សៀមរាប ៖ នៅរសៀលថ្ងៃទី២៥ ខែមករា ឆ្នាំ២០១៩ នេះ លោក ទៀ សីហា អភិបាល នៃគណៈអភិបាលខេត្តសៀមរាប បានអនុញ្ញាតឲ្យអង្គការមិនមែនរាជរដ្ឋាភិបាលប្រចាំខេត្តសៀមរាប ដឹកនាំដោយ លោកស្រី ញាណ ភួងម៉ាលី នាយិកាអង្គការរចនាស្ត្រី និង ជាប្រធានបណ្ដាញសម្របសម្រួល ចូលជួបពិភាក្សាការងារ និង សម្ដែងការគួរសម នៅសាលាខេត្តសៀមរាប។
ក្នុងកិច្ចសម្តែងការគួរសម និង ពិភាក្សានោះដែរ លោកស្រី ញាណ ភួងម៉ាលី ក៏បានបញ្ជាក់ពីគោលបំណង ភារកិច្ចរបស់ អង្គការ ក្នុងការចូលរួមចំណែកភាពជាដៃគូអភិវឌ្ឍន៍ប្រកបដោយនិរន្តរភាពនៅកម្ពុជា ព្រមទាំងបានបញ្ជាក់នូវសមិទ្ធផល នៃកិច្ចសហការជាមួយរាជរដ្ឋាភិបាល និង អាជ្ញាធរមូលដ្ឋាន នាឆ្នាំ២០១៨កន្លងមក។ ក្នុងនោះលោកស្រី ក៏បានលើកនូវសំណូមពរចំនួន៧ចំណុច រួមមាន ១-បញ្ហាករណីដីធ្លី ,២-តំបន់អភិរក្សបឹងពារាំង រវាងសហគមន៍ចុងឃ្នៀស និង សង្កាត់ជ្រាវ ,៣-ស្នើសុំបន្តផ្សព្វផ្សាយសេចក្ដីណែនាំ របស់ក្រសួងមហាផ្ទៃ និង សេដ្ឋកិច្ចហិរញ្ញវត្ថុ ,៤-សម្របសម្រួលឲ្យមន្ត្រីតាមស្ថាប័នពាក់ព័ន្ធសហការជាមួយអង្គការ ,៥-សូមឲ្យមានកិច្ចប្រជុំរវាងអាជ្ញាធរ និង សង្គមស៊ីវិលមួយឆ្នាំ២ដង ,៦-សូមកុំឲ្យក្រុមហ៊ុន ស៊ូជីង កុំយកពន្ធពីជនបរទេសដែលជាម្ចាស់ជំនួយ ,៧-សូមជួយទប់ស្កាត់ករណីកាប់ឆ្ការព្រៃនៅតំបន់ភ្នំគូលែន។
ឆ្លងតាមកិច្ចពិភាក្សា នូវរាល់បញ្ហាពាក់ព័ន្ធរបស់មន្ទីរអង្គភាព ដែលអង្គការសង្គមស៊ីវិលលើកឡើង ដោយមានករណីមួយ ចំនួនត្រូវបានអាជ្ញាធរធ្វើការដោះស្រាយ ហើយមួយចំនួននៅមិនបានដោះស្រាយផងដែរ។ ម្យ៉ាងទៀតនាពេលកន្លងមក តាមបណ្ដាមន្ទីរមានការពាក់ព័ន្ធ តែងតែរួមសហការជាមួយអង្គការសង្គមស៊ីវិល ដោយទទួលបានលទ្ធផលជាផ្លែផ្កាផងដែរ។
មានប្រសាសន៍នោះដែរ លោក ទៀ សីហា ក៏បានលើកផងដែរថា ជាច្រើនឆ្នាំមកហើយ ដែលមានអង្គការសង្គមស៊ីវិល មាននៅព្រះរាជាណាចក្រកម្ពុជា ព្រមទាំងបានធ្វើកិច្ចសហការជាដៃគូនឹងគ្នា ទៅលើគ្រប់វិស័យ។
លោកបានបន្តទៀតថា តាមសំណូមពររបស់អង្គការសង្គមស៊ីវិល មកខេត្តនាពេលនេះ អាជ្ញាធរខេត្ត នឹងបង្កើនការយកចិត្តទុកដាក់ខ្ពស់ទៅលើរាល់បញ្ហាដែលដែលបានលើកឡើង ដើម្បីរកនូវដំណោះស្រាយប្រកបដោយភាពយុត្តិធម៌ជូនប្រជាពលរដ្ឋ។ ម្យ៉ាង ទៀត អាជ្ញាធរខេត្ត ក៏មិនបានដើរតួជាអាជ្ញាធរកណ្ដាលនោះឡើយ តែទាំងអង្គការ និង អាជ្ញាធរ គឺត្រូវរួមសហការគ្នា ធ្វើកិច្ចការសង្គមឲ្យមានភាពរលូន ប្រកបទៅដោយភាពជិតស្និទ្ធនឹងគ្នា ដើម្បីបម្រើនូវផលប្រយោជន៍របស់ប្រជាពលរដ្ឋក្នុងខេត្តសៀមរាប និង ដើម្បីជាភាពរីកចម្រើនរបស់ខេត្តទៀតផង។ ក្នុងនោះដែរ លោកក៏បាន ស្នើសុំឲ្យអង្គការសង្គមស៊ីវិល និង មន្ទីរមានការពាក់ព័ន្ធ រួមសហការគ្នាជាបន្តទៀត ដើម្បីជាផលប្រយោជន៍សម្រាប់ប្រជាជនក្នុងខេត្តសៀមរាប៕
Source: Kampuchea Thmey Daily
0 Comments