•នីម នន ជួប លីន វិរៈ
ប្រដាល់ ៖ អ្នកប្រដាល់ទម្ងន់៦៥គ.ក្រ ចំនួន៤រូប នឹងជួបគ្នាដើម្បីប្រកួតដណ្តើមយកពានរង្វាន់ប្រាក់លានរបស់ស្ថានីយទូរទស្សន៍បាយ័ន។ អ្នកខ្លាំងទាំង៤រូបនោះ គឺវ៉ែន ហុងជីវ៉ុង អ្នកប្រដាល់ក្លិបមកុដរាជសីហ៍ , សំខាន់ ប៉ាវចិន អ្នកប្រដាល់ក្លិបរ៉ាហាប់ស្វាយប៉ាក , នូវ ដារ៉ូ អ្នកប្រដាល់ក្លិបអាណាចក្រគុនខ្មែរ និង ធឹម ទាន់ អ្នកប្រដាល់ក្លិបរាជសីហ៍ខេត្តរតនគិរី។
ការប្រកួតជម្រុះដណ្តើមពានរង្វាន់ប្រាក់លានទូរទស្សន៍បាយ័នទម្ងន់៦៥គីឡូក្រាម ឆ្នាំ២០១៩ នឹងចាប់ផ្តើមនៅល្ងាចថ្ងៃសៅរ៍ ទី១៩មករានេះ នៅលើសង្វៀនស្ទឹងមានជ័យ។
ក្នុងចំណោមអ្នកប្រដាល់ទាំង៤រូបនេះ សុទ្ធតែធ្លាប់ជួបគ្នាក្នុងការប្រកួតកន្លងមក គ្រាន់តែលើកនេះ គេផ្គូមិនឲ្យជួបគ្នាក្នុងវគ្គជម្រុះដំបូងប៉ុណ្ណោះ។ ការប្រកួតដណ្តើមពានរង្វាន់ប្រាក់លានទូរទស្សន៍បាយ័ន ដែលប្រព្រឹត្តទៅតាមរូបមន្តប្រកួតម៉ារ៉ាតុងនេះ គឺមានពីរវគ្គនេះ វគ្គជម្រុះលើកទី១ និង វគ្គផ្ដាច់ព្រ័ត្រ។
សម្រាប់ការប្រកួតវគ្គជម្រុះលើកទី១នោះ វ៉ែន ហុងជីវ៉ុងក្លិបមកុដរាជសីហ៍ នឹងត្រូវប៉ះជាមួយសំខាន់ ប៉ាវចិន ក្លិបរ៉ាហាប់ស្វាយប៉ាក ហើយនូវ ដារ៉ូ ក្លិបអាណាចក្រគុនខ្មែរ ប៉ះជាមួយ ធឹម ទាន់ ក្លិបរាជសីហ៍ខេត្តរតនគិរី។
រវាងវ៉ែន ហុងជីវ៉ុង និង សំខាន់ ប៉ាវចិន ពួកគេទាំងពីរ មិនធ្លាប់ជួបគ្នាទេ តែយ៉ាងណា២នាក់នេះ វ៉ែន ហុងជីវ៉ុង គេល្អនិងខ្លាំងជាងសំខាន់ ប៉ាវចិន។ យ៉ាងណា សំខាន់ប៉ាវចិន ថ្វីត្បិតតែជាអ្នកប្រដាល់ស្រករក្រោយ តែគេក៏វាយល្អនិងខ្លាំងដែរ។ ប៉ុន្តែយ៉ាងណាប្រហែលជាមិនអាចឈ្នះ ហុងជីវ៉ុងនោះទេ។
ឯ នូវ ដារ៉ូ ដែលត្រូវជួបជាមួយ ធឹម ទាន់ នោះ ក៏ពិបាកទស្សន៍ទាយដែរ ព្រោះពីរនាក់នេះពុំធ្លាប់ជួបគ្នា។ តែយ៉ាងណារវាងពួកគេពីរនាក់នេះ នូវ ដារ៉ូ ហាក់មានប្រៀបឈ្នះច្រើនជាង។
ដូច្នេះ ក្នុងចំណោម៤នាក់ខាងលើ អ្នកដែលអាចឈានទៅប្រកួតផ្តាច់ព្រ័ត្រនោះ គឺមានតែ វ៉ែន ហុងជីវ៉ុង និងនូវ ដារ៉ូ ដែលអាចនឹងឡើងទៅជួបគ្នានៅក្នុងវគ្គផ្ដាច់ព្រ័ត្រ។
គួរបញ្ជាក់ថា ការប្រកួតដណ្តើមប្រាក់លាននេះ ប្រព្រឹត្តិទៅតាមរូបមន្តជាការប្រកួតMarathon គឺចាញ់ហាលអាវ ឈ្នះត្រូវបន្តការប្រកួតទៀត ទាល់តែរកឃើញជើងឯកម្ចាស់ពាន ក្នុងពេលតែមួយ។
ដោយឡែក សម្រាប់ការប្រកួតគូឯកវិញនោះ គឺនីម នន អ្នកប្រដាល់ក្លិបកងពលតូចទ័ពឆ័ត្រយោង៩១១ នឹងជួបប្រកួតជាមួយលីន វិរៈ អ្នកប្រដាល់ក្លិបបូរីរាជសីហ៍មានរិទ្ធ។ ពួកគេទាំងពីរនេះ ប្រកួតគ្នាក្នុងទម្ងន់៥៧គីឡូក្រាម។
ពីរនាក់នេះ មិនធ្លាប់ជួបគ្នាទេកន្លងមក។ រវាងនីម នន និង លីន វិរៈនេះ អ្នកណាឈ្នះ អ្នកណាចាញ់ គឺសុទ្ធតែតឹងតែងនិងវេទនាហើយ ព្រោះអ្នកប្រដាល់ទាំងពីរនេះ សុទ្ធតែជាជើងខ្លាំងស្រករក្រោយដូចគ្នា។
នីម នន គេប្រកួតចុងក្រោយនេះ វាយឈ្នះសេក គឹមសាន្ត អ្នកប្រដាល់ក្លិបអង្គរមានជ័យខេត្តសៀមរាប ដោយពិន្ទុ ឯ លីន វិរៈ ប្រកួតចុងក្រោយគេវាយឈ្នះលី តឿន អ្នកប្រដាល់ក្លិបមកុដរាជសីហ៍ ដោយពិន្ទុ៕
Source: Kampuchea Thmey Daily
0 Comments