ទីភ្នាក់ងារសារព័ត៌មានកូរ៉េខាងត្បូង Yonhap បានរាយការណ៍នៅថ្ងៃព្រហស្បតិ៍ថា បេសកជនកំពូលរបស់កូរ៉េខាងជើង ដែលចូលរួមក្នុងកិច្ចចរចាជាមួយសហរដ្ឋអាមេរិក បានទៅដល់ទីក្រុងប៉េកាំងនៅថ្ងៃព្រហស្បតិ៍ ហើយត្រូវបានគេគិតថានឹងធ្វើដំណើរទៅកាន់ក្រុងវ៉ាស៊ីនតោន។
ប្រព័ន្ធផ្សព្វផ្សាយរបស់អាមេរិកនិងកូរ៉េខាងត្បូងធ្លាប់ដកស្រង់ប្រភពមិនច្បាស់លាស់នានាដែលនិយាយថា រដ្ឋមន្ត្រីការបរទេសអាមេរិកលោក Mike Pompeo និងមន្ត្រីកូរ៉េខាងជើងលោក Kim Yong Chol ត្រូវបានគេរំពឹងថានឹងជួបប្រជុំគ្នាក្នុងរដ្ឋធានីអាមេរិកនៅថ្ងៃសុក្រដើម្បីពិភាក្សាអំពីកិច្ចប្រជុំកំពូលលើកទីពីររវាងលោកប្រធានាធិបតី ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន។
Yonhap បានរាយការណ៍ថា លោក Kim បានទៅដល់ព្រលានយន្តហោះក្រុងប៉េកាំងនៅថ្ងៃព្រហស្បតិ៍តាមជើងហោះហើររបស់ក្រុមហ៊ុនអាកាសចរណ៍ Air Koryo ពីទីក្រុងព្យុងយ៉ាងហើយត្រូវបានស្វាគមន៍ដោយឯកអគ្គរដ្ឋទូតរបស់កូរ៉េខាងជើងប្រចាំប្រទេសចិន។
ទីភ្នាក់ងារព័ត៌មាននេះបាននិយាយថា គាត់ត្រូវបានគេរំពឹងថានឹងជិះយន្តហោះទៅកាន់ទីក្រុងវ៉ាស៊ីនតោននៅពេលល្ងាច។
លោក Pompeo គ្រោងនឹងជួបជាមួយសមភាគីកូរ៉េខាងជើងរបស់លោកដើម្បីពិភាក្សាអំពីកិច្ចប្រជុំកំពូលជាលើកទីពីរកាលពីខែវិច្ឆិកាប៉ុន្តែកិច្ចប្រជុំនោះត្រូវបានពន្យារពេល។
ពេលចុងក្រោយបំផុតដែលលោក Kim Yong Chol ស្ថិតនៅទីក្រុងវ៉ាស៊ីនតោនគឺកាលពីខែមិថុនានៅពេលដែលលោកបានពាំនាំលិខិតមួយពីលោកគីមជុងអ៊ុនទៅឲ្យលោកត្រាំដែលបានបើកផ្លូវសម្រាប់កិច្ចប្រជុំមិនធ្លាប់មានមួយរវាងមេដឹកនាំនៃប្រទេសទាំងពីរនៅក្នុងប្រទេសសិង្ហបុរីកាលពីថ្ងៃទី១២ខែមិថុនា។
ទូរទស្សន៍ CNN បានដកស្រង់ប្រភពដែលដឹងពីការចរចាររវាងអាមេរិកនិងកូរ៉េខាងជើងដោយនិយាយថា លោក Kim Yong Chol នឹងពាំនាំលិខិតថ្មីមួយពីលោកគីមជុងអ៊ុនទៅឲ្យលោកត្រាំនៅទីក្រុងវ៉ាស៊ីនតោន។
នៅប្រទេសសិង្ហបុរីកាលពីឆ្នាំមុន លោកគីមជុងអ៊ុនបានសន្យាថានឹងធ្វើការឆ្ពោះទៅរកការលុបបំបាត់អាវុធនុយក្លេអ៊ែរនៅលើឧបទ្វីបកូរ៉េប៉ុន្តែមានការរីកចំរើនគួរឲ្យកត់សម្គាល់តិចតួចណាស់ចាប់តាំងពីពេលនោះមក។
ទំនាក់ទំនងបានចាប់ផ្តើមជាថ្មីបន្ទាប់ពីមេដឹកនាំកូរ៉េខាងជើងថ្លែងសុន្ទរកថាឆ្នាំថ្មីមួយដែលក្នុងនោះលោកបាននិយាយថា លោកមានឆន្ទៈក្នុងការជួបជាមួយលោកត្រាំនៅពេលណាមួយ៕ REUTERS
Source: Kampuchea Thmey Daily
0 Comments