ភ្នំពេញ ៖ អ្នកនាំពាក្យរាជរដ្ឋាភិបាលកម្ពុជា បានចាត់ទុកមាតុភូមិនិវត្តន៍របស់លោក សម រង្ស៊ី គឺជាឆន្ទៈបុគ្គលសុទ្ធសាធ ពីព្រោះការចាកចេញពីមាតុភូមិរបស់លោក សម រង្ស៊ី គឺជាជម្រើសផ្ទាល់ខ្លួន និងមានចរិតជាឯកជន ហើយបើមានការស្នើសុំណាមួយពីតុលាការ នឹងចាត់វិធានការតាមច្បាប់។
ការលើកឡើងរបស់លោក ផៃ ស៊ីផាន បានធ្វើឡើងបន្ទាប់ពីក្រុមអ្នកគាំទ្រលោក សម រង្ស៉ី និងបក្ខពួក ដែលអះអាងថា ជាសមាជិកគណៈកម្មាធិការអចិន្ត្រៃយ៍ នៃអតីតគណបក្សសង្គ្រោះជាតិ បានបើកកិច្ចប្រជុំមួយនៅទីក្រុងឡូវែល សហរដ្ឋអាមេរិក ហើយសម្រេចថា នឹងរៀបចំដំណើរវិលត្រឡប់របស់លោក សម រង្ស៉ី មកកាន់ប្រទេសកម្ពុជា នាពេលខាងមុខនេះ។ ចំណែកលោក សម រង្ស៉ី ក៏ធ្លាប់បានប្រកាសថា លោកមានបំណងត្រឡប់ចូលប្រទេសកម្ពុជាវិញផងដែរ បន្ទាប់ពីលោកបាននិរទេសខ្លួនឯងទៅក្រៅប្រទេសកាលពីឆ្នាំ២០១៦។
លោក ផៃ ស៊ីផាន ក្នុងនាមជាអ្នកនាំពាក្យរាជរដ្ឋាភិបាលកម្ពុជាបានបញ្ជាក់នៅក្នុងសេចក្តីថ្លែងការណ៍របស់ខ្លួនចុះថ្ងៃទី២២ ខែមករា ឆ្នាំ២០១៩ថា ការធ្វើមាតុភូមិនិវត្តន៍របស់លោក សម រង្ស៊ី គឺជាឆន្ទៈបុគ្គលសុទ្ធសាធ ពីព្រោះការចាកចេញពីមាតុភូមិរបស់លោក សម រង្ស៊ី គឺជាជម្រើសផ្ទាល់ខ្លួន និងមានចរិតជាឯកជនរបស់បុគ្គលរូបនេះ។ លោកបញ្ជាក់ថា “ការប្រើប្រាស់មាតុភូមិនិវត្តន៍របស់សមរង្ស៊ី ទោះបីជាតាមរយៈក្រុម ឬអង្គការណាក៏ដោយ ដើម្បីបង្កើតជារូបភាពនយោបាយ ពាក់ព័ន្ធទៅនឹងសកម្មភាពនៃអតីតគណបក្សប្រឆាំង ដែលត្រូវបានរំលាយចោលទៅហើយនោះ តាមអំណាចសាលដីការបស់តុលាការកំពូលកាលពីថ្ងៃទី១៦ ខែវិច្ឆិកា ឆ្នាំ២០១៧ ត្រូវបានចាត់ទុកជាអំពើប្រឆាំងនឹងអំណាចតុលាការពិតប្រាកដ ដែលច្បាប់បានកំណត់ និងហាមប្រាម”។
តាមលោក ផៃ ស៊ីផាន “រាជរដ្ឋាភិបាលសូមបញ្ជាក់ថា នៅតែរក្សា និងគោរពអនុវត្តនូវគោលការណ៍ប្រជាធិបតេយ្យនៃការបែងចែកអំណាចដាច់ដោយឡែកពីគ្នារវាងអំណាចនីតិប្រតិបត្តិនិងអំណាចតុលាការក៏ដូចជាអំណាចនីតិបញ្ញត្តិផងដែរ។ នៅក្នុងបរិការណ៍នេះ បើមានការស្នើសុំណាមួយពីតុលាការរាជរដ្ឋាភិបាលក៏ដូចជាសមត្ថកិច្ចពាក់ព័ន្ធ និងចាត់វិធានការអនុវត្តតាមអំណាចផ្លូវច្បាប់”។
សូមបញ្ជាក់ថា កាលពីរសៀលថ្ងៃទី២០ ខែមករា ឆ្នាំ២០១៩ មនុស្សមួយក្រុម ដែលគេឲ្យឈ្មោះថា “គណៈកម្មាធិការអចិន្ត្រៃយ៍គណបក្សសង្គ្រោះជាតិ” ហើយជាក្រុមស្ម័គ្រស្មោះលោក សម រង្ស៊ី នោះ បានជួបប្រជុំគ្នានៅទីក្រុងឡូវែល (Lowell) រដ្ឋម៉ាហ្សាជូសេត (Massachusetts) សហរដ្ឋអាមេរិក ហើយបានសម្រេច៣ចំណុច ក្នុងនោះក៏មានចំណុចឲ្យលោក សម រង្ស៊ី ចូលមកកម្ពុជាវិញផងដែរ។
ក្រោយពីមានសេចក្តីសម្រេចនេះ អតីតអ្នកគាំទ្រគណបក្សសង្គ្រោះជាតិ ប្រចាំនៅសហរដ្ឋអាមេរិក បានចេញសេចក្តីថ្លែងការណ៍មួយ ប្រកាសបដិសេធចំពោះការសម្រេចរបស់កិច្ចប្រជុំនោះ ដឹកនាំដោយលោក សម រង្ស៊ី នោះ ដោយសំអាងថា វាគ្រាន់តែជាការសម្រេចរបស់ក្រុមប្រធានស្តីទីក្លែងក្លាយប៉ុណ្ណោះ មិនអាចចាត់ទុកជាសេចក្តីសម្រេចរបស់គណបក្សនោះឡើយ៕
Source: Kampuchea Thmey Daily
0 Comments