ភ្នំពេញ ៖ លោក ឈឿន ចាន់ថន ហៅ ម៉ៅ ដែលជាអតីតមេអង្គរក្សសម្ដេចអគ្គធម្មពោធិសាល ជា ស៊ីម ត្រូវបានដោះលែងហើយ ក្រោយពីព្រះមហាក្សត្រប្រោសព្រះរាជទានលើកលែងទោស នេះបើតាមព្រះរាជក្រឹត្យ កាលពីខែវិច្ឆិកា ឆ្នាំ២០១៨ ហើយដែលទើបបែកធ្លាយដល់អ្នកសារព័ត៌មាន នៅថ្ងៃទី១៦ ខែមករា ឆ្នាំ២០១៩។
លោក ឈឿន ចាន់ថន ត្រូវតុលាការសម្រេចផ្ដន្ទាទោសដាក់ពន្ធនាគារ១៥ឆ្នាំ ក្រោមការចោទប្រកាន់ចំនួន៥ករណី គឺទី១-ចោទពីបទលក់ដូរ និងក្លែងលិខិតស្នាម, ទី២-ចោទពីបទខ្វះស្មារតីទទួលខុសត្រូវ និងមិនយកចិត្តទុកដាក់ក្នុងភារកិច្ចរបស់ខ្លួន, ទី៣-ចោទពីបទរំលោភលើសេចក្តីទុកចិត្ត, ទី៤-ជាប់ចោទពីបទបំផ្លិចបំផ្លាញ និងកិបកេងសម្បត្តិរដ្ឋយកផ្ទាល់ខ្លួន និងទី៥-ចោទពីបទបំផ្លាញសម្ភារអាចធ្វើឲ្យអន្តរាយដល់ក្រសួងការពារជាតិ និងពិន័យប្រាក់១០លានរៀល ចូលថវិកាជាតិ។
ព្រះរាជក្រឹត្យ ចុះថ្ងៃទី១២ ខែវិច្ឆិកា ឆ្នាំ២០១៨ បានសម្រេចយ៉ាងដូច្នេះថា “ត្រូវបានលើកលែងទោសឲ្យទណ្ឌិតឈ្មោះ ឈឿន ចាន់ថន ហៅ ម៉ៅ ភេទប្រុស អាយុ៤១ឆ្នាំ ពីបទរំលោភលើទំនុកចិត្ត បំផ្លិចបំផ្លាញដោយចេតនា និងគៃបំបាត់ដោយទុច្ចរិត លក់ដូរ និងចែកចាយអាវុធ បំផ្លិចបំផ្លាញសម្ភារៈយោធាសម្រាប់បម្រើការប្រយុទ្ធ និងខ្វះស្មារតីទទួលខុសត្រូវ ក្នុងការដឹកនាំគ្រប់គ្រងអង្គភាព តាមអំណាចសាលដីកាលេខ៣២២ ចុះថ្ងៃទី៩ ខែតុលា ឆ្នាំ២០១៧ របស់តុលាការកំពូល ដែលបានផ្តន្ទាទោសតាមអំណាចសាលដីកាព្រហ្មទណ្ឌលេខ ៦៥ ក្រ IV អ/១២ ខែសីហា ឆ្នាំ២០១៤ របស់សាលាឧទ្ធរណ៍”។
អតីតផ្កាយ៣ ឈឿន ចាន់ថន ត្រូវបានតុលាការចោទប្រកាន់ចំនួន៥បទល្មើស និងដាក់ពន្ធនាគាររយៈពេល១៥ឆ្នាំ។ លោកត្រូវបានកម្លាំងកងរាជអាវុធហត្ថចាប់ខ្លួន កាលពីព្រឹកព្រលឹមថ្ងៃទី១៣ ខែសីហា ឆ្នាំ២០១១ រួមជាមួយអង្គរក្ស៣នាក់ផ្សេងទៀត នៅក្នុងភូមិគ្រឹះរបស់លោក ដែលមានតម្លៃជិត១លានដុល្លារ ស្ថិតនៅផ្ទះលេខ៦៥ ផ្លូវលេខ៩៥ ស្ថិតក្នុងសង្កាត់បឹងកេងកងទី៣ ខណ្ឌចំការមន រាជធានីភ្នំពេញ ហើយការចាប់ខ្លួនបានធ្វើឡើងបន្ទាប់ពីមានព្រះរាជក្រឹត្យ ដកហូតឋានន្តរស័ក្តិ និងតួនាទី ដែលព្រះមហាក្សត្រ ឡាយព្រះហស្តលេខា កាលពីថ្ងៃទី១២ ខែសីហា ឆ្នាំ២០១១។ ជាមួយគ្នា ក៏បានតែងតាំងលោកឧត្តមសេនីយ៍ឯក យឹម លាង ឲ្យទទួលតំណែងជាមេបញ្ជាការកងអង្គរក្សជំនួសលោក ឈឿន ចាន់ថន វិញ៕
Source: Kampuchea Thmey Daily
0 Comments