បាត់ដំបង ៖ ជនសង្ស័យម្នាក់ ដែលពាក់ព័ន្ធនឹងការកាន់កាប់ រក្សាទុកដោយខុសច្បាប់ នូវសារធាតុញៀន រួមជាមួយនឹងថ្នាំញៀនជាច្រើនកញ្ចប់ផងដែរ ត្រូវបានកម្លាំងសមត្ថកិច្ច តាមប្រមាញ់ និងឈានដល់ការឃាត់ខ្លួនក្នុងករណីជាក់ស្តែង។
កិច្ចប្រតិបត្តិការនេះ គឺសមត្ថកិច្ច នៃអធិការដ្ឋាន នគរបាលស្រុកភ្នំព្រឹក បានសហការជាមួយកម្លាំងប៉ុស្តិ៍ ធ្វើឡើងនៅវេលាម៉ោង៩និង៣០នាទីយប់ ថ្ងៃទី២២ ខែមករា ឆ្នាំ២០១៩ ទៅកាន់ចំណុចលើភ្នំ៥៣ ស្ថិតក្នុងភូមិភ្នំព្រឹក ឃុំភ្នំព្រឹក ស្រុកភ្នំព្រឹក ខេត្តបាត់ដំបង ដោយកម្លាំងនគរបាលបានឃាត់ខ្លួនជនសង្ស័យម្នាក់ ឈ្មោះ វង្ស ចាន់ធី (ហៅឃុយ) ភេទប្រុស អាយុ៣១ឆ្នាំ មុខរបរមិនពិតប្រាកដ មកស្នាក់នៅភូមិ/ឃុំ ខាងលើ។
នៅក្នុងកិច្ចប្រតិបត្តិការនោះ កម្លាំងនគរបាល បានដកហូតវត្ថុតាង គឺថ្នាំញៀនប្រភេទម៉ាទឹកកក ចំនួន១៩កញ្ចប់ ថ្នាំញៀនប្រភេទយ៉ាម៉ា ចំនួន៨គ្រាប់ សម្ភារៈប្រើប្រាស់ និងវេចខ្ចប់មួយចំនួនបន្ថែមទៀត។
បច្ចុប្បន្ន សមត្ថកិច្ច បានកសាងសំណុំរឿងដើម្បីបញ្ជូនខ្លួនជនសង្ស័យ និងវត្ថុតាងទៅសាលាដំបូងខេត្តបាត់ដំបងហើយ ក្នុងការចាត់វិធានការតាមនីតិវិធីច្បាប់៕
Source: Kampuchea Thmey Daily
0 Comments