លោក​បណ្ឌិត អ៊ុក រ៉ាប៊ុន ពិនិត្យ​ការដ្ឋាន​ស្ថាបនា​ផ្លូវ​ក្រាល​កៅស៊ូ​ពីរ​ជាន់ ​នៅ​ស្រុក​សូត្រ​និគម ​ខេត្ត​សៀមរាប​

​សៀមរាប ​៖ លោក​បណ្ឌិត អ៊ុក រ៉ាប៊ុន រដ្ឋមន្ត្រី​ក្រសួង​អភិវឌ្ឍន៍​ជនបទ រួម​ដំណើរ​ដោយ ឯកឧត្ដម សួស គង់ ឯកឧត្ដម នួន ដា​ញ៉ិល រដ្ឋលេខាធិការ ឯកឧត្ដម​អនុរដ្ឋលេខាធិការ ព្រមទាំង​មន្ត្រី​បច្ចេក​ទេស បាន​អញ្ជើញ​ទៅពិនិត្យ​ការដ្ឋាន​ស្ថាបនា​ផ្លូវ​ក្រាល​កៅស៊ូ​ពីរ​ជាន់​មួយ​ខ្សែ​មាន​ប្រវែង១៧ គ​.​ម នៅ​ស្រុក​សូត្រ​និគម​ខេត្តសៀមរាប នា​ថ្ងៃទី​១៥ ខែមករា ឆ្នាំ​២០១៩។
​
លោក ខេង ញ៉ុ​ល ប្រធាន​មន្ទីរ​អភិវឌ្ឍន៍​ជនបទ​ខេត្ត​សៀមរាប បាន​ឲ្យ​ដឹងថា ផ្លូវ​ដែល​កំពុង​ស្ថាបនា​
នាពេលនេះ មាន​ទីតាំង​ត​ភ្ជាប់​ពី​ផ្លូវជាតិ​លេខ៦ ត្រង់ចំណុច​ភូមិ​ខ្ចាស់​ឃុំ​ខ្ចាស់​ ដោយ​ឆ្លងកាត់​ឃុំ​ចាន់ ស និង​ឃុំ​ខ្នារ​ពោធិ៍​ស្រុក​សូត្រ​និគម ជា​ផ្លូវ​ក្រាល​កៅស៊ូ​ពីរ​ជាន់​ប្រភេទ DBST ដោយ​ស្ថាបនា​ក្នុង​ក្រប​ខ័ណ្ឌ​គម្រោង​កែលំអ​ផ្លូវ​ជនបទ​ជំហាន​ទី​២ របស់​ក្រសួង​អភិវឌ្ឍន៍​ជនបទ លទ្ធផល ​នៃ​ការ​សាងសង់​សម្រេចបាន​២២% ហើយ​។ គ្រោង​នឹង​បញ្ចប់​នៅ​ក្នុង​ខែ​សីហា ឆ្នាំ​២០១៩។

លោក​ប្រធាន​មន្ទីរ បាន​បន្តថា នៅ​ខេត្ត​សៀមរាប ក្នុង​គម្រោង​កែលំអ​ផ្លូវ​ជនបទ ជំហាន​ទី​២ របស់​ក្រសួង​អភិវឌ្ឍន៍​ជនបទ​ដែល​បាន និង​កំពុង​ដំណើរការ​ការដ្ឋាន​ផ្លូវ​ក្រាល​កៅស៊ូ​ពីរ​ជាន់​ប្រភេទ DBST មាន​ចំនួន​៦​ខ្សែ សរុប​ប្រវែង​១២២​គ​.​ម ក្នុងនោះ​មាន​ផ្លូវ​ពី​ស្រែណូយ​ទៅ​ប្រាសាទ ក្នុងស្រុក​វ៉ារិន​ប្រវែង​៣៣,៣ គ​.​ម។ ផ្លូវ​ពី​ខ្នារ ទៅ​កែវ​ពណ៌ ​ក្នុងស្រុក​ពួក​ប្រវែង​១០ គ​.​ម។ ផ្លូវ​ពី ចារ​ឈូក​ទៅ​មោង​ក្នុងស្រុក​អង្គរជុំ និង​ស្រុក​ស្រីស្នំ​ប្រវែង​២១,៦ គ​.​ម។

ផ្លូវ​ពី​តា​សោម​ទៅ​គោក​ដូង​ក្នុងស្រុក​អង្គរជុំ​ប្រវែង​១០,៦ គ​,​ម។ ផ្លូវ​ពី​ស្រុក​អង្គរជុំ​ទៅ​ស្រុក​ពួក​ប្រវែង ២៩,៥ គ​. ម និង​ផ្លូវ​ពី​ឃុំ​ខ្ចាស់​ទៅ​ឃុំ​ខ្នារ​ពោធិ៍ ​ស្រុក​សូត្រ​និគម​ប្រវែង​១៧​គ​.​ម ​ដែល​កំពុង​ដំណើរការ​នា​ពេលនេះ​។ ក្នុងឱកាស​ចុះ​ពិនិត្យ​ការដ្ឋាន លោក​បណ្ឌិត អ៊ុក រ៉ាប៊ុន បាន​មានប្រសាសន៍ថា គម្រោង​កែលំអ​ផ្លូវ​ជនបទ​ជំហាន​ទី​២ ជា​គម្រោង​របស់ រាជរដ្ឋាភិបាល គ្រប់គ្រង​ដោយ​ក្រសួង​អភិវឌ្ឍន៍​ជនបទ ដោយ​ធ្វើការ​កែលំអ​ផ្លូវ​ក្រាល​ក្រួស​ក្រហម​នៅ​ជនបទ​ឲ្យ​ទៅជា​ផ្លូវ​ក្រាល​កៅស៊ូ​ពីរ​ជាន់​ប្រភេទ DBST ដើម្បី​បង្ក​លក្ខណៈ ងាយស្រួល​ដល់​ការ​ធ្វើ​ដំណើរ និង​ការ​ដឹកជញ្ជូន​របស់​ប្រជាពលរដ្ឋ។

គម្រោង​នេះ​ អនុវត្ត​នៅ​ក្នុង​ខេត្ត​គោលដៅ​ទាំង​១០ ងាយស្រួល​ទៅកាន់​ទីផ្សារ ស្វែងរក​ការងារ​ធ្វើ ងាយ​ស្រួល​ក្នុងការ​ទទួលបាន​សេវា​សង្គម។ ជាមួយនេះ ​គម្រោង​បាន​ផ្ដោត​ការយកចិត្តទុកដាក់​ទៅ​លើ​សុវត្ថិភាព​សង្គម និង​ធ្វើ​ឲ្យ​មាន​ភាព​ធន​និង​ការ​បម្រែបម្រួល​អាកាសធាតុ​ផងដែរ។

លោក​បណ្ឌិត​បាន​បន្ត​ថា គម្រោង​កែលំអ​ផ្លូវ​ជនបទ​ជំហាន​ទី​២ មាន​រយៈពេល​៦​ឆ្នាំ ចាប់ផ្ដើម​ពី​ឆ្នាំ ២០១៥ ដល់ ឆ្នាំ​២០២០ មាន​ថវិកា​សរុប​១៩២,៧១​លាន​ដុល្លារ​អាមេរិក ក្នុង​នោះ​មាន​ថវិកា​បដិភាគ​របស់​រាជ​រដ្ឋាភិបាល​កម្ពុជា ធនាគារ​អភិវឌ្ឍន៍​អាស៊ី (ADB) ធនាគារ​អាហរ័ណ នីហរ័ណ​កូរ៉េ (Kexim Bank)​រដ្ឋាភិបាល​អូស្ត្រាលី (Australian Govenement ) មូលនិធិ​អភិវឌ្ឍន៍​ណ័​រ​ឌិ​ក (NDF) ទីភ្នាក់ងារ​បារាំង​សម្រាប់​អភិវឌ្ឍន៍ (AFD) និង​មូលនិធិ​អាកាសធាតុ​ជា​យុទ្ធសាស្ត្រ (Strategies Climate Fund )​សម្រាប់​ស្ថាបនា​ផ្លូវ​ក្រាល​កៅស៊ូ​ពីរ​ជាន់​ប្រភេទ​DBST សរុប​ប្រវែង​១.២០០​គ​.​ម នៅ​ក្នុង​ខេត្ត​គោលដៅ​ទាំង​១០​គឺ ខេត្ត​ត្បូងឃ្មុំ កំពង់ចាម តាកែវ កំពង់ស្ពឺ កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ ខេត្ត​កំពង់ធំ និង​ខេត្ត​សៀមរាប។

លោក​រដ្ឋមន្ត្រី​បាន​បន្តទៀតថា រាជរដ្ឋាភិបាល ​ដែលមាន​សម្ដេច​អគ្គ​មហា​សេនាបតី​តេ​ជោ ហ៊ុន សែន ជា​នាយករដ្ឋមន្ត្រី នៅតែ​បន្ត​អនុវត្ត​នយោបាយ​ហេដ្ឋារចនាសម្ព័ន្ធ​ ដើម្បី​ឲ្យ​ប្រជាពលរដ្ឋ​ងាយ​ស្រួល​ក្នុងការ​ធ្វើដំណើរ​ដឹកជញ្ជូន​ផលិតផល ​និង​ទំនាក់ទំនង​ទៅកាន់​តំបន់​ទទួល​សេវា​សាធារណៈ​ទាន់​ពេលវេលា​។

លោក​បណ្ឌិត​រដ្ឋមន្ត្រី អ៊ុក រ៉ាប៊ុន បាន​អំពាវនាវ​សុំ​ឲ្យ​អាជ្ញាធរ​ដែនដី​គ្រប់​លំដាប់​ថ្នាក់ ប្រជាពលរដ្ឋ​ដែល​មាន​ដែលមាន​លំនៅដ្ឋាន​តាម​ដងផ្លូវ ចូលរួម​សហការ​ឲ្យ​បាន​ល្អ​ជាមួយ​អ្នកទទួល​ការសាងសង់ ព្រមទាំង​បាន​ផ្ដាំផ្ញើ​ដល់​មន្ត្រី បច្ចេកទេស ប្រចាំការ​នៅ​ការដ្ឋាន​អនុវត្ត​ឲ្យ​បាន​ត្រឹមត្រូវ​តាម​គំនូស​ប្លង់ និង​បទដ្ឋាន​បច្ចេកទេស​ដើម្បី​ធានា​បាន​ទាំង​គុណភាព និង​សោភ័ណភាព៕


​

Source: Kampuchea Thmey Daily