កម្ពុជាចិន ដាក់ចេញគោលដៅថ្មី ដើម្បីជំរុញទំហំពាណិជ្ជកម្មទ្វេភាគី ឲ្យឈានដល់១០ប៊ីលានដុល្លារនៅឆ្នាំ២០២៣

ភ្នំពេញ ៖ នៅព្រឹកថ្ងៃទី២២ ដែលជាថ្ងៃទី៣ នៃការស្នាក់អាស្រ័យបំពេញទស្សនកិច្ចផ្លូវការ នៅទីក្រុងប៉េកាំងសាធារណរដ្ឋប្រជាមានិតចិន សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា លោក ហ៊ូឈុនហ៊័រ (Hu Chun Hau) ឧបនាយករដ្ឋមន្ត្រីចិន, លោកស្រី កាវយ៉ាន (Gao Yan) ប្រធានក្រុមប្រឹក្សាជំរុញអន្តរជាតិចិន អញ្ជើញជាអធិបតីដ៏ខ្ពង់ខ្ពស់ ក្នុងពិធីបើកវេទិកា ស្ដីពីការជំរុញពាណិជ្ជកម្ម និងវិនិយោគកម្ពុជា-ចិន។

ពិធីដ៏មានអត្ថន័យនេះ ក៏មានការអញ្ជើញចូលរួមពី លោក លោកស្រី ជាឥស្សរជនជាន់ខ្ពស់រដ្ឋាភិបាលចិន និងគណៈប្រតិភូជាន់ខ្ពស់រាជរដ្ឋាភិបាលកម្ពុជា និងផ្នែកឯកជន នៃប្រទេសទាំងពីរប្រមាណ៧០០នាក់។

លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មមានប្រសាសន៍ថា កម្ពុជាចិន បានរៀបចំវេទិកាជំរុញពាណិជ្ជកម្មកម្ពុជាចិនចំនួន៩លើករួចមក ក្នុងប្រទេសចិន ជាមួយគ្នានេះ លើទំនាក់ទំនង និងកិច្ចសហប្រតិបត្តិការទ្វេភាគីកម្ពុជា-ចិន បានបង្កើតមជ្ឈមណ្ឌលពាណិជ្ជកម្មកម្ពុជាចំនួន៤ នៅទីក្រុងមួយចំនួន នៃប្រទេសចិន រួមទាំងការចុះហត្ថលេខាលើកិច្ចព្រមព្រៀង និងអនុស្សរណៈជាច្រើន ក្នុងការជំរុញពាណិជ្ជកម្ម និងការវិនិយោគ នៃប្រទេសទាំងពីរកម្ពុជាចិន។

លោក ហ៊ូ ឈុនហ៊័រ ឧបនាយករដ្ឋមន្ត្រីចិនមានប្រសាសន៍ថា នៅក្នុងកិច្ចខិតខំប្រឹងប្រែងរួមគ្នាភាគីទាំងពីរចិនកម្ពុជា កំពុងឈានចូលយុគសម័យថ្មី នៃការលើកកម្ពស់គុណភាពកិច្ចសហប្រតិបត្តិការសេដ្ឋកិច្ចពាណិជ្ជកម្មដោយទទួលបាននូវមហាសមិទ្ធផលដ៏ស្ដុកស្ដម្ភ។

ក្នុងនោះ ទី១-ពាណិជ្ជកម្មទ្វេភាគី បានកើនឡើងយ៉ាងលឿន ពោលគឺចាប់តាំងពីឆ្នាំ២០១២ មកដល់បច្ចុប្បន្នចិន គឺជាដៃគូពាណិជ្ជកម្មធំទី១របស់កម្ពុជា។ ឆ្នាំ២០១៨ ទំហំពាណិជ្ជកម្ម នៃប្រទេសទាំងពីរជាង៥ពាន់លានដុល្លារចិន គឺជាទីផ្សារធំបំផុតសម្រាប់ប្រទេសកម្ពុជា ក្នុងការទទួលការនាំចូលអង្ករនិងផ្លែឈើ។

លោកឧបនាយករដ្ឋមន្ត្រីមានប្រសាសន៍បន្តថា កិច្ចសហប្រតិបត្តិការខាងវិនិយោគ ក៏ទទួលបាននូវភាពហ្នឹងន ពោល គឺចិនជាប្រទេស នៃលំហូរវិនិយោគធំបំផុតសម្រាប់កម្ពុជា គិតមកដល់បច្ចុប្បន្នភាគីចិន បានបណ្តាក់ទុនវិនិយោគប្រមាណ៨ពាន់លានដុល្លារ ដែលពាក់ព័ន្ធនឹងវិស័យអគ្គិសនីធនធានរ៉ែវាយនភណ្ឌទូរគមនាគមន៍ និងកសិកម្មជាដើម។

លោកឧបនាយករដ្ឋមន្ត្រីមានប្រសាសន៍សង្កត់ធ្ងន់ថា តំបន់សេដ្ឋកិច្ចពិសេសក្រុងព្រះសីហនុ ក៏ទទួលបាននូវភាពទាក់ទាញពីអ្នកវិនិយោគមកពី១៣០ប្រទេស លើពិភពលោក និងផ្តល់នូវទីផ្សារការងារជាង២ម៉ឺននាក់ សម្រាប់តំបន់សេដ្ឋកិច្ចពិសេសខេត្តព្រះសីហនុ។

លោកឧបនាយករដ្ឋមន្ត្រីមានប្រសាសន៍ដែរថា ការកសាងហេដ្ឋារចនាសម្ព័ន្ធក្នុងប្រទេសមានការកើនឡើងខ្ពស់ក្នុងប្រទេសកម្ពុជា។

ថ្លែងសុន្ទរកថាគន្លឹះក្នុងពិធីបើកវេទិកា ស្តីពីការជំរុញ និងវិនិយោគកម្ពុជា-ចិន សម្តេចតេជោនាយករដ្ឋមន្ត្រីមានប្រសាសន៍ថា ក្នុងនាមរាជរដ្ឋាភិបាល និងប្រជាជនកម្ពុជា សម្តេចសូមចូលរួមអបអរសាទរចំពោះរដ្ឋាភិបាលចិន ក្នុងឱកាសខួបលើកទី៤០ នៃកំណែទម្រង់ និងការបើកទូលាយរបស់ប្រទេសចិន ដែលបានធ្វើឲ្យប្រទេសចិនសម្រេចបាននូវសមិទ្ធផលយ៉ាងធំធេង លើគ្រប់វិស័យនិងក្លាយជាមហាអំណាចសេដ្ឋកិច្ចទី២ ក្នុងសកលលោក។

ជាមួយគ្នានេះ សម្ដេចតេជោនាយករដ្ឋមន្ត្រី បានគាំទ្រ និងវាយតម្លៃខ្ពស់ចំពោះការដាក់ចេញ និងអនុវត្តនូវគំនិតផ្ដួចផ្ដើមខ្សែក្រវាត់មួយផ្លូវមួយរបស់ លោក ស៊ីជីនពីង សំដៅបង្កើនភាពតភ្ជាប់ និងកិច្ចសហប្រតិបត្តិការរវាងបណ្តាប្រទេសជាដៃគូ។

សម្តេចតេជោនាយករដ្ឋមន្ត្រី បានធ្វើការគូសបញ្ជាក់ដែរថា កិច្ចសហប្រតិបត្តិការទ្វេភាគីរវាងប្រទេសយើងទាំងពីរមានការរីកចម្រើនគួរជាទីមោទនៈ ទាំងផ្នែកនយោបាយសេដ្ឋកិច្ច និងសង្គម ដែលត្រូវបានឆ្លុះបញ្ចាំងតាមរយៈដំណើរទស្សនកិច្ចទៅវិញទៅមកកាន់តែញឹកញាប់របស់ថ្នាក់ដឹកនាំ នៃប្រទេសទាំងពីរកំណើនពាណិជ្ជកម្មវិនិយោគទេសចរណ៍ និងកំណើន នៃការប្រាស្រ័យទាក់ទងរវាងប្រជាជន និងប្រជាជន។

សម្តេចតេជោនាយករដ្ឋមន្ត្រី បានថ្លែងដែរថា កាលពីឆ្នាំ២០១៧កន្លងទៅ ទំហំពាណិជ្ជកម្ម នៃប្រទេសទាំងពីរ សម្រេចបានប្រមាណ៦ប៊ីលានដុល្លារ ហើយផ្តើមចេញពីលទ្ធផលផ្លែផ្កា ដែលបានអនុវត្តក្នុងឆ្នាំ២០១៧ ប្រទេសទាំងពីរបានដាក់ចេញនូវគោលដៅថ្មីទៀត ដើម្បីជំរុញទំហំពាណិជ្ជកម្មទ្វេភាគីឲ្យឈានដល់១០ប៊ីលានដុល្លារអាមេរិក នៅឆ្នាំ២០២៣។ បន្ថែមពីនេះ កម្ពុជា បានបន្តធ្វើកិច្ចសហប្រតិបត្តិការជាមួយប្រទេសចិន លើវិស័យនានា ទាក់ទងនឹងវិស័យពាណិជ្ជកម្មដូចជា បង្កើតមជ្ឈមណ្ឌលពាណិជ្ជកម្មកម្ពុជានៅក្នុងទីក្រុងមួយចំនួន នៃប្រទេសចិន ការចុះហត្ថលេខាលើលិខិតប្ដូរសារ ដែលបានផ្តល់ឲ្យកម្ពុជានូវប្រព្រឹត្តកម្មមិនជាប់ពន្ធគយគ្រប់ដណ្ដប់លើ៩៧% នៃបន្ទាត់ពន្ធគយសរុប និងការចុះហត្ថលេខាលើអនុស្សរណៈ នៃការយោគយល់គ្នាមួយចំនួនក្នុងវិស័យពាណិជ្ជកម្ម។

ទំហំវិនិយោគបានស្ទុះឡើងរហូតដល់ប្រមាណ៦,៨ប៊ីលានដុល្លារ កើនប្រមាណ៧% ប្រៀបនឹងឆ្នាំ២០១៧ ក្នុងនោះ ប្រទេសចិន បន្តស្ថិតនៅជាប្រទេសនាំមុខដែលបានបណ្តាក់ទុនវិនិយោគធំជាងគេបង្អស់នៅកម្ពុជា ក្នុងឆ្នាំ២០១៨ ដែលមានទំហំទុនវិនិយោគ សរុបប្រមាណ៣,៦ប៊ីលានដុល្លារ ស្មើនឹង៥៣% នៃទំហំវិនិយោគសរុប ពោលគឺកើនឡើងប្រមាណ៥៤% ធៀបនឹងឆ្នាំ២០១៧។

សម្តេចតេជោនាយករដ្ឋមន្ត្រីបានគូសបញ្ជាក់ដែរថា បន្ទាប់ពីកម្ពុជាសម្រេចបាននូវសុខសន្តិភាពយ៉ាងពេញលេញ ព្រមទាំងការឯកភាពជាតិ និងឯកភាពទឹកដីទាំងស្រុង នៅចុងឆ្នាំ១៩៩៨ តាមរយៈការដាក់ចេញ និងអនុវត្តន៍នូវនយោបាយឈ្នះឈ្នះរយៈពេលជាង២ទសវត្សរ៍កន្លងមកនេះ កម្ពុជាត្រូវបានគេទទួលស្គាល់ថា មានការផ្លាស់ប្ដូរយ៉ាងប្រសើរ ទាំងទិដ្ឋភាពនយោបាយសន្តិសុខសេដ្ឋកិច្ចនិងសង្គម ជាមួយនឹងអត្រា នៃកំណើនសេដ្ឋកិច្ចប្រចាំឆ្នាំជាមធ្យម៧%។

កំណើនសេដ្ឋកិច្ចខ្ពស់នេះ បានធ្វើឲ្យកម្ពុជា សម្រេចបានឋានៈជាប្រទេសមានចំណូលមធ្យមកម្រិតទាបនៅឆ្នាំ២០១៥ និងស្ថិតនៅលើគន្លង នៃការឈានទៅសម្រេចបាននូវឋានៈ នៃប្រទេសមានចំណូលមធ្យមកម្រិតខ្ពស់នៅត្រឹមឆ្នាំ២០៣០ និងជាប្រទេសមានចំណូលខ្ពស់ នៅឆ្នាំ២០៥០។

សម្តេចតេជោនាយករដ្ឋមន្ត្រី មានប្រសាសន៍សង្កត់ធ្ងន់ថា ដើម្បីសម្រេចបាននូវគោលដៅខាងលើនិងស្របតាមយុទ្ធសាស្ត្រចតុកោណដំណាក់កាលទី៤ ដែលជារបៀបវារៈគោលនយោបាយសង្គមសេដ្ឋកិច្ច នៃកម្មវិធីនយោបាយរបស់រាជរដ្ឋាភិបាលនីតិកាលទី៦ នៃរដ្ឋសភារាជរដ្ឋាភិបាលកម្ពុជាបានដាក់ចេញ និងកំពុងអនុវត្តន៍គោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ ដែលជាយុទ្ធសាស្ត្រកំណើនសេដ្ឋកិច្ចថ្មី សំដៅធ្វើពិពិធកម្មសេដ្ឋកិច្ច និងកែប្រែរចនាសម្ព័ន្ធឧស្សាហកម្មកម្ពុជា ពីឧស្សាហកម្មអតិពលកម្ម ទៅជាឧស្សាហកម្មផ្អែកលើជំនាញ ត្រឹមឆ្នាំ២០២៥ដែលគោលនយោបាយនេះ មានភាពស៊ីសង្វាក់គ្នាជាមួយនឹងគំនិតផ្ដួចផ្ដើមខ្សែក្រវាត់មួយផ្លូវមួយ។

សម្ដេចតេជោនាយករដ្ឋមន្ត្រី បានធ្វើការសង្កត់ធ្ងន់ថា ក្នុងស្មារតី នៃការធ្វើកំណែទម្រង់ស៊ីជម្រៅផ្ទៃក្នុង ដើម្បីបង្កើនភាពប្រកួតប្រជែង និងធានាបាននូវឯករាជ្យភាពផ្នែកសេដ្ឋកិច្ច ក្នុងឋានៈជាប្រទេសអធិបតេយ្យពេញលេញរាជរដ្ឋាភិបាលកម្ពុជា បាននិងកំពុងអនុវត្តនូវអភិក្រមចំនួន៥រួមមាន ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់ ក្រោមបាវចនាចំនួន២ គឺការកែទម្រង់ខាងក្នុង និងការបង្កើនមិត្តខាងក្រៅ ក្នុងស្មារតីឯករាជ្យ។

សម្តេចបានបន្តថា សម្តេចបានសម្រេចធ្វើកំណែទម្រង់ស៊ីជម្រៅលើប្រព័ន្ធសេដ្ឋកិច្ចផ្ទៃក្នុងតាមរយៈការដាក់ចេញ និងអនុវត្តន៍នូវវិធានការថ្មីមួយ គឺការរក្សាទុកតែភ្នាក់ងារគយប៉ុណ្ណោះ ក្នុងការត្រួតពិនិត្យទំនិញនៅតាមច្រកទ្វារអន្តរជាតិ ច្រកទ្វារព្រំដែនអន្តរជាតិ ច្រកទ្វារព្រំដែនទ្វេភាគី ច្រកទ្វារតំបន់ព្រំដែន និងច្រកទ្វារកំពង់ផែសមុទ្រតំបន់សេដ្ឋកិច្ចពិសេស ទីកន្លែងសន្និធិគយបណ្ដោះអាសន្ននិងទីកន្លែងត្រួតពិនិត្យទំនិញនាំចេញនាំចូលផ្សេងទៀត។

សម្តេចបន្តថា ការសម្រេចបែបនេះ គឺជាការអនុវត្តនូវអភិក្រមវះកាត់ដែលជាការកែទម្រង់ដ៏ធំសម្បើមមួយរបស់កម្ពុជា ដើម្បីកាត់បន្ថយភាពស្មុគស្មាញ និងថ្លៃដើមក្នុងការធ្វើពាណិជ្ជកម្ម សំដៅធ្វើឲ្យកាន់តែល្អប្រសើរនូវបរិយាកាសអំណោយផលសម្រាប់ធុរកិច្ច និងការវិនិយោគ និងការលើកកម្ពស់សមត្ថភាពប្រកួតប្រជែងរបស់កម្ពុជា។

ជាមួយនឹងវិធានការជាក់ស្ដែងមួយចំនួនក្នុងការធានាដល់ការវិនិយោគរបស់បរទេសក្នុងប្រទេសកម្ពុជា សម្តេចតេជោនាយករដ្ឋមន្ត្រីមានប្រសាសន៍លើកឡើងពីវិធានការមុតស្រួច និងជាក់ស្តែងដែលរាជរដ្ឋាភិបាលបានដាក់ចេញក្នុងនោះ ទី១-ភាពអំណោយផល នៃស្ថិរភាពនយោបាយ និងម៉ាក្រូសេដ្ឋកិច្ច,ទី២-ការបើកចំហសេដ្ឋកិច្ចសម្រាប់អ្នកវិនិយោគទាំងអស់ ដោយគ្មានការរើសអើងរវាងអ្នកវិនិយោគកម្ពុជា និងអ្នកវិនិយោគបរទេសនោះទេ,ទី៣-កម្លាំងពលកម្ម ដែលមានភាពសំបូរបែប និងវ័យក្មេង ដែលក្នុងនោះប្រជាជនដែលមានអាយុ៣៥ឆ្នាំ ចុះមានចំនួនដល់ទៅ៧២% នៃចំនួនប្រជាជនសរុប គួបផ្សំនឹងប្រាក់ឈ្នួលដែលមានភាពប្រកួតប្រជែង ,ទី៤-កម្ពុជា ស្ថិតនៅលើទីតាំងយុទ្ធសាស្ត្រក្នុងតំបន់អាស៊ាន ដែលតំបន់នេះបាននិងកំពុងក្លាយជារោងចក្រ នៃអាស៊ី។ ទំនិញផលិតនៅកម្ពុជា អាចផ្គត់ផ្គង់ទីផ្សារក្នុងស្រុក ទីផ្សារអនុតំបន់មេគង្គ ទីផ្សារអាស៊ាន និងទីផ្សារដទៃទៀតក្នុងពិភពលោក និងទី៥-កម្ពុជាចិន មានកិច្ចព្រមព្រៀងជាមួយគ្នាជាច្រើន ដែលជួយជំរុញ និងផ្តល់អត្ថប្រយោជន៍យ៉ាងសំបូរបែបជូនដល់ធុរជន និងអ្នកវិនិយោគិនចិន ទាំងការលើកទឹកចិត្ត និងការធានាការវិនិយោគ៕