ពលរដ្ឋក្នុងក្រុងបានលុង បានសម្ដែងនូវការសាទរចំពោះការពង្រីកផ្លូវ ក្នុងក្រុង

Cambodia News January 23, 2019

រតនគិរី ៖ ប្រជាពលរដ្ឋក្នុងក្រុងបានលុង ខេត្តរតនគិរី ជាពិសេសប្រជាពលរដ្ឋរស់នៅតាមដងផ្លូវ ដែលត្រូវពង្រីក បានសម្តែងនូវការសាទរយ៉ាងខ្លាំងចំពោះ លោក ថង សាវុន អភិបាលខេត្ត ដែលបានធ្វើការពង្រីកផ្លូវក្នុងក្រុងឲ្យកាន់តែធំជាងមុន។

បងស្រី ណាក់ និងបងស្រី គន្ធា ដែលមានលំនៅឋានសងខាងផ្លូវ បានលើកឡើងស្រដៀងគ្នាថា ពួកគាត់សប្បាយរីករាយណាស់ ដែលបានផ្លូវធំងាយស្រួលក្នុងការធ្វើដំណើរ ជាពិសេសសម្រួលដល់ការស្ទះចរាចរណ៍ជាដើម និងសូមថ្លែងអំណរគុណចំពោះលោកអភិបាលខេត្ត ដែលបានខិតខំប្រឹងប្រែងអភិវឌ្ឍន៍ទីក្រុងឥតឈប់ឈរធ្វើឲ្យទីក្រុងបានលុងមានភាពស្រស់បំព្រង ពីមួយថ្ងៃ ទៅមួយថ្ងៃ។

លោក ផាត់ សុភា នាយកហិរញ្ញវត្ថុសាលាខេត្តបានឲ្យដឹងថា ការពង្រីកផ្លូវនេះ គឺប្រើប្រាស់ថវិកាសាលាខេត្ត ហើយការពង្រីក គឺចាប់ពីកែងផ្លូវលេខ២៣(កែងបំបែកជាបួន ទល់មុខសាលាគ្រូយើង)មកដល់ផ្លូវកែងលេខ២៧(កែងបំបែកជាបួនបាសាំងទឹក) សរុបប្រវែង៤៦០ម៉ែត្រ ដោយធ្វើការពង្រីកទទឹង១០ម៉ែត្រ ក្រាលកៅស៊ូប្រភេទDBST លើផ្លូវកៅស៊ូចាស់៧ម៉ែត្រ។

លោក ផាត់ សុភា បានបន្តថា គម្រោងចំណាយលើការពង្រីកផ្លូវនេះ សរុបប្រមាណជាង៦០០លានរៀល៕