មានការ​ដាច់​ចរន្តអគ្គិសនី​ ខណៈ​ប្រទេស​អូស្ត្រាលី​ជួបប្រទះ​សីតុណ្ហភាព​ក្តៅ​ខ្លាំង

មនុស្ស​រាប់ម៉ឺន​នាក់​ដែល​ស៊ូទ្រាំ​នឹង​រលក​កម្តៅ​ដ៏​ខ្លាំងក្លា​មួយ​នៅ​ភាគខាងត្បូង​ប្រទេស​អូស្ត្រាលី​ត្រូវ​គ្មាន​អគ្គិសនី​ប្រើប្រាស់​កាលពី​ថ្ងៃ​សុក្រ​ខណៈពេល​ដែលមាន​តម្រូវការ​កាន់តែខ្លាំង​ឡើង​។​

អាជ្ញាធរ​បាន​និយាយថា អតិថិជន​ប្រហែល​៦០,០០០​នាក់​បាន​ជួបប្រទះ​នឹង​ការ​ដាច់​ចរន្តអគ្គិសនី​បន្ទាប់ពី​ខ្លួន​បាន​បញ្ជា​ឲ្យ​កាត់ផ្តាច់​ទាំង​បង្ខំ​ដើម្បី​កាត់បន្ថយ​ហានិភ័យ​នៃ​ការដួលរលំ​បណ្តាញ​ទាំងមូល​។​

លោក Audrey Zibelman នាយក​ប្រតិ​ប​ត្ដិ​ក្រុមហ៊ុន Australian Energy Market Operator បាន​ប្រាប់​ក្រុម​អ្នកយកព័ត៌មាន​ថា “​យើង​បាន​ស្នើសុំ​ឲ្យ​មានការ​កាត់បន្ថយ​ដោយ​ស្ម័គ្រចិត្ត​ចំនួន​១០០​មេ​ហ្គា​វ៉ា​ត់​។ យើង​បាន​ជូនដំណឹង​ដល់​បណ្តាញ​ទាំងអស់​។ ពួកគេ​កំពុង​ធ្វើ​វា​”​។​

ការរំខាន​នេះ​បាន​កើតឡើង​ខណៈពេលដែល​សីតុណ្ហភាព​នៅក្នុង​ទីក្រុង​មែ​ល​ប៊​ន​បាន​កើន​ឡើងដល់​៤២.៨​អង្សា​សេ​នៅពេល​ថ្ងៃត្រង់​។​

អាជ្ញាធរ​បាន​និយាយថា ការ​កាត់ផ្តាច់​អគ្គិសនី​តាម​ការគ្រោងទុក​នេះ​គឺ​បានចាប់ផ្តើម​នៅពេល​ថ្ងៃត្រង់​ហើយ​អាច​អូសបន្លាយ​រយៈពេល​ប្រហែល​២​ម៉ោង​។​

មាន​សេចក្តីរាយការណ៍​ថា ភ្លើងស្តុប​រហូតដល់​ទៅ​១០០​កន្លែង​គឺ​មិនមាន​អគ្គិសនី​នៅក្នុង​ទីក្រុង​មែ​ល​ប៊​ន​ខណៈ​ហាង​លក់ទំនិញ​និង​ហាង​កាហ្វេ​មួយចំនួន​ត្រូវ​បង្ខំចិត្ត​បិទទ្វារ​។​

នៅក្នុង​ផ្នែក​ផ្សេងទៀត​នៃ​រដ្ឋ Victoria, អាជ្ញាធរ​បានចេញ​ការព្រមាន​អំពី​អគ្គិភ័យ​ខណៈ​បុគ្គលិក​សេវា​សង្គ្រោះបន្ទាន់​រាប់រយ​នាក់​និង​យន្តហោះ​ព្រមទាំង​ឧទ្ធម្ភាគចក្រ​រាប់សិប​គ្រឿង​កំពុង​ត្រៀមខ្លួន​ស្របពេល​ដែល​សីតុណ្ហភាព​នៅ​តំបន់​មួយចំនួន​ត្រូវបាន​គេ​រំពឹងថា​នឹង​ឡើងដល់​៤៧​អង្សា​សេ​។​

ប្រទេស​អូស្ត្រាលី​កំពុង​ងើប​ចេញពី​រលក​កំដៅ​មួយ​ដែល​បាន​កើន​ឡើងដល់​ចំណុចកំពូល​នៅ​ភាគខាងត្បូង​ប្រទេស​អូស្ត្រាលី​កាលពី​ថ្ងៃ​ព្រហស្បតិ៍​នៅពេលដែល​ទីក្រុង Adelaide មាន​សីតុណ្ហភាព​ឡើងដល់​៤៧.៧​អង្សា​សេ​ដោយ​បំបែក​ឯតទគ្គ​កម្ម​ក្នុង​ឆ្នាំ​១៩៣៩​។​

ទន្ទឹមនឹង​នេះដែរ អាជ្ញាធរ​នៅ​ភាគខាងត្បូង​លើ​រដ្ឋ​កោះ Tasmania បាន​បន្ត​ប្រយុទ្ធ​នឹង​ភ្លើង​ឆេះ​ព្រៃ​៕ AFP

​

Source: Kampuchea Thmey Daily