ភ្នំពេញ ៖ យុវជនម្នាក់ដោយសារអំណាចឥទ្ធិពលនៃគ្រឿងញៀនពេញបន្ទុកក្នុងខ្លួន រហូតដល់រវើរវាយ និយាយលែងដឹងខុសត្រូវ បែរជាឡើងទៅលើដំបូលផ្ទះ តែកំពុងឡើងតាមបង្កាន់ដៃដល់ជាន់ទី២ ប៉ុនប៉ងលោតសម្លាប់ខ្លួន តែមិនបានស្រេច ដោយសារសាច់ញាតិក្រុមគ្រួសារ និងសមត្ថកិច្ច លួងលោមផងទីបំផុត លបហក់ចូលព្រួតចាប់អូសចុះក្រោមប្រកបដោយសុវត្ថិភាព កាលពីវេលាម៉ោង១០និង៤៥នាទីព្រឹក ថ្ងៃទី១៦ ខែមករា ឆ្នាំ២០១៩ ស្ថិតនៅផ្ទះជួលជាន់ទី២ ផ្លូវលំ ភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ។
យុវជនញៀនថ្នាំអាយុជាង២០ឆ្នាំ ជាកម្មកររោងចក្រ ស្នាក់នៅបន្ទប់ជួលកន្លែងកើតហេតុ ជាមួយបងប្អូន ក្រុមគ្រួសារ។
តាមប្រជាពលរដ្ឋរស់នៅកន្លែងកើតហេតុ បានឲ្យដឹងថា យុវជនខាងលើទើបតែមកស្នាក់នៅ ធ្វើការងារ ក្នុងរយៈពេលថ្មីៗនេះទេ ពុំសូវ មាត់ក ហើយក៏មិនដែលមានទំនាស់ជាមួយបងប្អូនណាដែរ មិនដឹងថា រូបគេប្រើប្រាស់គ្រឿងញៀនតាំងពីពេលណាឡើយ ស្រាប់តែនៅវេលាម៉ោងខាងលើ បែរជារវើរវាយ ដោយឥទ្ធិពលថ្នាំធ្វើទុក្ខ រត់ឡើងលើបង្កាន់ដៃផ្ទះជាន់ទី២ ឱបបំពង់ទុយោជាប់ ប៉ុនប៉ងលោតសម្លាប់ខ្លួនទៅវិញ បង្កឲ្យភ្ញាក់ផ្អើល ដល់ក្រុមគ្រួសារ ទៅលួងលោមយ៉ាងណាក៏មិនចុះ ផ្អើលអស់ពលរដ្ឋ សមត្ថកិច្ចចុះទៅល្បួងលួងឲ្យចុះ នៅតែមិនចុះ អស់រយៈពេលជាង១ម៉ោង រហូតដល់ប្អូនប្រុសរបស់គេម្នាក់ទៀត មកដល់ និយាយអង្វរ ឲ្យចុះ តែបងប្រុសមិនចុះ ក៏ស្ទុះចូលស្រវាចាប់ឱបផ្ទប់ជាប់ ពលរដ្ឋ និងសមត្ថកិច្ច ឡើងទៅបន្ថែមជួយចាប់ ទាញអូសចុះបានដោយសុវត្ថិភាព ទើបរួចផុតពីសេចក្ដីស្លាប់។
តាមក្រុមគ្រួសារ ក្រោយពីចាប់ ជួយយុវជនខាងលើបានហើយសុំសមត្ថកិច្ច អាជ្ញាធរ គ្រប់គ្រងយុវជននេះដោយខ្លួនឯង ប្រើវិធីសាស្ត្រលួងលោម និងយកវិលត្រឡប់ទៅស្រុកកំណើតវិញ ដើម្បីគ្រឿងញៀន៕
Source: Kampuchea Thmey Daily
0 Comments