ឧត្តរមានជ័យ ៖ ផែននគរបាលព្រហ្មទណ្ឌ បានទទួលព័ត៌មានថា មានមនុស្សដេកស្លាប់នៅលើគ្រែក្រោមផ្ទះ កាលពីវេលាម៉ោង១២និង០០នាទី ថ្ងៃទី២២ ខែមករា ឆ្នាំ២០១៩ ស្ថិតនៅក្នុងភូមិកណ្តែក សង្កាត់សំរោង ក្រុងសំរោង ខេត្តឧត្តរមានជ័យ។
សមត្ថកិច្ចបានឲ្យដឹងថា សាកសពដែលស្លាប់នោះ ឈ្មោះ ខ្លម ឃួន ភេទប្រុស អាយុ៦១ឆ្នាំ មានទីលំនៅភូមិ សង្កាត់ខាងលើ ជានិវត្តន៍ជន។
ក្រោយទទួលព័ត៌មាន លោកឧត្ដមសេនីយ៍ត្រី ឡឹក សុខា ស្នងការរងទទួលផ្នែកព្រហ្មទណ្ឌ បានចាត់កម្លាំងជំនាញការិយាល័យបច្ចេកទេសសហការជាមួយកម្លាំងក្រុង និងបានស្នើសុំគ្រូពេទ្យបង្អែកខេត្ត ចុះដល់កន្លែងកើតហេតុធ្វើការត្រួតពិនិត្យសាកសព។
សមត្ថកិច្ចបានបន្តទៀតថា ស្ថានភាពកន្លែងកើតហេតុ ស្ថិតនៅលើគ្រែក្រោមផ្ទះឈើ បែរមុខទៅទិសខាងកើត តាមបណ្ដោយផ្លូវជាតិលេខ៦៨ ស្ថិតក្នុងភូមិកណ្តែក សង្កាត់-ក្រុងសំរោង។
ស្ថានភាពសាកសព ស្លៀកខោក្រណាត់ជើងវែង ពណ៌ត្រេអ៊ី អត់ពាក់អាវ ផ្នែកក្បាល និងដងខ្លួន ពុំមានស្លាស្នាម របួសទេ មិនមានអ្វីគួរឲ្យសង្ស័យពាក់ព័ន្ធនឹងបទល្មើសនោះទេ។ មានស្នាមឈាមនៅខ្នង, ខ្លួនឡើងរឹង និងមានធុំក្លិនតិចៗ។
តាមការបំភ្លឺពី ឈ្មោះ អាន សារិន ភេទស្រី អាយុ៣០ឆ្នាំ (ជាកូនស្រីរបស់សាកសព) មានទីលំនៅផ្ទះកើតហេតុ បានឲ្យដឹងថា នៅថ្ងៃទី២១ ខែមករា ឆ្នាំ២០ ១៩ វេលាម៉ោងប្រហែល២១និង០០នាទីជនរងគ្រោះបានផឹកស្រាស្រវឹង (ជាទម្លាប់តែងតែផឹកស្រារាល់ថ្ងៃ) ហើយបានដើរទៅមើលម៉ូតូបុកគោនៅតាមផ្លូវមុខផ្ទះ ពេលនោះ ឈ្មោះ អាន សារិន ដែលកំពុងលក់ដូរអីវ៉ាន់នៅតូបមុខផ្ទះ ក៏បានដេញឪពុកឲ្យទៅសម្រាកនៅលើគ្រែក្រោមផ្ទះ (ជាកន្លែងគាត់ដេករាល់ថ្ងៃ) លុះនៅម៉ោងប្រហែល ២២និង០០នាទី ក្នុងពេល ឈ្មោះ អាន សារិន កំពុងដេកនៅក្នុងតូបជាមួយកូនតូច ស្រាប់តែឪពុកដើរមកប្រលែងជាមួយចៅស្រី ហើយក៏ទៅសម្រាកកន្លែងគាត់វិញ លុះស្អែកឡើង ថ្ងៃទី២២ ខែមករាឆ្នាំ២០១៩ ម៉ោងប្រហែល០៧និង០០នាទី ឈ្មោះ អាន សារិន បានប្រើកូនស្រី ឈ្មោះ មុត រក្សា អាយុ០៧ឆ្នាំ ឲ្យទៅដាស់តា ពេលនោះកូនស្រីបានដើរមកវិញ ហើយប្រាប់ថា តាអត់ក្រោកទេ បន្ទាប់ឈ្មោះ អាន សារិន ក៏ដើរទៅដឹកគោយកទៅចង និងបន្តធ្វើកិច្ចការងារផ្ទះ, លក់ដូរ ដោយមិនបានចាប់អារម្មណ៍នឹងឪពុកដែលសម្រាកយូរនោះទេ រហូតដល់ម៉ោងប្រហែល១១និង៣០នាទី មានឈ្មោះ រៀន រួម ភេទស្រី អាយុ៧៤ឆ្នាំ (ជាម្តាយក្មេករបស់សាកសព) មានផ្ទះនៅខាងក្រោយ បានដើរមកលេង និងបានទៅដាស់សាកសព រួចក៏ស្រែកឆោឡោតែម្តងទៅ។
តាមការសន្និដ្ឋានរបស់ពេទ្យ និងកម្លាំងជំនាញ ជនរងគ្រោះបានស្លាប់ដោយសារគាំងបេះដូង។ក្រោយពិនិត្យទីកន្លែងកើតហេតុ និងសាកសពរួច កម្លាំងជំនាញបានធ្វើកំណត់ហេតុប្រគល់សពជូនទៅសាច់ញាតិយកទៅធ្វើបុណ្យតាមប្រពៃណី៕
Source: Kampuchea Thmey Daily
0 Comments