ក្លិប​លេខ​៣​ឆ្នាំ​ចាស់​នៅ​លី​គ​កំពូល​ម៉ាឡេស៊ី ចង់បាន ចាន់ វឌ្ឍនាកា ប​ញ្ជូ​ល​ក្នុង​បញ្ជី​កីឡាករ​បរទេស​កួ​តា​តំបន់​អាស៊ាន

ក្លិប​បាល់ទាត់​PKNS (Kelab Bolasepak Perbadanan Kemajuan Negeri Selangor) ដែល​ឈរ​ចំណាត់ថ្នាក់​លេខ​៣​ឆ្នាំ​២០១៨ ក្នុង​ពានរង្វាន់​លី​គ​កំពូល​ម៉ាឡេស៊ី (2018 Malaysia Super League) បានដាក់​ការចាប់អារម្មណ៍​លើ​ខ្សែប្រយុទ្ធ​ក្នុង​ក្រុម​ជម្រើសជាតិ​កម្ពុជា ចាន់ វឌ្ឍនាកា ដើម្បី​យកទៅ​ចូលរួម​ក្នុង​ក្រុម​ត្រៀម​រដូវ​កាល​ថ្មី​ឆ្នាំ​២០១៩ ខាងមុខ​។

​យោងតាម​ការចេញផ្សាយ​របស់​សា​ព័ត៌មាន​ម៉ាឡេស៊ី បានបញ្ជាក់​ថា​លោក​Datuk K. Rajagobal ដែលជា​គ្រូបង្វឹក​របស់​ក្រុម PKNS បាន​សម្លឹងមើល​កីឡាករ ចាន់ វឌ្ឍនាកា របស់​កម្ពុជា និង​កីឡាករ​Gabriel Quak របស់​សឹង្ហ​បុរី ដើម្បី​ចូលរួម​ក្នុង​ក្រុម​បំពេញ​កូតារ​កីឡាករ​អាស៊ាន​ក្នុង​រដូវ​កាល​ថ្មី​ឆ្នាំ​២០១៩ ឆាប់ៗ​នេះ​។ ក្រុម PKNS នៅ​ពេល​នេះ​កំពុងតែ​ចេញទៅ​បោះជុំរុំ​ហ្វឹកហាត់​នៅ​ប្រទេស​សឹង្ហ​បុរី ដោយ​ត្រូវ​ជួប​ក្រុម​Young Lions ក្នុង​ប្រកួត​មិត្តភាព​នៅ​ថ្ងៃទី​១៣ ខែមករា ហើយ​នៅ​ថ្ងៃទី​១៦ ខែមករា បន្ត​ជួប​ក្រុម​Geylang International វិញ​ម្តង​។



ចំពោះ​កីឡាករ ចាន់ វឌ្ឍនាកា វិញ​ស្ថិតនៅ​ក្នុង​សមភាព​អាថ៌កំបាំង​នៅឡើយ​ដោយ​មិន​ច្បាស់​ថា​រូបគេ​បន្ត​លេង​នៅ​ក្លិប​បឹងកេត ឬ​ចាកចេញ​នោះទេ​។ ប៉ុន្តែ​យើង​ដំណឹង​ល្ហេចល្ហៀង​មួយ​បញ្ជាក់​ថា​រូបគេ​ទំនង​បន្ត​អាជីព​នៅ​ក្រៅ​ប្រទេសមួយរ​យៈ​ទៀត ទោះបីជា​ដំណើរ​ទៅ​ក្រៅ​ស្រុក​២​លើក​កន្លងមក​ហាក់​មិន​សមប្រកប​ចំពោះ​អាជីព​គេ​ក៏ដោយ​។

សូម​បញ្ជាក់​ថា ​កីឡាករ ចាន់ វឌ្ឍនាកា ជា​អតីត​យុវជន​របស់​ក្លិប​ព្រះខ័ន​រាជ​ស្វាយរៀង (ព្រះខ័ន​រាជ​) ដែល​ចាប់​អាជីព​ដំបូង​កាលពី​ឆ្នាំ​២០១១ នៅក្នុង​ឈុត​ធំ​ក្រុម​នេះ ស្រប​ពេល​នៅ​ឆ្នាំ២០១២ រូបគេ​បាន​ផ្ទេរ​ទៅកាន់​ក្លិប​បឹងកេត រហូតដល់​ចុងឆ្នាំ​២០១៦ មុន​ចេញទៅ​ជប៉ុន ដោយ​ចូលរួម​ជាមួយ​ក្លិប Fujieda MYFC សមាជិក​ពានរង្វាន់​លី​គ​លំដាប់​ទី​៣ (J3-league)​។ នៅ​ដើមឆ្នាំ​២០១៨ ក្រោយ​ចប់​កិច្ចសន្យា​នៅ​ប្រទេស​ជប៉ុន ចាន់ វឌ្ឍនាកា បាន​បន្តដំណើរ​ទៅ​ប្រទេស​ម៉ាឡេស៊ី ជាមួយ Pahang FA តែ​ពាក់កណ្តាល​រដូវ​កាល​បាន​ត្រឡប់​មក​ចូលរួម​ជាមួយ​ក្រុម​បឹងកេត របស់​កម្ពុជា វិញ​ម្តង​។



រូបគេ​ធ្លាប់​ឈ្នះ​ពានរង្វាន់​ឯកជន​ជាច្រើន​ទៀត​ដូចជា​ពានរង្វាន់​កីឡាករ​វ័យក្មេង​ឆ្នើម​ប្រចាំឆ្នាំ​២០១២ ដែល​ផ្ដល់​ដោយ​គណៈ​កម្ម​ធិ​ការ​ជាតិ​អូឡាំពិក​កម្ពុជា នៅ​ឆ្នាំ​២០១៣ ឈ្នះ​ស្បែកជើង​មាស ក្នុង​ពានរង្វាន់​សម្តេច​តេ​ជោ ឆ្នាំ​២០១៤ ឈ្នះ​ពាន​កីឡាករ​ល្អ​ប្រចាំ​ពានរង្វាន់​លី​គ​កំពូល​កម្ពុជា ហើយ​ឆ្នាំ​២០១៥ រក្សា​ពានរង្វាន់​កីឡាករ​ឆ្នើម​ប្រចាំ​ពានរង្វាន់​លី​គ​កំពូល​កម្ពុជា និង​ជា​ម្ចាស់​ស្បែកជើង​មាស​ប្រចាំ​រដូវ​កាល​និង​ស្បែកជើង​មាស​ក្នុង​ពានរង្វាន់ Toyota Mekong Club Championship 2015​។ នៅ​ឆ្នាំ​២០១៦ រូបគេ​រក្សា​ពានរង្វាន់​កីឡាករ​ឆ្នើម​ប្រចាំ​ពានរង្វាន់​លី​គ​កំពូល​កម្ពុជា និង​ជា​ម្ចាស់​ស្បែកជើង​មាស​ប្រចាំ​រដូវ​កាល​បាន​ដដែល​៕

Source: Kampuchea Thmey Daily