អ្នកប្រឆាំង​ចិន​បាន​ជាប់​ក្នុង​ព្រលានយន្តហោះ​កោះ​តៃវ៉ាន់​រយៈពេល​ជាង​១០០​ថ្ងៃ

អ្នកប្រឆាំង​ចិន​ឈ្មោះ Liu Xinglian បាន​ប្រារព្ធ​ពិធី​ខួបកំណើត​គម្រប់​៦៤​ឆ្នាំ​របស់គាត់​កាលពី​ថ្ងៃ​ពុធ​នៅ​អាកាសយានដ្ឋាន Taoyuan របស់​កោះ​តៃវ៉ាន់​។ គាត់​ជា​ជនភៀសខ្លួន​ម្នាក់​ក្នុងចំណោម​ជនភៀសខ្លួន​ពីរ​នាក់​ដែល​ជាប់​នៅ​ទីនោះ​អស់​រយៈពេល​ជាង​១០០​ថ្ងៃ​មកហើយ​ដោយ​សង្ឃឹមថានឹង​ទទួលបាន​សិទ្ធិ​ជ្រកកោន​នៅ​បរទេស​។​

ករណី​របស់​ពួកគេ​មាន​លក្ខណៈ​ស្រដៀង​គ្នា​ទៅនឹង​ករណី​របស់​ជន​ជាតិ​អារ៉ាប៊ីសាអ៊ូឌីត​នាង Rahaf Mohammed al-Qunun ដែល​ត្រូវ​បានផ្តល់​កន្លែង​ជ្រកកោន​នៅក្នុង​ប្រទេស​កាណាដា​បន្ទា​ប់​ពី​នាង​បាន​ប្រើប្រាស់​ប្រព័ន្ធ​ផ្សព្វផ្សាយ​សង្គម​ដើម្បី​រិះគន់​អាជ្ញាធរ​ថៃ​ប្រឆាំងនឹង​ការបង្ខំ​បញ្ជូន​នាង​ឲ្យ​ត្រលប់​ទៅ​គ្រួសារ​របស់​នាង​វិញ​។​
​
ប៉ុន្តែ​អ្នកស្វែងរក​សិទ្ធិ​ជ្រកកោន​ជា​ជន​ជាតិចិន​បានទទួល​ការយកចិត្តទុកដាក់​ឬ​សាមគ្គីភាព​ពី​អន្តរជាតិ​តិចតួច​ណាស់​។​
​
ដូច​នាង Qunun ដែរ​, លោក Liu និង​មិត្តភក្តិ​របស់គាត់​ឈ្មោះ Yan Kefen អាយុ​៤៤​ឆ្នាំ​បានដាក់​ពាក្យសុំ​សិទ្ធិ​ជ្រកកោន​នៅ​ប្រទេស​កាណាដា​ហើយ​បាន​បង្ហោះ​ព័ត៌មាន​ថ្មីៗ​លើ​ប្រព័ន្ធ​ផ្សព្វផ្សាយ​សង្គម​ពី​អាកាសយានដ្ឋាន​ដើម្បី​បង្ហាញ​ពី​ស្ថានភាព​របស់​ពួកគេ​។​
​
លោក Liu បាន​ប្រាប់ AFP តាម​ទូរស័ព្ទ​ចេញពី​ចំណុច​ឆ្លងកាត់​របស់​អាកាសយាន​ដ្ឋា​ន​ដែលជា​កន្លែង​អ្នក​ទាំង​ពីរបាន​ចំណាយពេល​បី​ខែ​ចុងក្រោយ​ជាមួយ​អាហារ​ដែល​ត្រូវ​ផ្តល់​ឲ្យ​ដោយ​ក្រុមហ៊ុន​អាកាសចរណ៍​ថា “​នៅក្នុង​អាកាសយានដ្ឋាន យើង​មិនអាច​ស្រូបខ្យល់​បរិសុទ្ធ​បានទេ​ហើយ​គ្មាន​ពន្លឺព្រះអាទិត្យ​”​។​
​
លោក Liu និង​លោក Yan គឺជា​ចំណាប់ខ្មាំង​នៃ​ឋានៈ​អន្ដរជាតិ​ដ៏​ចម្លែក​របស់​កោះ​តៃវ៉ាន់​និង​នយោបាយ​ក្នុងប្រទេស​របស់ខ្លួន​។​
​
កោះ​ដែល​គ្រប់គ្រង​ដោយ​ខ្លួនឯង​មួយ​នេះ​មិនត្រូវ​បានទទួល​ស្គាល់​ដោយ​ប្រទេស​ភាគច្រើន​ទេ​ហើយ​មិនមាន​តំណាង​នៅ​អង្គការសហប្រជាជាតិ​ឡើយ​ដែល​មានន័យថា ភ្នាក់ងារ​ជនភៀសខ្លួន​របស់​អង្គការសហប្រជាជាតិ​មិន​ធ្វើ​ប្រតិបត្តិការ​នៅ​ទី​នោះទេ​។​
​
ហើយ​ខណៈពេលដែល​ទម្រ​ង់​រដ្ឋាភិបាល​បច្ចុប្បន្ន​របស់​កោះ​តៃវ៉ាន់​ត្រូវបាន​បង្កើតឡើង​ដោយ​ប្រជាជន​ដែល​ភៀសខ្លួន​ចេញពី​សង្គ្រាមស៊ីវិល​ចិន​នោះ កោះ​នេះ​មិនមាន​ច្បាប់​ក្នុងស្រុក​ដើម្បី​ការពារ​ជនភៀសខ្លួន​ទេ​។​
​
រហូតមកដល់​ពេលនេះ លោកស្រី​ប្រធានាធិបតី Tsai Ing-wen មិនបាន​ធ្វើ​អ្វី​ដើម្បី​និរទេស​លោក Liu និង​លោក Yan ទេ​។​
​
ជា​លទ្ធផល ពួកគេ​ត្រូវ​ជាប់​និង​រារាំង​ពី​ការចូលទៅ​តៃវ៉ាន់​ដោយ​មិនអាច​ចាកចេញ​ពី​ចំណុច​ឆ្លងកាត់​របស់​អាកាសយាន​ដ្ឋា​ន​បាន​៕ AFP

​

Source: Kampuchea Thmey Daily