នៅថ្ងៃពុធ ទីក្រុងហុងកុងនឹងបង្ហាញសេចក្តីព្រាងច្បាប់ដ៏ចម្រូងចម្រាសមួយដល់សមាជិកសភាដែលសេចក្តីព្រាងច្បាប់នេះនឹងបញ្ជាក់ពីការដាក់ទោសជាប់ពន្ធនាគាររហូតដល់៣ឆ្នាំចំពោះជនណាដែលមិនគោរពភ្លេងជាតិរបស់ប្រទេសចិន ខណៈក្រុមអ្នករិះគន់និយាយថា សេចក្តីព្រាងច្បាប់នេះនឹងបង្កើនការភ័យខ្លាចថ្មីចំពោះសេរីភាពបញ្ចេញមតិនៅក្នុងទីក្រុងនេះ។
អាជ្ញាធរចិនបានព្យាយាមដើម្បីបង្កើតភាពស្នេហាជាតិឲ្យកាន់តែធំធេងនៅក្នុងអតីតអាណានិគមអង់គ្លេសមួយនេះចំពេលដែលមានភាពតានតឹងកាន់តែខ្លាំងឡើងរវាងសកម្មជនប្រជាធិបតេយ្យនិងកងកម្លាំងស្មោះត្រង់នឹងក្រុងប៉េកាំង។
ក្រៅពីការដាក់ពន្ធនាគារក៏នឹងមានវិធានការកំណត់ការពិន័យជាទឹកប្រាក់អតិបរមា៥០,០០០ដុល្លារហុងកុង (៦,៣៧៣ដុល្លារអាមេរិក) ផងដែរសម្រាប់អ្នកទាំងឡាយណាដែលមិនគោរពភ្លេងជាតិ “March of the Volunteers” ជាសាធារណៈនិងដោយចេតនា។
វាក៏ពង្រីកដល់ក្មេងៗសិស្សសាលារួមទាំងសិស្សៗនៃសាលាអន្តរជាតិផងដែរដែលត្រូវបានតម្រូវដោយច្បាប់ដើម្បីរៀនភ្លេងជាតិ។
ការបង្ហាញសេចក្តីមិនពេញចិត្តចំពោះចម្រៀងជាតិនៅឯការប្រកួតបាល់ទាត់នៅក្នុងទឹកដីដែលចិនគ្រប់គ្រងមួយនេះបានលេចឡើងជាទម្រង់នៃការតវ៉ាខាងនយោបាយកាលពីប៉ុន្មានឆ្នាំកន្លងមកនេះដោយប្រជាជនវ័យក្មេងបានបង្ហាញនូវការខកចិត្តរបស់ពួកគេចំពោះឥទ្ធិពលរបស់ទីក្រុងប៉េកាំង។
មជ្ឈមណ្ឌលហិរញ្ញវត្ថុសកលមួយនេះបានវិលត្រលប់មកក្រោមការគ្រប់គ្រងរបស់ចិនវិញនៅក្នុងឆ្នាំ១៩៩៧ក្រោមរូបមន្តដែលគេហៅថា “ប្រទេសមួយ ប្រព័ន្ធពីរ” ជាមួយនឹងការសន្យាថា ទីក្រុងនេះនឹងមានស្វ័យភាពខ្ពស់រួមទាំងសេរីភាពនៃការបញ្ចេញមតិផងដែរ។
សំណើទាក់ទងនឹងភ្លេងជាតិនេះត្រូវបានគេរំពឹងថានឹងឆ្លងកាត់ការអនុម័តយ៉ាងងាយស្រួលនៅពេលវាត្រូវបានគេដាក់ឲ្យបោះឆ្នោតមុនរដូវក្តៅខណៈដែលគណបក្សប្រឆាំងមិនមានអាសនៈគ្រប់គ្រាន់ដើម្បីរារាំងច្បាប់ឡើយ៕ REUTERS
Source: Kampuchea Thmey Daily
0 Comments