កណ្តាល ៖ មានករណីគ្រោះថ្នាក់ចរាចរណ៍មួយ បានកើតឡើង នៅថ្ងៃទី១៧ ខែមករា ឆ្នាំ២០១៩ វេលាម៉ោង៨និង១៥នាទី រវាងម៉ូតូឌ្រីមសង់C125 បុកជាមួយរ៉ឺម៉កម៉ូតូដឹកទឹកកក នៅចំណុចចន្លោះគីឡូម៉ែត្រលេខ ៥១_៥២ ភ្នំពេញ -អ្នកលឿង លើផ្លូវជាតិលេខ១ ស្ថិតក្នុងភូមិរាំងដេក ឃុំគគីរធំ ស្រុកកៀនស្វាយ ខេត្តកណ្តាល ទិសដៅស្របគ្នា បណ្តាលឲ្យភាគីម្ចាស់ម៉ូតូឌ្រីមសង់រងរបួសបាក់ជើងម្ខាង។
នៅថ្ងៃកើតហេតុខាងលើ មានឈ្មោះ ម៉ាប់ ម៉ៃ ភេទប្រុស អាយុ២៣ឆ្នាំ មានទីលំនៅភូមិគគីរធំ២ ឃុំគគីរធំ ស្រុកកៀនស្វាយ ខេត្តកណ្តាល ជាអ្នកស៊ីឈ្នួលបើករ៉ឺម៉កដឹកទឹកកកឲ្យគេ លុះមកដល់ចំណុចកើតហេតុខាងលើ ក៏បានបត់ឆ្លងថ្នល់ពីខាងស្តាំ ទៅខាងឆ្វេង ស្របពេលនោះក៏មានម៉ូតូមួយគ្រឿង ម៉ាកឌ្រីមសង់ c- ១២៥ ពណ៌ខ្មៅ ពាក់ស្លាកលេខ ស្វាយរៀង 1M-4456 បើកបរ ដោយឈ្មោះ ម៉ែន សាមិត ភេទប្រុស អាយុ៥៧ឆ្នាំ មានទីលំនៅ ភូមិត្រពាំងធ្លកខាងជើង ឃុំចន្ត្រី ស្រុករមាសហែក ខេត្តស្វាយរៀង បានបុកចំកង់រ៉ឺម៉កចំហៀងខាងឆ្វេង រងរបួសបាក់ខ្មងជើងខាងឆ្វេង។
បច្ចុប្បន្ន ជនរងគ្រោះ បានបញ្ជូនទៅមន្ទីរពេទ្យភ្នំពេញ រីឯអ្នកបើកបរ រ៉ឺម៉កម៉ូតូ រត់គេចខ្លួនបាត់។ ចំណែកវត្ថុតាង កម្លាំងប៉ុស្តិ៍ បានយកមករក្សាទុកនៅប៉ុស្តិ៍នគរបាលរដ្ឋបាលគគីរធំ រង់ចាំជំនាញចាត់ការបន្តតាមនីតិវិធីច្បាប់៕
Source: Kampuchea Thmey Daily
0 Comments