កំពង់ចាម ៖ រងើកភ្លើងអុសដែលក្មេងៗដុតក្តាមខ្យង ឬកន្ទុយបារីដែលគេបានគ្រវាត់ចោលនៅលើគំនរស្មៅដ៏ក្រាស់ បានបង្កទៅជាអគ្គិភ័យ ឆាបឆេះរាលដាលធ្វើឲ្យប្រជាពលរដ្ឋមានទីលំនៅជុំវិញកន្លែងកើតហេតុមានការភ័យខ្លាចឆេះលំនៅដ្ឋានរបស់គាត់ ហើយបានធ្វើឲ្យសមត្ថកិច្ចចុះទៅអន្តរាគមន៍ទាំងយប់។
ជាកស្តែងនៅថ្ងៃទី២៣ ខែមករា ឆ្នាំ២០១៨ វេលាម៉ោង២៣និង០០នាទី មានអគ្គិភ័យឆេះព្រៃនៅក្នុងបឹងកុក ស្ថិតនៅភូមិមេម៉ាយ សង្កាត់បឹងកុក ក្រុងកំពង់ចាម ខេត្តកំពង់ចាម។
លោកវរសេនីយ៍ទោ អ៊ឹង ប៊ុន អធិការនគរបាលក្រុងកំពង់ចាមបានឲ្យដឹងថា ក្រោយទទួលព័ត៌មានពីប្រជាពលរដ្ឋ និងមានបញ្ជាផ្ទាល់ ពីលោកឧត្ដមសេនីយ៍ទោ ឯម កុសល ស្នងការនគរបាលខេត្ត កំពង់ចាមភ្លាម លោក អ៊ឹង ប៊ុន បានដឹកនាំកម្លាំងនគរបាលក្រុងកំពង់ចាម កម្លាំងប៉ុស្តិ៍រដ្ឋបាល បឹងកុក សហការជាមួយកម្លាំងការិយាល័យបង្ការពន្លត់អគ្គិភ័យខេត្ត ដឹកនាំដោយលោកវរសេនីយ៍ឯក យ៉ន ឌីន នាយការិយាល័យបង្ការពន្លត់អគ្គិភ័យខេត្ត និង កម្លាំងប្រជាការពារសង្កាត់បឹងកុក ចុះពន្លត់ទាន់ពេលវេលា។
លោកអធិការបានបញ្ជាក់ថា ករណីនេះ មិនបណ្តាលឲ្យខូចខាតដល់ផ្ទះសំបែងប្រជាពលរដ្ឋឡើយ និងមិនប៉ះពាល់ដល់អាយុជីវិតមនុស្សទេ គឺកម្លាំងចម្រុះ បានសហការចុះអន្តរាគមន៍ទាន់ពេលវេលា ខណៈដែលអគ្គិភ័យមិនទាន់ឆេះរាលដាលដល់ផ្ទះរបស់ប្រជាពលរដ្ឋ។
លោកបានបញ្ជាក់ថា ក្នុងកិច្ចប្រតិបត្តិការពន្លត់អគ្គិភ័យនេះ សមត្ថកិច្ចបានប្រើប្រាស់រថយន្តពន្លត់ចំនួន០២គ្រឿង ទើបរលត់អស់។
លោកអធិការបានបន្តថា អគ្គិភ័យកើតឡើងនៅលើគំនរស្មៅ ក្នុងបឹងកុកនេះ បានកើតឡើងម្តងហើយ ម្តងទៀត ដែលបង្កឡើងដោយក្មេងៗមកលេងលើបឹងកុកនេះ ហើយដុតក្តាម ខ្យង រួចមិនបានពន្លត់ទុក ឲ្យឆេះរាលដាល បង្កការភ័យខ្លាចដល់ប្រជាពលរដ្ឋ ពេលខ្លះ បង្កមកពីកន្ទុយបារីដែលបងប្អូនបានបោះចោលដោយមិនពន្លត់ជាមុនសិន។
លោកអធិការ បានសំណូមពរដល់បងប្អូនប្រជាពលរដ្ឋ សូមមេត្តាប្រុងប្រយ័ត្នខ្ពស់ ហើយហាមកូនចៅមិនឲ្យដុតភ្លើងនៅលើបឹងកុកនេះ ព្រោះវានឹងបង្កអគ្គិភ័យ ដូចករណីខាងលើនេះ។
លោកអធិការបានបញ្ជាក់ថា នៅលើផ្ទៃបឹងកុកនេះ មានស្មៅដុះក្រាស់តាំងពីសម័យមុន ហើយមនុស្សអាចដើរលើកម្រាស់ស្មៅនេះ ដោយមិនលិចឡើយ៕
Source: Kampuchea Thmey Daily
0 Comments