ភ្នំពេញ ៖ លោក Joel Pelicot ប្រធានគណៈកម្មការសហប្រតិបត្តិការអន្តរជាតិទីភ្នាក់ងារទឹកបារាំង បានវាយតម្លៃខ្ពស់ចំពោះភាពរីកចម្រើនលើគ្រប់វិស័យរបស់កម្ពុជា ជាពិសេសលើវិស័យធនធានទឹក និងចំពោះវឌ្ឍនភាព នៃគម្រោងគ្រប់គ្រងធនធានទឹកចម្រុះ នៃអាងស្ទឹងសែនដែលបានអនុវត្ត និងសម្រេចបានរហូតមកដល់ពេលនេះ។
ការកោតសរសើររបស់ លោក Joel Pelicot ធ្វើឡើង នាព្រឹកថ្ងៃពុធ ១១កើត ខែបុស្ស ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១៦ ខែមករា ឆ្នាំ២០១៩ នៅក្នុងជំនួបជាមួយ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម ពិភាក្សាលើការអនុវត្តគម្រោងគ្រប់គ្រងធនធានទឹកចម្រុះនៃអាងស្ទឹងសែន ដែលបានអនុវត្តក្រោមជំនួយរបស់ទីភ្នាក់ងារទឹកបារាំង។
នៅក្នុងកិច្ចពិភាក្សា លោករដ្ឋមន្ត្រី បានថ្លែងអំណរគុណ និងវាយតម្លៃខ្ពស់ចំពោះរដ្ឋាភិបាលបារាំង ដែលបានជួយគាំទ្រដល់ការកសាង និងអភិវឌ្ឍសេដ្ឋកិច្ចកម្ពុជា ឲ្យមានការវិវឌ្ឍន៍រីកចម្រើនជាបន្តបន្ទាប់ និងដោយឡែកសម្រាប់វិស័យធនធានទឹក ដែលជាផ្នែកមួយដ៏សំខាន់ រួមចំណែកទ្រទ្រង់ដល់ការលូតលាស់សេដ្ឋកិច្ចជាតិ នៃកម្ពុជា។
លោករដ្ឋមន្ត្រី បានជម្រាបអំពីសមិទ្ធផល និងការងារដែលក្រសួងសម្រេចបាន និងកំពុងអនុវត្ត និងជាពិសេស ស្ថានភាពអាកាសធាតុដែលកម្ពុជា នឹងទទួលរងឥទ្ធិពលEl Nino ដែលធ្វើឲ្យឡើងកម្ដៅខ្លាំងសម្រាប់រដូវប្រាំង ជាពិសេសក្នុងខែមេសា ឆ្នាំ២០១៩។
លោករដ្ឋមន្ត្រី បានចាត់ទុកការជួយរបស់ទីភ្នាក់ងារទឹកបារាំង សម្រាប់គម្រោងគ្រប់គ្រងធនធានទឹកចម្រុះ នៃអាងស្ទឹងសែន ដែលបាននឹងកំពុងអនុវត្តរហូតមកដល់ពេលនេះ ថាជាការរួមចំណែកដ៏សំខាន់សម្រាប់លើកកម្ពស់ប្រសិទ្ធភាព និងនិរន្តរភាព នៃការអភិវឌ្ឍន៍ និងការគ្រប់គ្រងធនធានទឹកចម្រុះនៅកម្រិតអាង ដែលបច្ចុប្បន្នជាអាទិភាពមួយ ក្នុងចំណោមអាទិភាពជាច្រើនដែលក្រសួងបាននិងកំពុងយកចិត្តទុកដាក់។
ជាការឆ្លើយតប លោក Joel Pelicot ប្រធានគណៈកម្មការសហប្រតិបត្តិការអន្តរជាតិទីភ្នាក់ងារទឹកបារាំង បានវាយតម្លៃខ្ពស់ចំពោះភាពរីកចម្រើនលើគ្រប់វិស័យរបស់កម្ពុជា ជាពិសេសលើវិស័យធនធានទឹក និងចំពោះវឌ្ឍនភាព នៃគម្រោងគ្រប់គ្រងធនធានទឹកចម្រុះ នៃអាងស្ទឹងសែនដែលបានអនុវត្ត និងសម្រេចបានរហូតមកដល់ពេលនេះ។
លោក Joel Pelicot បានវាយតម្លៃថា គម្រោងពិតជាបានឆ្លើយតបទៅនឹងតម្រូវការជាអាទិភាពក្នុងក្របខ័ណ្ឌ នៃវិស័យធនធានទឹក និងបានជម្រាបថា ទីភ្នាក់ងារទឹកបារាំង នឹងពិនិត្យលទ្ធភាពជួយសម្រាប់ការអនុវត្តគម្រោងខាងលើជាបន្តទៀត។
លោករដ្ឋមន្ត្រី បានវាយតម្លៃខ្ពស់ចំពោះការប្ដេជ្ញាបន្តជួយរបស់ភាគីទីភ្នាក់ងារទឹកបារាំង លើវិស័យធនធានទឹកនៅកម្ពុជា ជាពិសេសលើការគ្រប់គ្រង និងអភិវឌ្ឍធនធានទឹកចម្រុះក្នុងកម្រិតអាង ដើម្បីរួមចំណែកធានានូវនិរន្តរភាព នៃធនធាន និងការប្រើប្រាស់សម្រាប់ជាប្រយោជន៍នាពេលបច្ចុប្បន្ន និងទៅអនាគត៕
Source: Kampuchea Thmey Daily
0 Comments