ជនបរទេស​ម្នាក់ ដាច់​បាយ​ ត្រូវ​នគរបាល​ក្រុង​កំពង់ចាម​ និង​ម្ចាស់​សណ្ឋាគារ​មេគង្គ​ ជួយ​សង្គ្រោះ

កំពង់ចាម​ ៖​ ទេសចរណ៍​ជនជាតិ​អាមេរិក​ម្នាក់ ​ត្រូវ​គេ​ប្រទះឃើញ​ក្នុង​សភាព​ហេវ​ហត់​ខ្លាំង​ ស្ទើរ​ដើរ​មិន​រួច​ នៅ​ម្តុំ​មាត់ទន្លេ​មេគង្គ​ ក្រុង​កំពង់ចាម ហើយ​ត្រូវបាន​កម្លាំង​នគរបាល​ក្រុង​កំពង់ចាម​ និង​ម្ចាស់​សណ្ឋាគារ​មេគង្គ​ជួយសង្គ្រោះ​ រួច​បញ្ជូន​ទៅ​ស្ថានទូត​អាមេរិក​នៅ​ភ្នំពេញ​។​

លោក​វរសេនីយ៍ទោ ​អ៊ឹង ប៊ុន អធិការ​នគរបាល​ក្រុង​កំពង់ចាម​បាន​ឲ្យ​ដឹង​ថា ជនបរទេស​ខាង​លើ​នេះ​ឈ្មោះ ​HEINRCKDANIEL STEPHAN ភេទ​ប្រុស ​កើត​ថ្ងៃ​ទី​២២.៧.១៩៤១ ជនជាតិ​អាមេរិក​កាំង​លិខិត​ឆ្លងដែន​លេខ​584004683 កាន់​ទិដ្ឋាការ​លេខ​TI 00492938 (ទេសចរណ៍​)។​

លោក​អធិការ​បាន​បន្ត​ថា ​ក្រោយពេល​ជួប​ជនបរទេស​នេះ​រួច សមត្ថកិច្ច​បាន​យក​គាត់​ឲ្យ​សម្រាក​ក្នុង​សណ្ឋាគារ​មេគង្គ​ និង​ផ្តល់​អាហារ​ឲ្យ​គាត់​ហូប​ឆ្អែត​ តាម​តម្រូវការ​របស់​គាត់​ ជា​ជនបរទេស​។​

នៅ​ថ្ងៃទី​១៥​ ខែ​មករា ​ឆ្នាំ​២០១៩ លោក អ៊ឹង ប៊ុន បាន​ទំនាក់ទំនង​ទៅ​ស្ថានទូត​អាមេរិក​ប្រចាំ​កម្ពុជា​នៅ​រាជធានី​ភ្នំពេញ​។​

ក្រោយ​ទទួលបាន​ការជូនដំណឹង​នេះ​រួចហើយ ខាង​ស្ថានទូត​អាមេរិក ​បាន​សំណូមពរ​ឲ្យ​សមត្ថកិច្ច​បញ្ជូន​ជនបរទេស​ខាងលើ​ទៅ​ភ្នំពេញ ដោយ​ខាង​ស្ថានទូត​រង់ចាំ​ទទួល​នៅមុខ​មន្ទីរពេទ្យ​កាល់ម៉ែត​រាជ​ធានី​ភ្នំពេញ​។​

លោក អ៊ឹង ប៊ុន បាន​បន្តថា​ ដោយ​ឃើញ​ថា ​សុខភាព​ជនបរទេស​នេះ ​មាន​សុខភាព​ល្អ​វិញ​ហើយ សមត្ថកិច្ច​ក៏បាន​នាំ​ទេសចរ​អាមេរិក​ខាងលើនេះ ​ឡើង​រថយន្ត​ទៅ​ភ្នំពេញ ​និង​ជូន​ថវិកា​១៥​ដុល្លារ​សម្រាប់​ចាយវាយ​តាម​ផ្លូវ​។​

លោក STEPHEN បាន​សំដែង​សេចក្ដីត្រេកអរ​ដល់​នគរបាល​ក្រុង​កំពង់ចាម​ ដែល​បាន​សង្គ្រោះ​រូប​គាត់​កំពុង​ធ្លាក់ខ្លួន​។​

ក្នុងនោះដែរ​ លោក អ៊ឹង ប៊ុន បាន​ថ្លែងអំណរគុណ​ដល់​ម្ចាស់​សណ្ឋាគារ​មេគង្គ ដែល​បានផ្តល់​បន្ទប់​ស្នាក់នៅ​ដល់​ទេសចរណ៍​បរទេស​ដោយ​មិន​គិត​ថ្លៃ​។

កាយវិការ​ និង​ទង្វើ​ដ៏​ល្អ​របស់​សមត្ថកិច្ច​នគរបាល​ក្រុង​កំពង់ចាម​ និង​ម្ចាស់​សណ្ឋាគារ​មេគង្គ​ ជា​សប្បុរស​ធម៌ ​និង​ជា​គំរូ​ដល់​បងប្អូន​ប្រជាពលរដ្ឋ ​ព្រមទាំង​សមត្ថកិច្ច​គ្រប់រូប​ ត្រូវ​យក​ធ្វើជា​គំរូ​ ហើយក៏​ជា​មោទនភាព​របស់​ជាតិ​ខ្មែរលើ​ពិភពលោក ​បញ្ជាក់​ថា​ ជាតិ​ខ្មែរ​ជា​ជាតិ​មួយ​ស្លូតត្រង់​ ចេះ​ជួយ​យកអាសា​គ្នា​ដោយ​មិន​ប្រកាន់​ពូជសាសន៍​ ឬ​និន្នាការ​នយោបាយ​ឡើយ​៕​


Source: Kampuchea Thmey Daily