បន្ទាយមានជ័យ ៖ លោកហ៊ុនម៉ានី ប្រធានសហភាពសហព័ន្ធយុវជនកម្ពុជាទូទាំងប្រទេសបានមានប្រសាសន៍ថា ការបង្កើតសហភាពសហព័ន្ធយុវជនកម្ពុជានេះឡើង គឺដើម្បីជួយដល់សង្គមដូចជាចុះជួយបងប្អូនដែលជួបការលំបាក នៅតាមមូលដ្ឋាន ការងារសង្គម ការងារមនុស្សធម៌ បរិស្ថាន វប្បធម៌ សាសនា អប់រំកីឡាជាដើមថ្លែងក្នុងពិធីជួបសមាជិកសហភាពសហព័ន្ធយុវជនកម្ពុជាខេត្តបន្ទាយមានជ័យ នៅព្រឹក ថ្ងៃទី១៨ ខែមករា ឆ្នាំ២០១៩ នៅសាលប្រជុំធំសាលាខេត្តបន្ទាយមានជ័យ ដែលមានអ្នកចូលរួម លោកសួន បវរ អភិបាលខេត្តបន្ទាយមានជ័យ អភិបាលរងខេត្ត លោកប៉ោវណ្ណាត ប្រធានសហភាពសហព័ន្ធយុវជនកម្ពុជាខេត្តបន្ទាយមានជ័យ អង្គភាពអាវុធហត្ថ នគរបាល សិស្ស និស្សិត និងសហភាពសហព័ន្ធយុវជនកម្ពុជាខេត្តបន្ទាយមានជ័យ១.០០៨នាក់ បានចូលរួម។
ក្នុងនោះ លោក សួន បវរ បានមានប្រសាសន៍ថា នៅឆ្នាំ២០១៨កន្លងមកនេះ សហភាពសហព័ន្ធយុវជនកម្ពុជាខេត្ត បានចូលរួមគ្រប់វិស័យ រាល់សកម្មភាពដូចជា ការខិតខំប្រឹង ប្រែងចុះសួរសុខទុក្ខជាប្រចាំ ដោយមានការចូលរួមជាប្រចាំពីបងប្អូន ថ្នាក់ខេត្ត ដល់ថ្នាក់មូលដ្ឋាននិងបានជួបផ្ទាល់ជាមួយបងប្អូនប្រជាពលរដ្ឋ ដែលជួបការលំបាក។
លោកបានបញ្ជាក់ឲ្យដឹងទៀតថា សហភាពសហព័ន្ធយុវជនកម្ពុជាខេត្តបម្រើប្រជាពលរដ្ឋដោយមិនគិតពីខ្លាចការនឿយហត់ទាំងកម្លាំងកាយនិងកម្លាំងចិត្ត ធនធានដើម្បីជួយដោះស្រាយទុក្ខលំបាកដល់ពុក ម៉ែ និងបានចូលរួមលើកិច្ចការជាច្រើនទៀតដែលពុំអាចរៀបរាប់បានដែលថ្នាក់ដឹកនាំសហភាពសហព័ន្ធយុវជនកម្ពុជាខេត្ត បានចំណាយធនធាន និងសម្ភារៈ និងថវិកាសរុបប្រចាំឆ្នាំ២០១៨កន្លងមករួមមាន៤៣៩.៧៤៩ដុល្លា ចំណាយលើការងារវប្បធម៌ និងសាសនា រួមមាន១.៩០០ដុល្លា ការងារអប់រំកីឡា៤៧.៨៤៨ដុល្លា ការងារសង្គមមនុស្សធម៌ បរិច្ចាគ និងប្រវត្តិសាស្ត្រ១៤០.៥៩៩ដុល្លារ។
ក្នុងនោះលោកហ៊ុន ម៉ានី ប្រធានសហភាពសហព័ន្ធយុវជនកកម្ពុជា បានធ្វើការកោតសរសើរដល់សហភាពសហព័ន្ធយុវជនកម្ពុជាខេត្តបន្ទាយមានជ័យទាំងអស់ ក្នុង១ឆ្នាំពេញបានបំពេញភារកិច្ចចូលរួមគ្រប់សកម្មភាពសង្គម មនុស្សធម៌ សម្អាតបរិស្ថាន វប្បធម៌ និងសាសនាចាប់តាំងពីថ្នាក់ខេត្តដល់ថ្នាក់មូលដ្ឋានលើគ្រប់រូបភាព ក្នុងនោះបានចុះធ្វើការផ្សព្វផ្សាយអំពីផលប៉ះពាល់អំពីគ្រឿងញៀន ក្នុងភូមិ ឃុំដើម្បីឲ្យមានសុវត្ថិភាព និងគ្រោះថ្នាក់ចរាចរណ៍ជាដើម។
លោកបានបញ្ជាក់ឲ្យដឹងទៀតថា ការងារស្ម័គ្រចិត្តរបស់សហភាពសហព័ន្ធយុវជនកម្ពុជាមិនតម្រូវឲ្យមានអ្វីៗទេ សុំមានតែចិត្តតាមរយៈការងារស្ម័គ្រចិត្តនេះឯង ដែលធ្វើឲ្យសហភាពសហព័ន្ធយុវជនកម្ពុជាអាចស្គាល់ពីខ្លួនឯងកាន់តែច្បាស់ ស្គាល់ពីអ្នកដទៃ និងចេះជួយគ្នាអាចនឹងមានមោទនភាពចំពោះជាតិខ្លួនយ៉ាងណា បើសិនជាសហភាពសហព័ន្ធយុវជនកម្ពុជាមិនដែលធ្វើអ្វីល្អមួយសោះសម្រាប់សង្គមជាតិនេះនោះទៅថ្ងៃមុខប្រាកដមានវិប្បដិសារីជាមិនខានឡើយ៕
Source: Kampuchea Thmey Daily
0 Comments