តំណាងមកពីប្រទេសចំនួន១០០ បានចូលរួមក្នុងពិធីនេះរួមទាំងឯកអគ្គរដ្ឋទូតសហរដ្ឋអាមេរិក ប្រចាំនៅប្រទេសជប៉ុន លោកស្រី Caroline Kennedy និងលោកស្រី Rose Gottemoeller ដែលជាអនុរដ្ឋលេខាធិការសម្រាប់ការគ្រប់គ្រងអាវុធ និងសន្តិសុខអន្តរជាតិរបស់ក្រសួងការបរទេសសហរដ្ឋអាមេរិកផងដែរ។
អ្នកដែលមានវត្តមានទាំងនោះបានរក្សាភាពស្ងៀមស្ងាត់នៅម៉ោង ៨:១៥នាទីព្រឹក (ម៉ោងក្នុងស្រុក) ខណៈពេលដែលគ្រាប់បែកបរមាណូ ត្រូវបានទម្លាក់នៅលើទីក្រុង។
លោកអាបេ បាននិយាយថា ជប៉ុន គឺជាប្រទេសតែមួយគត់ ដែលរងការវាយប្រហារដោយគ្រាប់បែកបរមាណូ។ លោកបានលើកឡើងថា ជប៉ុន មានកាតព្វកិច្ចដើម្បីឲ្យដឹងថា ពិភពលោកគឺគ្មានអាវុធនុយក្លេអ៊ែរ។ លោកបានសន្យាថា រដ្ឋាភិបាលរបស់ប្រទេសជប៉ុន នឹងបន្តធ្វើការឆ្ពោះទៅរកគោលដៅនេះ។ លោកបានបន្ថែមទៀតថា វានឹងក្លាយជាប្រធានបទមួយក្នុងកិច្ចប្រជុំនៃក្រុមរដ្ឋមន្ត្រីការបរទេសចំនួនប្រាំពីរនៅឆ្នាំក្រោយ ដែលនឹងប្រារព្ធឡើងនៅទីក្រុងហ៊ីរ៉ូស៊ីម៉ា។
អភិបាលក្រុងហ៊ីរ៉ូស៊ីម៉ា លោក Kazumi Matsui បានស្នើដល់លោកប្រធានាធិបតីសហរដ្ឋអាមេរិក បារ៉ាក់ អូបាម៉ា ឲ្យមកទស្សនាទីក្រុងនេះ ខណៈលោកស្រី Kennedy មិនបានផ្តល់ការបញ្ចេញមតិ ឬការដាក់កម្រងផ្កាក្នុងអំឡុងពិធីនេះនោះទេ។
ជាផ្នែកមួយនៃពិធីនេះ មនុស្ស៥,៣៥៩នាក់ទៀត ត្រូវបានបន្ថែមក្នុងបញ្ជីឈ្មោះរបស់ជនរងគ្រោះនៃការទម្លាក់គ្រាប់បែកបរមាណូដែលធ្វើឲ្យចំនួនសរុបឡើងដល់២៩៧,៦៨៤នាក់។ ពិធីរំលឹកនេះត្រូវបានចូលរួមដោយមនុស្ស ៥៥,០០០នាក់។
គួរបញ្ជាក់ថា ការវាយប្រហារនៅថ្ងៃទី៦ ខែសីហា ឆ្នាំ១៩៤៥ បានបណ្តាលឲ្យមានមនុស្សស្លាប់ប្រមាណ១៤០,០០០នាក់ នៅក្នុងទីក្រុង ហ៊ីរ៉ូស៊ីម៉ា។ មនុស្សជាង៧០,០០០នាក់ ត្រូវបានសម្លាប់នៅទីក្រុងណាហ្គាសាគី នៅពេលដែលគ្រាប់បែកបរមាណូទីពីរត្រូវបានទម្លាក់នៅទីនោះនៅបីថ្ងៃបន្ទាប់៕
ជប៉ុន ប្រារព្ធពិធីរំលឹកដល់ការទម្លាក់គ្រាប់បែកបរមាណូនៅហ៊ីរ៉ូស៊ីម៉ា
0 Comments