កំពង់ឆ្នាំង ៖ គម្រោងសាងសង់ផ្លូវក្រាលកៅស៊ូAC ៣ខ្សែ មានប្រវែង១.៧០០ម៉ែត្រ នៅក្នុងសង្កាត់ផ្សារឆ្នាំង ក្រុងកំពង់ឆ្នាំង ដែលជាថវិកាជាតិ អនុវត្តគម្រោងដោយមន្ទីរសាធារណការ និងដឹកជញ្ជូនខេត្តកំពង់ឆ្នាំង ដើម្បីសម្រួលការធ្វើចរាចរណ៍ជូនប្រជាពលរដ្ឋ គិតមកដល់ថ្ងៃទី២៦ ខែមករា ឆ្នាំ២០១៩នេះ គឺកសាងបានប្រមាណ៧០%ហើយ។
លោក កែវ ពៅ ប្រធានមន្ទីរសាធារណការ និងដឹកជញ្ជូនខេត្តកំពង់ឆ្នាំងបានឲ្យដឹង នៅព្រឹកថ្ងៃទី២៦ មករា នេះថា ការកសាងផ្លូវក្រាលកៅស៊ូAC ៣ខ្សែ ក្នុងសង្កាត់ផ្សារឆ្នាំង ក្រុងកំពង់ឆ្នាំង មានប្រវែង១.៧០០ម៉ែត្រ ដោយត្រូវចាក់ដីឡើងកម្ពស់០,៦ម៉ែត្រ ក្រាលកៅស៊ូAC កម្រាស់០,០៥ ម៉ែត្រ មានទទឹង៨ម៉ែត្រ ដើម្បីសម្រួលឲ្យប្រជាពលរដ្ឋធ្វើដំណើរ កាត់បន្ថយគ្រោះថ្នាក់ចរាចរណ៍ និងដើម្បីកែលំអសោភ័ណភាពក្រុងកំពង់ឆ្នាំង ស្វាគមន៍ការធ្វើបុណ្យទន្លេនៅក្នុងខែមីនាផងនោះ គឺកសាងបានប្រមាណ៧០ភាគរយហើយ។
លោក កែវ ពៅ បានឲ្យដឹងទៀតថា ថវិកាដែលយកមកកសាងផ្លូវខាងលើនេះ គឺជាថវិការបស់ជាតិ តាមរយៈក្រសួងសាធារណការ និងអនុវត្តគម្រោងដោយមន្ទីរសាធារណការ និងដឹកជញ្ជូនខេត្តកំពង់ឆ្នាំង និងកសាងដោយក្រុមហ៊ុន ឈនសារាណរ ដោយមានការសហការ និងចូលរួមពីប្រជាពលរដ្ឋនៅក្នុងមូលដ្ឋាន ត្រូវបានការអបអរសាទរយ៉ាងក្រៃលែងពីសំណាក់ប្រជាពលរដ្ឋនៅក្នុងក្រុងកំពង់ឆ្នាំង។
លោក យិន សាវ៉េន អភិបាលក្រុងកំពង់ឆ្នាំងតំណាងឲ្យប្រជាពលរដ្ឋ សូមថ្លែងអំណរគុណដល់សម្ដេចតេជោ ហ៊ុន សែន, ឯកឧត្ដមទេសរដ្ឋមន្ត្រី ស៊ុន ចាន់ថុល, ឯកឧត្ដម ឈួរ ច័នឌឿន និង លោក កែវ ពៅ ប្រធានមន្ទីរសាធារណការខេត្ត ដែលបានគិតគូរ និងដោះស្រាយបញ្ហាប្រឈម សំណូមពរចាំបាច់របស់ប្រជាពលរដ្ឋបានដោយជោគជ័យ និងទាន់ពេលវេលា ស្របតាមការធ្វើបុណ្យទន្លេនៅក្នុងខែមីនា បានខិតជិតមកដល់ហើយនោះ ប្រជាពលរដ្ឋពិតជាសប្បាយរីករាយខ្លាំងណាស់។
សូមបញ្ជាក់ថា កន្លងមកផ្លូវនេះ ជាផ្លូវតូចចង្អៀតលំបាក មានគ្រលុកច្រើន ដោយនៅក្នុងខែវស្សា ទឹកឡើងត្រូវលិច ពិបាកធ្វើដំណើរ ឥឡូវបានធ្វើដំណើរស្រួលជាបណ្តើរៗហើយ សង្ឃឹមថាពេលកសាងផ្លូវនេះរួចរាល់ ប្រជាពលរដ្ឋពិតជាអស់ក្តីកង្វល់ទៀតហើយ៕
Source: Kampuchea Thmey Daily
0 Comments