ស្វាយរៀង ៖ មានក្រុមចោរ ចាប់ផ្ដើមធ្វើសកម្មភាពលួចរថយន្ត ហើយក្នុងមួយយប់ លួចបាន២គ្រឿងយកទៅបាត់ដោយសុវត្ថិភាព រីឯម្ចាស់បានត្រឹមប្ដឹងសមត្ថកិច្ចប៉ុណ្ណោះ។
ករណីបាត់រថយន្តនោះ ទី១-កើតឡើងវេលាម៉ោងប្រមាណ២យប់រំលងអធ្រាត្រ ថ្ងៃទី២៦ ខែមករា ឆ្នាំ២០១៩ នៅចំណុចភូមិ ស្រះវង្ស សង្កាត់ស្វាយរៀង ក្រុងស្វាយរៀង។
បើតាមសមត្ថកិច្ចបានឲ្យដឹងថា ជនរងគ្រោះបាត់រថយន្ត ឈ្មោះ មាស សាមី ភេទប្រុស អាយុ៣៦ឆ្នាំមុខរបរជាគ្រូបង្រៀន នៅវិទ្យាល័យស្វាយរៀង មានទីលំនៅកន្លែងកើតហេតុខាងលើ ខណៈខ្លួនមានជំងឺទៅសម្រាកព្យាបាលនៅមន្ទីរពេទ្យ ដោយទុកឪពុក និងម្ដាយចាស់ជរាចាំផ្ទះ។
ប្រភពដដែលបន្តទៀតថា ជនរងគ្រោះទុករថយន្តនៅខាងមុខផ្ទះ ហើយរាល់ដង គឺចាក់សោ តែយប់កើតហេតុភ្លេច មិនដឹងថាបានចាក់សោ ឬអត់ទេ ទើបចោរលួចទៅបានងាយស្រួលបែបនេះ។
ប្រភពបន្តទៀតថា រហូតដល់ព្រឹកឡើង ម៉ោង៥និង០០នាទី ថ្ងៃទី២៦ ឪពុកគាត់ក្រោកឡើងពីដំណេក ទើបដឹងថា បាត់ឡាន ក៏ឆោឡោប្តឹងសមត្ថកិច្ចតែម្ដង។
រថយន្ត ដែលបាត់នោះ ម៉ាកបាឡែន ពណ៌ទឹកប្រាក់ ពាក់ស្លាកលេខភ្នំពេញ២U៨០៥០ ស៊េរី២០០២ ហើយនៅក្រុងបាវិត ក៏មានចោរលួចរថយន្ត១គ្រឿងទៀត ម៉ាកហាយឡែនដ័រ ពណ៌ទឹកមាស ពាក់ស្លាកលេខភ្នំពេញ២W០១០៦ ស្ថិតនៅភូមិព្រៃផ្តៅ សង្កាត់ច្រកម្ទេស ក្រុងបាវិត បាត់ម៉ោងប្រមាណ២ទៀបភ្លឺដែរ។ បច្ចុប្បន្ន សមត្ថកិច្ច កំពុងដុតដៃដុតជើងស្រាវជ្រាវរកមុខសញ្ញាក្រុមចោរលួចរថយន្តទាំងអស់នោះយកមកផ្ដន្ទាទោសតាមផ្លូវច្បាប់៕
Source: Kampuchea Thmey Daily
0 Comments