ភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នៅព្រឹកថ្ងៃទី ១៨ ខែមករា ឆ្នាំ២០១៩នេះបានបង្ហោះសារជូនជនរួមជាតិដោយបានគូសបញ្ជាក់ពីតម្លៃនៃសុខសន្តិភាព ដែលបាននាំប្រទេសជាតិឲ្យមានការអភិវឌ្ឍរីកចម្រើនដូចសព្វថ្ងៃនេះ។
ជាមួយនេះ សម្តេចតេជោ ហ៊ុន សែន ក៏បានអរគុណបងប្អូនជនរួមជាតិនិងគណបក្សនយោបាយទាំងអស់ដែលបានចូលរួមថែរក្សាសន្តិភាពដើម្បីឲ្យកម្ពុជាមានឱកាសអភិវឌ្ឍន៍ប្រទេសជាតិឲ្យកាន់តែរីកចម្រើន។
សម្តេចតេជោ ហ៊ុន សែន បានលើកឡើងទៀតថា ដោយសារតែប្រទេសកម្ពុជាយើងមានសុខសន្តិភាព និងស្ថិរភាពនយោបាយ នេះហើយទើបធ្វើឲ្យដៃគូពាណិជ្ជករ វិនិយោគិន និងសហគមន៍អន្តរជាតិមានជំនឿទុកចិត្តយ៉ាងខ្លាំង មកលើការដឹកនាំរបស់កម្ពុជា។
ជាក់ស្តែងកម្ពុជាក៏ចាប់ផ្តើមទទួលធ្វើជាម្ចាស់ផ្ទះនៃវេទិកានិងកិច្ចប្រជុំលំដាប់អន្តរជាតិជាច្រើនបន្តបន្ទាប់ រួមទាំងកិច្ចប្រជុំនៃវេទិកាអាស៊ីប៉ាស៊ីហ្វិកលើ កទី២៧(APPF-27) និង ការប្រកាសបើកជាផ្លូវការនៃក្រុមប្រឹក្សាវប្បធម៌អាស៊ី (ACC) កាលពីប៉ុន្មានថ្ងៃទៅនេះនៅលើទឹកដីកម្ពុជាប្រកបដោយជោគជ័យ។
សម្តេចតេជោនាយករដ្ឋមន្ត្រីបានសរសេរនៅក្នុងបណ្តាញសង្គមផ្លូវការរបស់សម្តេចថា «សុខសប្បាយជាទេបងប្អូនជនរួមជាតិ?មួយរយៈកាលកន្លង ទៅនេះប្រទេសក្នុងតំបន់និងពិភពលោកបានឃើញកម្ពុជាមានការរីកចម្រើនខ្លាំងទៅមុខគួរឲ្យកត់សម្គាល់ហើយពួកគេបានកោតសរសើរអំពីវឌ្ឍនភាពដ៏ឆាប់រហ័សរបស់កម្ពុជាយើង។ ទន្ទឹមនឹងនោះដែរ កម្ពុជាក៏ចាប់ផ្តើមទទួលធ្វើជាម្ចាស់ផ្ទះនៃវេទិកា និង កិច្ចប្រជុំលំដាប់អន្តរជាតិ ជាច្រើនបន្ត បន្ទាប់ រួមទាំងកិច្ចប្រជុំនៃវេទិកាអាស៊ីប៉ាស៊ីហ្វិកលើកទី២៧(APPF-27)និងការប្រកាសបើកជាផ្លូវការនៃក្រុមប្រឹក្សាវប្បធម៌អាស៊ី (ACC)កាលពី ប៉ុន្មានថ្ងៃទៅនេះ នៅលើទឹកដីកម្ពុជា។ អ្វីដែលយើងអាចធ្វើបាន គឺដោយសារប្រទេសជាតិមានសុខសន្តិភាពនិងស្ថិរភាពនយោបាយ និងសង្គម ជា មួយនឹងលំនឹងនៃកំណើនសេដ្ឋកិច្ចរបស់ជាតិ។
ទាំងអស់នេះហើយ ដែលបានធ្វើឲ្យដៃគូពាណិជ្ជករ វិនិយោគិន និង សហគមន៍អន្តរជាតិមាន ជំនឿទុកចិត្តយ៉ាងខ្លាំងលើការដឹកនាំរបស់កម្ពុជា។ អរគុណបងប្អូនជនរួមជាតិ និងគណបក្សនយោបាយទាំងអស់ ដែលបានចូលរួមថែរក្សាសន្តិភាពដើម្បីកម្ពុជាយើងកាន់តែមានឱកាសអភិវឌ្ឍន៍ប្រទេសជាតិអោយកាន់តែរីកចម្រើន។ ខ្ញុំនិងភរិយាសូមជូនពរបងប្អូនជនរួមជាតិជួបតែសេចក្តីសុខ និងសំណាងល្អគ្រប់ៗគ្នា»។
រយៈពេល២០ឆ្នាំ ក្រោមដំបូលនៃសុខសន្តិភាពកន្លងផុតមកនេះ គឺជាឱកាសមាសដែលផ្តល់ឲ្យកម្ពុជាបានកសាងប្រទេសរបស់ខ្លួន ធ្វើឲ្យសេដ្ឋកិច្ច ជាតិមានការរីកចម្រើន ដែលធ្វើឲ្យកម្ពុជាបានឆ្លងផុតពីប្រទេសដែលមានប្រាក់ចំណូលទាប ទៅជាប្រទេសដែលមានប្រាក់ចំណូលមធ្យមកម្រិតទាប។ ឆ្នាំ១៩៩៨ប្រាក់ចំណូលរបស់ប្រជាជនកម្ពុជានៅពេលនោះមានប្រហែលជា២០០ដុល្លារ ឬ ក្រោម២០០ដុល្លារបន្ដិច ប៉ុន្ដែ២០ឆ្នាំក្រោយប្រជាជនកម្ពុជាម្នាក់មានប្រាក់ចំណូលរហូតទៅដល់ ១៦០៧ដុល្លារក្នុងម្នាក់។ នេះជាជោគជ័យធំសម្បើមរបស់ប្រជាជនកម្ពុជាហើយរាជរដ្ឋាភិបាលមាន មហិច្ឆតារុញប្រទេសឲ្យក្លាយជាប្រទេសដែលមានប្រាក់ចំណូលមធ្យមកម្រិតខ្ពស់នៅឆ្នាំ ២០៣០និងក្លាយទៅជាប្រទេសដែលមានប្រាក់ចំណូលខ្ពស់ នៅឆ្នាំ ២០៥០។
រាជរដ្ឋាភិបាលបានដាក់ចេញនូវចក្ខុវិស័យនេះ ដើម្បីធ្វើជាផែនទីចង្អុលផ្លូវសម្រាប់នាំប្រទេសឈានឡើង។ តែដើម្បីសម្រេចមហិច្ឆតា ដែលនាំប្រទេសទៅជាប្រទេសមានប្រាក់ចំណូលខ្ពស់គឺតម្រូវឲ្យមានសន្ដិភាពដាច់ខាត៕
Source: Kampuchea Thmey Daily
0 Comments