ចូលរួម​ថែរក្សា​បរិស្ថាន​ និង ​សេចក្តី​ស្រលាញ់​តាមរយៈ​អំណោយ​ឡ​ដុត​សំរាម​សំណល់​វេជ្ជសាស្ត្រ

ភ្នំពេញ ៖ ដើម្បី​ចូលរួមចំណែក​ថែរក្សា​បរិស្ថាន​និង​សេចក្តី​ស្រលាញ់​ដល់​ប្រជាពលរដ្ឋ​កម្ពុជា​ក្រោម​កិច្ចការ​ជាមួយ​ទីភ្នាក់ងារ​ជំរុញ​ការ​វិនិយោគ​ពាណិជ្ជកម្ម​កូរ៉េ​នៅ​កម្ពុជា​(Kotra )​ប្រតិភូ​កូរ៉េ​នៃ​Daekyung Esco បានផ្តល់​អំណោយ​ឡ​ដុត​សំរាម​សំណល់​វេ​ជ្ជ​សាស្ត្រ​ចំនួន​មួយគ្រឿង​ដល់​មន្ទីរ​ព្យាបាល​Hebron Medical Center កាលពី​ថ្ងៃទី​២៣​ខែមករា​ឆ្នាំ​២០១៩​។

នៅក្នុង​ពិធី​ប្រគល់​និង​ទទួល​ឡ​ដុត​សំណល់​វេជ្ជសាស្ត្រ​នេះ លោក Kim Woo Jung ប្រធាន​Hebron Medical Center បាន​មានប្រសាសន៍​ថ្លែងអំណរគុណ​ដល់ លោក​ប្រធាន Hyang –won ,Kim តំណាង​Daekyung Esco ដែល​បានផ្តល់​ជា​អំណោយ​ឡ​ដុត​សំណល់​វេជ្ជសាស្ត្រ​នា​ពេល​នេះ​ដើម្បី​សម្រួល​ដល់​ការ​លំបាក​របស់​មន្ទីរ​ព្យាបាល​ក្នុងការ​គ្រប់គ្រង​សំរាម​សំណល់​វេជ្ជសាស្ត្រ​។



លោក​បន្តថា ​ឡ​ដុត​សំរាម​សំណល់​វេជ្ជសាស្ត្រ​នេះ​មាន​សារៈសំខាន់​ខ្លាំងណាស់​ក្នុង​ការ​ទប់ស្កាត់​ឧស្ម័ន​ពុល​នៅក្នុង​បរិយាកាស និង​ទប់ស្កាត់​ការឆ្លង​មេរោគ​ផ្សេងៗ​ពី​សំរាម​សំណល់​វេជ្ជសាស្ត្រ​។

លោក Kim Woo Jung​បាន​បញ្ជាក់ថា ក្នុង​មួយឆ្នាំ​មន្ទីរ​ព្យាបាល​Hebron Medical Center​ជួយ​ព្យាបាល​ដល់​ប្រជាពលរដ្ឋ​កម្ពុជា​ក្រីក្រ​មកពី​បណ្តា​ខេត្ត​ផ្សេងៗ​និង​រាជធានី​ភ្នំពេញ​បាន​ចំនួន​៦​ម៉ឺននាក់​។ ​ក្នុង​នោះ​ប្រជាពលរដ្ឋ​ក្រីក្រ​មិន​យក​ថ្លៃ​និង​អ្នកមាន​លទ្ធភាព​ត្រូវ​បង់​វិភាគទាន​ខ្លះៗ​តែប៉ុណ្ណោះ​។

លោក Hyang –won ,Kim តំណាង​Daekyung Esco និង​ជា​ប្រធាន Korea incinerator បាន​ឲ្យ​ដឹងថា នេះ​ជា​លើក​ទី​១​ដែល​លោក​បានផ្តល់​អំណោយ​ឡ​ដុត​សំរាម​សំណល់​វេជ្ជសាស្ត្រ​ដល់​ប្រទេស​កម្ពុជា​។ ឡ​នេះ​មាន​សារៈសំខាន់​ក្នុងការ​ទប់ស្កាត់​ឧស្ម័ន​ពុល​ទៅ​ក្នុង​បរិយាកាស​និង​ទប់ស្កាត់​ការឆ្លង​មេរោគ​ផ្សេងៗ​ពី​សំណល់​វេជ្ជសាស្ត្រ។ ​ឡ​ដុត​នេះ​ប្រើប្រាស់​បច្ចេកវិទ្យា​ទំនើប មិន​មាន​ផ្សែង មិន​មាន​ក្លិន ជា​មធ្យម​ក្នុង​មួយ​ម៉ោង​អាច​ដុត​បាន​៥០​គីឡូក្រាម​នៃ​សំរាម​សំណល់​វេជ្ជសាស្ត្រ​និង​អាច​ដុត​ជា​បន្ត​គ្នា​ជា​រៀង​រហូត​។ លោក​បន្ត​ថា គ្រប់​មន្ទីរពេទ្យ​គួរតែមាន​ឡ​ដុត​សំរាម​សំណល់​វេជ្ជសាស្ត្រ​បែបនេះ​មួយ​ជា​ចាំបាច់​៕

Source: Kampuchea Thmey Daily