ភ្នំពេញ ៖ អតីតអ្នកកាសែតកម្ពុជា នៅព្រឹកថ្ងៃទី ២៥ ខែមករានេះ បានមកជួបជុំគ្នានៅភោជនីយដ្ឋានឡោវទីហ្វាង ដើម្បីអបអរសា ទរខួបលើកទី ៤០ឆ្នាំ ថ្ងៃចេញ ផ្សាយកាសែតកម្ពុជាលើកដំបូងរបស់ខ្លួន ( ២៥-០១-១៩៧៩/ ២៥-០១- ២០១៩)។
លោក រដ្ឋមន្ត្រីក្រសួង ព័ត៌មាន ខៀវ កាញារីទ្ធ និងជាអតីតអគ្គនាយកកាសែតកម្ពុជា និងលោកជំទាវ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស សហប្រតិបត្តិការអន្តរជាតិ និងជាអតីតនិពន្ធនាយកកាសែតកងទ័ព លោក ឱម យ៉ិនទៀង ទេសរដ្ឋមន្ត្រី ប្រធានអង្គភាពប្រយុទ្ធ ប្រឆាំងអំពើពុករលួយ និងជាអតីតនិពន្ធនាយកកាសែតភ្នំពេញ លោក ប៉ាវ ហមផាន រដ្ឋលេខាធិការក្រសួងមហាផ្ទៃ លោក ថុង អ៊ុយប៉ាង ចាងហ្វាងកាសែតកោះសន្តិភាពក៏បានអញ្ជើញចូលរួមក្នុងពិធីរម្លឹកខួបនេះផងដែរ។
តាមប្រសាសន៍លោកស្រី ឃួន កូវីសុខា ទីប្រឹក្សាក្រសួង ព័ត៌មានបានលើកឡើងឱ្យដឹងថា កាសែតកម្ពុជា គឺជាកាសែតមុនគេបំផុត ដែលបានចេញផ្សាយលើកដំបូងរបស់ខ្លួននៅថ្ងៃទី ២៥ ខែមករា ឆ្នាំ ១៩៧៩ ក្រោយពីរណសិរ្សសាមគ្គីសង្គ្រោះជាតិកម្ពុជារំដោះបានរាជធានីភ្នំពេញពីរបបប្រល័យពូជសាសន៍កម្ពុជាប្រជាធិបតេយ្យ ប៉ុល ពត នៅថ្ងៃទី ៧ ខែមករា ឆ្នាំ១៩៧៩ ហើយនេះគឺជាខួបលើកទី ៤០ឆ្នាំ នៃការចេញផ្សាយកាសែតកម្ពុជាផងដែ។
មានមតិសំណេះសំណាលនាឱកាសនោះដែរលោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានមានប្រសាសន៍បញ្ជាក់ថា ពិតមែនតែអ្នកកាសែតកម្ពុជា យើងបានបែកគ្នាទៅធ្វើការងារកន្លែងផ្សេង តែយើងនៅតែរក្សាស្មារតីសាមគ្គីគ្នាល្អដូចថ្ងៃនេះ។ ៤០ឆ្នាំមកនេះ តាមរយៈការខិតខំប្រឹងប្រែងរបស់យើងឃើញថា មិត្តរបស់យើងខ្លះបានក្លាយជាអ្នកដឹកនាំ ក្លាយជាអ្នកកាន់ការងារសំខាន់ៗនៅតាមស្ថាប័នរដ្ឋរួមចំណែកដ៏សំខាន់ក្នុងការរស់រានមានជីវិត នៃប្រជាជនយើង។ លោករដ្ឋមន្ត្រីបញ្ជាក់បន្ថែមថា ការជួបជុំថ្ងៃនេះគឺយើងស្ថិតនៅក្នុងស្ថានភាពប្រឈមថ្មី ជាពិសេសក្នុងសម័យអ៊ីនធើណេត សម័យហ្វេសប៊ុក សម័យធីវីអនឡាញ បានធ្វើឱ្យកាសែតបោះពុម្ពគេមិនសូវមើលច្រើន ដែលទាមទាឱ្យយើងប្រឹងប្រែងលើរណសិរ្សសតិអារម្មណ៍ខ្លាំងក្លាថែមទៀត។ ដំណាក់កាលប្រយុទ្ធថ្មីមួយ គឺទាមទារឱ្យយើងសហការគ្នាធ្វើយ៉ាងណាប្រយុទ្ធប្រឆាំងវាយបកនឹងដំណឹងក្លែងក្លាយឱ្យបានទាន់ពេលវេលា ដូចប្រសាសន៍របស់សម្តេចនាយករដ្ឋមន្ត្រី ហ៊ុន សែន បានរម្លឹកក្នុងជំនួបសំណេះសំណាលជាមួយអ្នកសារព័ត៌មាន កាលពីថ្ងៃទី១១ ខែមករាថ្មីៗមកនេះ៕
Source: Kampuchea Thmey Daily
0 Comments