ភ្នំពេញ ៖ នាព្រឹកថ្ងៃទី២៣ ខែមករា ឆ្នាំ២០១៩នេះ ក្រុមប្រឹក្សាជំនុំជម្រះសាលាដំបូងរាជធានីភ្នំពេញ បានលើកយកសំណុំរឿងឃាតកម្មលើស្ត្រីមេម៉ាយ ជាមន្ត្រីរដ្ឋសភា មកបើកសវនាការនៅចំពោះមុខជនជាប់ចោទ ដែលជាអតីតអភិបាលខេត្តតាកែវ និងបងប្រុសជាអតីតស្នងការរងនគរបាលខេត្តតាកែវ។
អង្គសវនាការនេះ ដឹកនាំដោយលោកចៅក្រម ហម ម៉េងសែ ជាប្រធានក្រុមប្រឹក្សា និងលោក ប្លង់ សុផល ជាតំណាងអយ្យការអមតុលាការ។
ក្នុងសវនាការ តុលាការ បានផ្ដើមចោទប្រកាន់ ឈ្មោះ ឡាយ វណ្ណៈ អតីត អភិបាលខេត្តតាកែវ និងបងប្រុសរបស់ លោក ឈ្មោះ ឡាយ ណារិទ្ធ អតីតស្នងការរងនគរបាល ខេត្តតាកែវ ពីបទឃាតកម្មតាមមាត្រា ១៩៩ នៃក្រមព្រហ្មទណ្ឌ។
ហើយមនុស្សពីរនាក់ទៀត ពីបទលាក់បាំងតម្រុយតាម មាត្រា៥៣២ នៃក្រមព្រហ្មទណ្ឌ គឺឈ្មោះ ម៉េន សាម៉ៃ ជាអ្នកបើកបរ ឲ្យ លោក ឡាយ វណ្ណៈ និងឈ្មោះ ជឹម វុធ ជាអ្នកបម្រើក្នុងផ្ទះ របស់អ្នកស្រី ចែវ សុវឌ្ឍនា។
សវនាការនាថ្ងៃដំបូងនេះ តុលាការ បានសាកសួរទៅលើ លោក ឡាយ វណ្ណៈ តែម្នាក់ប៉ុណ្ណោះ ជុំវិញការស្លាប់របស់ជនរងគ្រោះ។
ជនជាប់ចោទ ឡាយ វណ្ណៈ បានសារភាពថា លោកបានស្គាល់ ចែវ សុវឌ្ឍនា នាអំឡុងឆ្នាំ២០១៦តាមរយៈមេគយខេត្តតាកែវ ដែលជាប្រធានក្រុមការងារយុវជនក្រៅប្រទេស។ ក្នុងរយៈពេល នៃការស្រលាញ់គ្នាលួចលាក់នេះ លោកជាមួយនឹង វឌ្ឍនា មានការរកាំរកូសគ្នាជាញឹកញាប់ដោយសារតែ វឌ្ឍនា មានចិត្តប្រចណ្ឌហួងហែងច្រើន រហូតមានពេលខ្លះគាត់បានលេបថ្នាំប៉ុនប៉ងសម្លាប់ខ្លួនគំរាមលោកមិនឲ្យទៅប្រទេសម៉ារ៉ុក ជាមួយនឹងភរិយា។
ការប្រចណ្ឌនោះ មានថ្ងៃមួយលោកបានជ្រុលដៃទះកំផ្លៀង វឌ្ឍនា ២ដៃ ដោយសារតែលោកខឹង វឌ្ឍនា ទៅតាមរករឿងលោកដល់ផ្ទះឪពុកក្មេកលោក ដោយចោទថា លោកមានស្រីលាក់នៅក្នុងផ្ទះ។
ជនជាប់ចោទបាននិយាយទៀតថា រហូតដល់ថ្ងៃទី២៥-២៦មីនា ឆ្នាំ២០១៨ លោកមានទំនាស់ជាពាក្យសម្ដីតិចតួចជាមួយ វឌ្ឍនា ដោយសារតែនាង បានបង្ខំឲ្យលោកមករស់នៅក្នុងផ្ទះជាមួយរូបនាងតែម្ដង ក្នុងនោះ វឌ្ឍនា បានស្នើឲ្យរូបលោកស្រលាញ់នាងដូចដើម ហើយទី២ យកនាងជាប្រពន្ធទី២ ប៉ុន្តែនិយាយគ្នាមិនត្រូវ លោកក៏ត្រឡប់ទៅផ្ទះវិញ។
លុះដល់ថ្ងៃទី២៦មីនា ពេលចេញពីប្រជុំលោក ក៏បានឲ្យអ្នកបើកបរជូនលោកមកផ្ទះ វឌ្ឍនា ម្ដងទៀតដើម្បីហូបបាយជុំគ្នា ប៉ុន្តែពេលទូរស័ព្ទទៅស្រាប់តែ វឌ្ឍនា បានមកដល់ភ្នំពេញទៅហើយដោយសារនាងយល់ច្រឡំថាមកហូបបាយនៅផ្ទះនាងបឹងស្នោ។ ពេលនោះ នាង ក៏បានមកវិញជាមួយ ចាន់ រី និងប្ដី។
ពេលមកដល់ជួបគ្នានៅព្រលប់នោះ ពួកលោកបាននិយាយគ្នាម្ដងទៀត ប៉ុន្តែនិយាយគ្នាមិនត្រូវសោះ លោកក៏ត្រឡប់ទៅវិញ ពេលនោះ វឌ្ឍនា បាននិយាយពីលើជណ្ដើរមកថា បើថ្ងៃនេះ បងចេញផុតពីមាត់ទ្វារផ្ទះ បងនឹងលែងបានជួបមុខអូនរហូតហើយ ពេលនោះលោកនៅតែដើរចេញទៅឡើងឡានមកផ្ទះវិញ។ លុះពេលមកដល់ផ្ទះ ស្រាប់តែ ចាន់ រី ទូរស័ព្ទមកប្រាប់ថា វឌ្ឍនា យកកាំបិតអារដៃ ប៉ុន្តែនាង និងប្ដីបានដណ្ដើមយកកាំបិតហើយ។ មួយសន្ទុះក្រោយមក ស្រាប់តែ ចាន់ រី ទូរស័ព្ទមកម្ដងទៀតថា វឌ្ឍនា ចង.ក សម្លាប់ខ្លួនហើយ ពេលនោះលោកមិនជឿទេ ប៉ុន្តែបានអោយឲ្យ សាម៉ៃ ទៅមើល ពេលទៅដល់ សាម៉ៃ ប្រាប់តាមទូរស័ព្ទថាបងស្រី ចង.ក សម្លាប់ខ្លួនមែន។ ពេលនោះលោកតក់ស្លុតណាស់ ក៏បានប្រាប់ឲ្យ សាម៉ៃ យកទូរស័ព្ទរបស់ វឌ្ឍនា មកទុក ដោយសារក្នុងទូរស័ព្ទមានថតរូបលោកជាមួយ វឌ្ឍនា យ៉ាងច្រើន ខ្លាចធ្លាក់ដល់ដៃអ្នកកាសែត។ បន្ទាប់មក លោកក៏បានឲ្យអ្នកបើកបរម្នាក់ទៀតជូនលោកមកភ្នំពេញមើលកូនឈឺ និងប្រាប់រឿង វឌ្ឍានា ចង.ក សម្លាប់ខ្លួនឲ្យប្រពន្ធដឹង។ ក្នុងពេលនោះដែរ ស្រាប់តែម្ដាយ វឌ្ឍនា និងកូនទី២ បានទូរស័ព្ទមកលោកប្រាប់ពីរឿង វឌ្ឍនា ចង.ក ពេលនោះលោកក៏សុំប្រពន្ធមកតាកែវវិញ ដើម្បីចាត់ចែងសុំយកសាកសពមកធ្វើបុណ្យនៅភ្នំពេញ។
សវនាការនេះបានសាកសួរ លោក ឡាយ វណ្ណៈ បានត្រឹមប៉ុណ្ណឹង ប្រធានក្រុមប្រឹក្សាជំនុំជម្រះក៏បានសម្រេចផ្អាកសវនាការ ដោយសារដល់ម៉ោងបញ្ចប់ទៅហើយ ដោយសវនាការបន្ទាប់ តុលាការនឹងជូនដំណឹងពេលក្រោយ។
សូមរំលឹកថា កាលពីថ្ងៃទី៣១ ខែមីនា ឆ្នាំ២០១៨ អតីតអភិបាលខេត្តតាកែវ លោក ឡាយ វណ្ណៈ នៅមុនពេលតុលាការចាប់ខ្លួន លោកបានសរសេរនៅលើបណ្ដាញសង្គមហ្វេសប៊ុក Facebook របស់ លោកថា លោកមានទំនាក់ទំនងស្នេហាជាមួយនឹងស្ត្រីរងគ្រោះ ឈ្មោះ ចែវ សុវឌ្ឍនា ប៉ុន្តែបានបដិសេធថា លោកមិនបានសម្លាប់ វឌ្ឍានា ទេ។
ជនរងគ្រោះ ឈ្មោះ ចែវ សុវឌ្ឍនា អាយុ៣៦ឆ្នាំ មានកូន៣នាក់ ក្នុងបន្ទុក ដំបូងឡើយ ត្រូវបានរកឃើញថាស្លាប់ដោយចង.ក ដែលសមត្ថកិច្ចខេត្តតាកែវ អះអាងកាលពីពេលនោះថា ជនរងគ្រោះ ធ្វើ អត្តឃាតខ្លួនឯង ប៉ុន្តែក្រោយការស៊ើបអង្កេតរបស់សមត្ថកិច្ចក្រសួងមហាផ្ទៃមួយក្រុម បង្ហាញថាស្ត្រីជនរងគ្រោះត្រូវបានធ្វើឃាតទៅវិញ ទើបរឿងក្ដីត្រូវបានសើរើ ហើយតុលាការរាជធានីភ្នំពេញ បានបញ្ជាឲ្យសមត្ថកិច្ចចាប់ លោក ឡាយ វណ្ណៈ លោក ឡាយ ណារិទ្ធ ម៉េម សាម៉ៃ និងជឹម វុធ មកដាក់ឃុំខ្លួនរហូតដល់ថ្ងៃកាត់ក្ដីនេះ៕
Source: Kampuchea Thmey Daily
0 Comments