សាកលវិទ្យាល័យ​នៅ​អាមេរិក​ មាន​គោលបំណង​ផលិត​ស្បៀង ដើម្បី​ធានា​សន្តិសុខ​ស្បៀង នៅ​តាម​ជនបទ

ភ្នំពេញ ​៖ សាស្ត្រាចារ្យ Dr Vara Prasad និង​សហការី​ដែល​អញ្ជើញ​មកពី​សាកលវិទ្យាល័យ Kansas State University សហរដ្ឋអាមេរិក បាន​ថ្លែង ជម្រាប​រដ្ឋមន្ត្រី កសិកម្ម​ថា គម្រោង​របស់​សាកលវិទ្យាល័យ​គឺ​មាន​គោលបំណង​ផលិត​ស្បៀង​ឲ្យ​បាន​គ្រប់គ្រាន់​ដើម្បី​ធានា​សន្តិសុខ​ស្បៀង​ដល់​ប្រជាពលរដ្ឋ​ក្រីក្រ​នៅ​តាម​ជនបទ និង គម្រោង​នេះ​បាន​ជួយ​បណ្តុះបណ្តាល​យុវជន​ជំនាន់​ក្រោយ​ដើម្បី​បង្កើន​សក្តានុពល និង​សមត្ថភាព​។​

លោក សាស្ត្រាចារ្យ Dr Vara Prasad មាន​ប្រសា​ស​ន៍​បែបនេះ​ធ្វើឡើង កាលពី​រសៀល​ថ្ងៃទី​២៤ មករា ឆ្នាំ​២០១៩ ក្នុង​ជំនួប​ពិភាក្សា​ជាមួយ​ក្រុមការងារ សាស្ត្រាចារ្យ Dr Vara Prasad និង​សហការី​ដែល​អញ្ជើញ​មកពី​សាកលវិទ្យាល័យ Kansas State University សហរដ្ឋអាមេរិក​។

ជំនួប​ពិភាក្សា​នេះ សាស្ត្រាចារ្យ Dr Vara Prasad មាន​គោលបំណង​សំខាន់​ទី​១- រាយការណ៍​ជូន​លោក រដ្ឋមន្ត្រី​ជ្រាប​ពី​កិច្ចសហប្រតិបត្តិការ​រ​វាង​សាកល​វិទ្យាល័យ​ភូមិន្ទ​កសិកម្ម (RUA) និង​កម្មវិធី​មន្ទីរពិសោធន៍​នវានុវត្តន៍​ប្រពលវប្បកម្ម​និរន្តរភាព (Sustainable Intensification Innovation Lab) នៃ​សាកលវិទ្យាល័យ​រដ្ឋ​កាន់​សាស សហរដ្ឋអាមេរិក ដែល​បាននឹងកំពុង​សហការ​អនុវត្ត ដោយ​ទទួលបាន​ការគាំទ្រ​ហិរញ្ញវត្ថុ​ពី​ទីភ្នាក់ងារ​សម្រាប់​ការអភិវឌ្ឍ​សហរដ្ឋអាមេរិក USAID និង​ទី​២- ស្នើសុំ​ការគាំទ្រ​ពី​លោក រដ្ឋមន្ត្រី ដើម្បី​បន្ត​ផ្តល់​ការគាំទ្រ​លើ​គម្រោង​នានា​ដែល​កំពុង​អនុវត្ត​ជាមួយ RUA​។



លោក Dr Vara Prasad បាន​ជម្រាប​ជូន​លោក រដ្ឋមន្ត្រី​ថា គម្រោង​របស់​សាកលវិទ្យាល័យ​គឺមាន​គោលបំណង​ផលិត​ស្បៀង​ឲ្យ​បាន​គ្រប់គ្រាន់​ដើម្បី​ធានា​សន្តិសុខ​ស្បៀង​ដល់​ប្រជាពលរដ្ឋ​​នៅ​តាម​ជនបទ​។ មួយវិញទៀត គម្រោង​នេះ​បាន​ជួយ​បណ្តុះបណ្តាល​យុវជន​ជំនាន់​ក្រោយ​ដើម្បី​បង្កើន​សក្តានុពល និង​សមត្ថភាព​របស់​ពួកគេ​ក្នុងការ​ស្រាវជ្រាវ និង​ន​វា​នុ​វត្តន៍​នូវ​គំហើញ​ថ្មី​រួច​ធ្វើ​ការផ្ទេរ​ឲ្យទៅ​ប្រជាកសិករ ឬ​អ្នក​ផលិត​ធ្វើ​យ៉ាង​ណា​បង្កើន​ទិន្នផល​កសិកម្ម ធានា​គុណភាព និង​សុវត្ថិភាព ហើយ​គម្រោង​នេះ​ពិតជា​បាន​ចូលរួម​ចំណែក និង​គាំទ្រ​ដល់​គោលនយោបាយ​របស់​រាជ​រដ្ឋាភិបាល ក៏ដូចជា​របស់​ក្រសួងកសិកម្ម រុក្ខាប្រមាញ់ និង​នេសាទ​ក្នុងការ​អភិវឌ្ឍ​វិស័យ​កសិកម្ម​ឲ្យ​មាន​ការ​រីកចម្រើន​។



នា​ឱកាស​នេះ លោក​រដ្ឋមន្ត្រី បាន​ថ្លែងអំណរគុណ​ជូន​ចំពោះ​រដ្ឋាភិបាល​សហរដ្ឋ​អាមេរិក តាមរយៈ​អង្គការ USAID ដែល​បាន​ជួយឧបត្ថម្ភ គាំទ្រ​ដល់​ការអភិវឌ្ឍ​នៅ​ប្រទេស​កម្ពុជា ក្នុង​នោះ​ក៏​មាន​វិស័យ​កសិកម្ម និង​ការបណ្តុះបណ្តាល​ធនធាន​មនុស្ស ហើយ​ជាពិសេស​បាន​ជួយឧបត្ថម្ភ​ដល់ RUA ក្នុង​ការ​អនុវត្ត​គម្រោង​នានា​ទាក់ទង​នឹង​វិស័យ​កសិកម្ម ដែល​បច្ចុប្បន្ន​គម្រោង​ទាំងនោះ​កំពុង​មាន​វឌ្ឍនភាព​គួរ​ឲ្យ​ចាប់អារម្មណ៍​។ បច្ចុប្បន្ន​ក្រសួង​កំពុង​ជំរុញ និង​លើកទឹកចិត្ត​ដល់​វិស័យ​ឯកជន (​សហគ្រាស​ខ្នាតតូច និង​មធ្យម​) ក្នុង​ការ​កែច្នៃ​កសិផល​ក្នុង​គោលបំណង​ប្រើប្រាស់​ឲ្យ​អស់​លទ្ធភាព​នូវ​វត្ថុធាតុដើម​ក្នុងស្រុក លើកកម្ពស់​ផលិតភាព​ផលិតកម្ម​កសិកម្ម​ក្នុងស្រុក កាត់បន្ថយ​ថ្លៃដើម និង​កាត់បន្ថយ​ការនាំ​ចូល​។ ឆ្លៀត​ក្នុង​ឱកាស​នេះ លោក រដ្ឋមន្ត្រី​បានស្នើ​សុំ​ឲ្យ​សាកលវិទ្យាល័យ​ពិនិត្យ ពិចារណា​ជួយ​ធ្វើការ​បណ្តុះបណ្តាល​ដល់​និស្សិត​ជំនាន់​ក្រោយ​នូវ​ប​ច្ចេ​ប​វិទ្យា​ទំនើបៗ ថ្មីៗ​ចុងក្រោយ ដើម្បី​បង្កើន​សមត្ថភាព​ដល់​ពួកគេ​ចូលរួម​អភិវឌ្ឍ​វិស័យ​កសិកម្ម​កម្ពុជា​ឲ្យ​មាន​ការ​រីកចម្រើន ឈាន​ទៅ​សម្រេច​ចក្ខុវិស័យ​របស់​រាជរ​ដ្ឋា​ភិ​បាល​នា​ឆ្នាំ​២០៣០ និង​ឆ្នាំ​២០៥០​។

សូម​បញ្ជាក់​ថា កិច្ច​សហប្រតិបត្តិការ​រវាង RUA ជាមួយ​សាកលវិទ្យាល័យ​រដ្ឋ​កាន់​សាស សហរដ្ឋអាមេរិក បានចាប់ផ្តើម​តាំងពី​ឆ្នាំ ២០១៥ ដែល​ក្នុងនោះ RUA ទទួលបាន​ទឹកប្រាក់​សរុប​ប្រមាណ​ជា ៤ លាន​ដុល្លារ​សហរដ្ឋអាមេរិក សម្រាប់​ការងារ​ស្រាវជ្រាវ ការកសាង​សមត្ថភាព​មន្ត្រី និង​និស្សិត ការ​លើក​កំពស់​គុណភាព​សម្ភារ​នៅ​តាម​មន្ទីរពិសោធន៍ និង​ការ​សកម្មភាព​នៃ​ការអនុវត្ត​គម្រោង​ផ្សេងៗ​ទៀត​៕

Source: Kampuchea Thmey Daily