា ក្រោមការណែនាំពីលោកឧត្ដមសេនីយ៍ទោ សុខ សំណាង ស្នងការនគរបាលខេត្តតាកែវ កម្លាំងក្នុងអធិការដ្ឋានលើកបានបើកប្រតិបត្តិការឡើងភ្នំរុករក កាប់ និងដុតបំផ្លាញដំណាំកញ្ឆា ដែលជនខិលខូចលួចដាំដោយខុសច្បាប់ ដែលថ្ងៃទីមួយ គឺនៅថ្ងៃទី១៦ ខែមករា ឆ្នាំ២០១៩ បានចំនួន០៦ទីតាំង ស្មើនឹង២១១៥ដើម អាងស្តុបទឹក០១ ធ្វើឡើងនៅចំណុចខ្នងបន្ទាយ និងអង់តែន ស្ថិតនៅក្នុងភូមិជ្រោយ ឃុំព្រះបាទជាន់ជុំ ស្រុកគិរីវង ខេត្តតាកែវ ដែលមានផ្ទៃដីប្រមាណ១៥៧០ម៉ែត្រការ៉េ។
ថ្ងែទីពីរ គឺនៅព្រឹកថ្ងៃទី១៧ ខែមករា ឆ្នាំ២០១៩ បង្ក្រាបបាន០៤ទីតាំង ស្មើនិង១១២៤ដើម អាងស្តុបទឹក០២ ធ្វើឡើងនៅចំណុចជើងភ្នំដុបថ្មចង្ក្រាន ស្ថិតនៅក្នុងភូមិជ្រោយ ឃុំព្រះបាទជាន់ជុំ ស្រុកគីរីវង់ ខេត្តតាកែវ ដែលមានផ្ទៃដីប្រមាណ៧៤៤ម៉ែត្រការ៉េ។
លោកអធិការស្រុកបានបញ្ជាក់ថា ដោយនៅទីផ្សារងងឹតក្នុងប្រទេសវៀតណាមមានហាងឆេងល្អនោះ ពួកសង្គមងងឹតបានដើរបំផុសបំផុលឲ្យប្រជាពលរដ្ឋលួចលាក់ដាំដំណាំកញ្ឆាទាំងបំពានច្បាប់ ដោយពួកគេបានប្រើមធ្យោបាយគ្រប់រូបភាពឲ្យពលរដ្ឋលួចដាំ ពីព្រោះដំណាំកញ្ឆានេះបើហាលគ្រាមយកទៅលក់ដល់ដីវៀតណាម១គីឡូក្រាម មានតម្លៃ៥លានដុង ស្មើនឹង១លានរៀលលុយខ្មែរ។
ហើយបើយើងមើលទីតាំងដែលប្រជាពលរដ្ឋលួចដាំដំណាំកញ្ឆាទាំងនោះវិញ គឺពិបាកនឹងរុករកណាស់ ព្រោះនៅលើភ្នំមានលក្ខណៈស្មុគស្មាញបំផុត។
ទោះជាយ៉ាងនេះក្តី លោកអធិការស្រុកគីរីវង់បានបញ្ជាក់ថា លោកនៅតែបន្តស្រាវជ្រាវដក និងដុតបំផ្លាញចោលដំណាំកញ្ឆាខុសច្បាប់នេះឲ្យដូចភ្លៀងរលឹម និងស្រាវជ្រាវស្វែងរកម្ចាស់ដំណាំកញ្ឆាដើម្បីយកមកផ្ដន្ទាទោសតាមផ្លូវច្បាប់ឲ្យខានតែបាន៕
Source: Kampuchea Thmey Daily
0 Comments