រតនគិរី ៖ បុរសម្នាក់ បានរងរបួសធ្ងន់ធ្ងរ បន្ទាប់ពីផឹកស្រាស្រវឹង ដើររករឿងគេឯង គេទ្រាំមិនបានដាក់មួយដៃមួយជើងហូរឈាមពេញខ្លួន ហើយរត់គេចខ្លួនបាត់។
ករណីអំពើហិង្សានេះ បានកើតឡើងនៅវេលាម៉ោង៧និង៣០នាទីយប់ ថ្ងៃអង្គារ ២រោច ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២២ ខែមករា ឆ្នាំ២០១៩កន្លងទៅ ស្ថិតនៅក្នុងភូមិកាតែ ឃុំម៉ាលិក ស្រុកអណ្ដូងមាស។
មន្ត្រីនគរបាលស្រុកអណ្តូងមាសបានឲ្យដឹងថា ជនរងគ្រោះមានឈ្មោះ ហម ហាន ភេទប្រុស អាយុ៣១ឆ្នាំ របួសធ្ងន់ មានមុខរបរមេការចម្ការកៅស៊ូ។
លោក ជាតិ សុផាន់ណា (ម្ចាស់ចម្ការ) ដែលរស់នៅភូមិ/ឃុំកើតហេតុខាងលើបានឲ្យដឹងថា ជនរងគ្រោះ ត្រូវបានអ្នកភូមិកាតែ ឃុំម៉ាលិក ចំនួនប្រហែល៥នាក់ព្រួតគ្នាវាយនឹងដៃ និងខ្សែក្រវាត់ជាច្រើន បណ្ដាលឲ្យបែកក្បាលហូរឈាមស្រោចពេញខ្លួន ហើយជនបង្កក្រោយពីធ្វើសកម្មភាពបាននាំគ្នារត់គេចខ្លួនបាត់អស់។
ចំណែកជនរងគ្រោះ បានស្គាល់មុខជនដៃដល់ទាំងនោះហើយ ទុកឲ្យសមត្ថកិច្ចចាត់វិធានការទៅតាមផ្លូវច្បាប់បង្កឲ្យមានរបួសស្នាម។
ក្រោយពីកើតហេតុរួច សមត្ថកិច្ចបានចុះមកដល់កន្លែងកើតហេតុ ដឹកបញ្ជូនជនរងគ្រោះទៅសម្រាកព្យាបាលនៅមណ្ឌលសុខភាពស្រុកអណ្តូងមាស។
បច្ចុប្បន្ន សមត្ថកិច្ចជំនាញ កំពុងចុះស្រាវជ្រាវរកមុខជនដៃដល់យកមកផ្ដន្ទាទោសទៅតាមផ្លូវច្បាប់៕
Source: Kampuchea Thmey Daily
0 Comments