ភ្នំពេញ ៖ រដ្ឋបាលខណ្ឌដូនពេញ បានបន្តចុះអនុវត្តរៀបចំសន្តិសុខសណ្ដាប់ធ្នាប់របៀបរៀបរយសាធារណៈ និងអនាម័យ ក្នុងមូលដ្ឋាន ចាប់ពីម៉ោង០៧និង០០នាទីព្រឹក ដល់ម៉ោង២២និង០០នាទីយប់ ជាប្រចាំ។
ជាក់ស្ដែងទៀតនោះ នៅព្រឹកថ្ងៃទី១៧ ខែមករា ឆ្នាំ២០១៩ នេះ លោក សុខ ពេញវុធ អភិបាល នៃគណៈអភិបាលខណ្ឌដូនពេញ បានបញ្ជាឲ្យ លោក យស យុទ្ធី អភិបាលរងខណ្ឌ បន្តដឹកនាំកម្លាំងគណៈបញ្ជាការឯកភាពរដ្ឋបាលខណ្ឌ ចុះរៀបចំសណ្ដាប់ធ្នាប់ របៀបរៀបរយសាធារណៈ និងអនាម័យ តាមដងផ្លូវ និងទីតាំងសំខាន់ៗមួយចំនួនទៀតក្នុងមូលដ្ឋាន ដោយចាប់ផ្ដើមពីម៉ោង០៧ព្រឹក ដល់ម៉ោង១១និង០០នាទី និង ពីម៉ោង១៥និង០០នាទី ដល់ម៉ោង២២និង០០នាទីយប់ ជាប្រចាំ ដើម្បីធានាបាននូវសណ្ដាប់ធ្នាប់របៀបរៀបរយសាធារណៈ និងអនាម័យ ក្នុងនោះ បានធ្វើការបាញ់លាងសម្អាត សួនច្បារ និងទីតាំងសំខាន់ៗមួយចំនួនទៀត ព្រមទាំងបានសហការជាមួយកម្លាំងអធិការដ្ឋាននគរបាលខណ្ឌ និងសង្កាត់ពាក់ព័ន្ធ ចុះរៀបចំសណ្ដាប់ធ្នាប់ផ្លូវជុំវិញអតីតទីលានប្រជាធិបតេយ្យ (ផ្លូវលេខ១០៦-១០៨) មហាវិថីព្រះមុនីវង្ស មហាវិថីព្រះសីហនុ ផ្លូវសុធារស តីរវិថីស៊ីសុវត្ថិ ផ្លូវប៉ាស្ទ័រ ផ្លូវត្រសក់ផ្អែម ផ្លូវលេខ១៩ ផ្លូវលេខ១១០ ផ្លូវលេខ១១៨ ផ្លូវលេខ១៣០ ផ្លូវលេខ១៣៦ ផ្លូវលេខ១៤៤ ផ្លូវលេខ១៤៨ ផ្លូវលេខ១៥៤ និងផ្លូវសំខាន់ៗមួយចំនួនទៀតក្នុងមូលដ្ឋាន ដើម្បីបង្កលក្ខណៈងាយស្រួលដល់បងប្អូនប្រជាពលរដ្ឋធ្វើដំណើរឆ្លងកាត់ និងទទួលបានសណ្ដាប់ធ្នាប់របៀបរៀបរយល្អប្រសើរថែមទៀត។
មិនតែប៉ុណ្ណោះ ក៏បានធ្វើការផ្សព្វផ្សាយ និងណែនាំដោយផ្ទាល់ ដល់បងប្អូនប្រជាពលរដ្ឋ អ្នកលក់ដូរ ឲ្យរក្សាទុកចិញ្ចើមផ្លូវទំហំ១ភាគ៣ ដើម្បីសម្រួលដល់ការធ្វើដំណើរ និងបានធ្វើការឃាត់លើកយានយន្តដែលឈប់ចតគ្មានសណ្ដាប់ធ្នាប់ សរុបចំនួន១១គ្រឿង ក្នុងនោះ ម៉ូតូចំនួន០៧គ្រឿង ម៉ូតូកង់បី០១គ្រឿង និង រថយន្តចំនួន០៣គ្រឿង បញ្ជូនមករក្សាទុក និងអប់រំណែនាំនៅសាលាខណ្ឌដូនពេញផងដែរ៕
Source: Kampuchea Thmey Daily
0 Comments