ភ្នំពេញ ៖ គណៈប្រតិភូខណ្ឌសម្ព័ន្ធភាពចំនួន៣ ក្នុងនោះមានខណ្ឌមានជ័យ ខណ្ឌច្បារអំពៅនិងខណ្ឌចំការមន កាលពីព្រឹកថ្ងៃទី២៥ ខែមករានេះ បានអញ្ជើញចុះសាកសួរសុខទុក្ខដល់វរកងទ័ពនៃវរសេនាតូចលេខ៣៩២ ចំណុះកងពលធំលេខ៩ដែលឈរជើងការពារព្រំដែនខេត្តព្រះវិហារ។
លោកពេជ្រ កែវមុនី អភិបាលនៃគណៈអភិបាលខណ្ឌមានជ័យបានមានប្រសាសន៍ប្រាប់កម្ពុជាថ្មីថា នៅព្រឹកថ្ងៃទី២៥ ខែមករានេះ ប្រតិភូខណ្ឌសម្ព័ន្ធភាពចំនួន៣ ដែលដឹកនាំដោយគណៈអភិបាលខណ្ឌទាំង៣ ក្នុងនោះមានខណ្ឌមានជ័យ ច្បារអំពៅ និងខណ្ឌចំការមនបានធ្វើដំណើរមកពីរាជធានីភ្នំពេញ ដើម្បីមកសាកសួរសុខទុក្ខដល់បងៗកងទ័ពក្នុងវរសេនាតូចលេខ៣៩២ចំណុះកងពលធំលេខ៩ដែលកំពុងឈរជើងការពារព្រំដែនកម្ពុជា-ថៃ ក្នុងភូមិសាស្ត្រខេត្តព្រះវិហារ។
ហើយការចុះសាកសួរសុខទុក្ខដល់បងៗកងទ័ព គឺធ្វើឡើងជាប្រចាំមិនតិចជាង៣ដងក្នុងរយៈពេលមួយឆ្នាំដើម្បីពង្រឹងសាមគ្គីភាពរវាងអាជ្ញាធរនិងប្រជាពលរដ្ឋមន្ត្រីរាជការ ព្រះសង្ឃនៅក្នុងមូលដ្ឋានខណ្ឌទាំង៣និងវរកងទ័ពយើងឲ្យកាន់តែស្អិតល្មួត ហើយពិសេសជាងនេះ គឺសុខទុក្ខរបស់បងៗកងទ័ព និង ប្រជាពលរដ្ឋ គឺតែមួយ។ ហើយជានិច្ចកាលប្រតិភូខណ្ឌសម្ព័ន្ធភាពតែងតែផ្តល់ការឧបត្ថម្ភជូនបងៗកងទ័ពមិនឲ្យខ្វះខាតឡើយពិសេសគឺស្បៀងអាហារតែម្តង ដែលយើងចង់និយាយថា ប្រជាពលរដ្ឋហូបម្ហូបអី គឺកងទ័ពយើងក៏មានហូបដូចគ្នា។
ជាក់ស្តែងដូចថ្ងៃនេះ ខណ្ឌសម្ព័ន្ធភាពទាំង៣បាននាំយកថវិកាមកផ្តល់ជូនបងៗកងទ័ពក្នុងវរសេនាតូចលេខ៣៩២ចំនួន៣៥៤នាក់ក្នុងនោះ លោកមេបញ្ជាវរមួយរូបទទួលបានថវិកា៨០ម៉ឺនរៀល។ លោកមេបញ្ជាការវរចំនួន៦នាក់ក្នុងម្នាក់ៗទទួលបានថវិកា៤០ម៉ឺនរៀល។ លោកមេបញ្ជាការកងអនុសេនាធំចំនួន៤នាក់ ក្នុងម្នាក់ៗទទួលបានថវិកាចំនួន៤០ម៉ឺនរៀល។ លោកមេបញ្ជាការកងអនុសេនាតូចចំនួន២០នាក់ក្នុងម្នាក់ៗទទួលបានថវិកាចំនួន២០ម៉ឺនរៀល។ ដោយឡែកពលទាហានចំនួន៣២៣នាក់ក្នុងម្នាក់ៗទទួលបានថវិកាចំនួន១០ម៉ឺនរៀល។
ក្នុងនោះផងដែរ រដ្ឋបាលសាលាខណ្ឌទាំង៣ បានប្រគល់ថវិកាជូនលោកវរសេនីយ៍ឯក ណន ធិន មេបញ្ជាការវរសេនាតូចលេខ៣៩២ ក្នុងអំឡុងពេល២ខែមុននេះសរុបជាថវិកាចំនួន១៤,៤០០,០០០រៀលទៀតផង៕
Source: Kampuchea Thmey Daily
0 Comments