សៀមរាប ៖ សមត្ថកិច្ចបានឲ្យដឹងថា ជនបរទេសម្នាក់ បានស្លាប់នៅមន្ទីរពេទ្យបង្អែក ខេត្តសៀមរាប បន្ទាប់ពីក្រុមគ្រួសារ នាំមកសង្គ្រោះ ក្រោយពេលដួលទៅលើដី នៅក្នុងសណ្ឋាគារ MARVEL BOUTIQUE។ ហេតុការណ៍នេះកើតឡើងនៅវេលាម៉ោងប្រហែល២១ ថ្ងៃទី១៥ ខែមករា ឆ្នាំ២០១៩ នៅមន្ទីរពេទ្យបង្អែកខេត្តសៀមរាប ស្ថិតនៅភូមិមណ្ឌល១ សង្កាត់ស្វាយដង្គំ ក្រុងសៀមរាប។
មន្ត្រីនគរបាលជំនាញ នៃស្នងការដ្ឋានខេត្តសៀមរាប បានឲ្យដឹងថា ជនរងគ្រោះឈ្មោះ ROMANOV ALEKSANDR ភេទប្រុស កើតថ្ងៃទី១៨ ខែតុលា ឆ្នាំ១៩៧៦ ជនជាតិរុស្សី កាន់លិខិតឆ្លងដែនលេខ ៧៥៩៣៣៦២៣២ ជាភ្ញៀវទេសចរ ចូលមកព្រះរាជាណាចក្រកម្ពុជាថ្ងៃទី១៥ ខែមករា ឆ្នាំ ២០១៩ តាមច្រកព្រំដែនអន្តរជាតិប៉ោយប៉ែត តាមរយៈក្រុមហ៊ុនទេសចរណ៍ VELES AMAZING ស្នាក់នៅបន្ទប់លេខ ៣០១ សណ្ឋាគារ MARVEL BOUTIQUE ស្ថិតនៅភូមិជន្លង់ សង្កាត់សាលាកំរើក ក្រុងសៀមរាប។
មន្ត្រីដដែលបន្ថែមថា តាមការសាកសួរប្រពន្ធជនរងគ្រោះ នាវេលាម៉ោងប្រហែល២០និង៤០នាទីថ្ងៃទី១៥ ខែមករា ឆ្នាំ២០១៩ បន្ទាប់ពីញ៉ាំអាហារពេលល្ងាចហើយជនរងគ្រោះ បានចុះទៅហែលទឹកអាងក្នុងសណ្ឋាគារបានរយៈពេលប្រហែល១០នាទី ក៏បានឡើងមកវិញ ស្រាប់តែគាត់បានដួលទៅលើដី។ ភ្លាមៗនោះ ខ្លួនក៏បានឲ្យបុគ្គលិកសណ្ឋាគារ និងមិត្តភ័ក្ដិ ជួយបញ្ជូនជនរងគ្រោះទៅមន្ទីរពេទ្យបង្អែកខេត្តសៀមរាប ពេលទៅដល់ក្រុមគ្រូពេទ្យបានជួយសង្គ្រោះបឋម និងបានបញ្ជាក់ថា ជនរងគ្រោះបានស្លាប់ហើយ។
បើតាមមន្ត្រីបន្តថា ករណីនេះមូលហេតុ នៃការស្លាប់សមត្ថកិច្ចជំនាញ និងលោកវេជ្ជបណ្ឌិត កំពុងធ្វើកោសល្យវិច័យ។ សាកសព ត្រូវបានតម្កល់ទុកបណ្ដោះអាសន្ននៅមន្ទីរពេទ្យអន្តរជាតិរ៉ូយ៉ាល់អង្គរដើម្បីរង់ចាំការសម្រេចពីក្រុមគ្រួសារ និងស្ថានទូត៕
Source: Kampuchea Thmey Daily
0 Comments