ស្វាយរៀង ៖ នៅផ្សារវាលយន្ត ក្រុងស្វាយរៀង មានការភ្ញាក់ផ្អើលទាំងព្រឹកព្រលឹម ខណៈដែលមានជនមិនស្គាល់មុខ បានពួនបាញ់ចម្ពាមកៅស៊ូ ជាមួយគ្រាប់ឃ្លីដែក សំដៅទៅលើតូបលក់ទូរស័ព្ទដៃមួយកន្លែង ដែលមានស្លាកយីហោដារ៉ា តែមិនបង្កគ្រោះថ្នាក់ដល់អ្នកលក់ឡើយ គ្រាន់តែត្រូវទូតាំងទូរស័ព្ទ និងជញ្ជាំងតូបប៉ុណ្ណោះ។
ហេតុការណ៍នេះ បានកើតឡើងកាលពីវេលាម៉ោង០៦និង៤០នាទីព្រឹក ថ្ងៃទី១៦ ខែមករា ឆ្នាំ២០១៩ត្រង់ចំណុចមុខផ្សារវាលយន្ត ស្ថិតក្នុងភូមិវាលយន្ត សង្កាត់ស្វាយរៀង ក្រុងស្វាយរៀង ខេត្ត ស្វាយរៀង។
បើតាមសមត្ថកិច្ចក្រុងស្វាយរៀងបានឲ្យដឹងថា មានករណីបាញ់គ្រាប់ឃ្លីដែក ពីជនសង្ស័យមិនស្គាល់អត្តសញ្ញាណ បានធ្វើសកម្មភាពបាញ់ចម្ពាមគ្រាប់ឃ្លីដែកចំនួនពីរគ្រាប់ទៅលើតូបលក់ទូរស័ព្ទដៃខាងលើ បណ្តាលឲ្យត្រូវចំទូតាំងលក់ទូរស័ព្ទមួយគ្រាប់ និងត្រូវជញ្ជាំងតូបមួយគ្រាប់ មិនបង្កឲ្យមានគ្រោះថ្នាក់ដល់មនុស្សទេ។
សមត្ថកិច្ចបានបន្តទៀតថា ម្ចាស់តូបឈ្មោះ យោគ ចាន់ដាវី ភេទស្រី អាយុ៣៣ឆ្នាំ មុខរបរលក់ទូរស័ព្ទ រស់នៅភូមិ វាលយន្ត សង្កាត់ស្វាយរៀង ក្រុងស្វាយរៀង។
បើតាមសម្ដីម្ចាស់តូបលក់ទូរស័ព្ទ ដែលមានយីហោ ដារ៉ា បានប្រាប់ឲ្យដឹងថា រាល់ព្រឹក គាត់ក្រោកពីព្រលឹមដើម្បីរៀបចំអីវ៉ាន់សម្រាប់លក់ដូចសព្វមួយដង តែថ្ងៃនេះ គាត់ចាប់ផ្ដើមរៀបបានតែបន្តិច ក៏ឮសូរសំឡេងប្រាវៗចំនួនពីរដងចំទូខាងលិចផ្ទួនៗគ្នាតែម្តង ស្រាប់តែឃើញធ្លុះទូលក់មួយគ្រាប់ និងត្រូវជញ្ជាំងតូបមួយគ្រាប់ទៀត។
បើតាមការបញ្ជាក់ពីម្ចាស់តូបលក់ទូរស័ព្ទខាងលើបានឲ្យដឹងទៀតថា រូបគាត់មិនដែលមានទំនាស់ជាមួយអ្នកណាឡើយ ក្នុងការប្រកបរបរលក់ទូរស័ព្ទ ហើយការបាញ់មកលើតូបគាត់ក៏មិនដឹងមូលហេតុយ៉ាងណានោះដែរ។ ទោះបីយ៉ាងណា ម្ចាស់តូបលក់ទូរស័ព្ទខាងលើ អំពាវនាវដល់សមត្ថកិច្ចជួយស្រាវជ្រាវចាប់ជនសង្ស័យមកផ្ដន្ទាទោសទៅតាមច្បាប់ផងដែរ៕
Source: Kampuchea Thmey Daily
0 Comments