ភ្នំពេញ ៖ ពិតជាគួរឲ្យសរសើរ និងរំភើបចិត្តខ្លាំងណាស់ សម្រាប់មហាជន ក៏ដូចជាក្រុមគ្រួសាររបស់ក្មេងប្រុសដែលមានជំងឺចម្លែក(ធំពោះ) ខណៈដែលតារាសម្តែងស្រី កញ្ញា ពេជ្រ ចរណៃ ថ្មីៗនេះបានប្រកាសស្វែងរកទីកន្លែងស្នាក់របស់គាត់ដើម្បីជួយយកទៅព្យាបាលនៅមន្ទីរពេទ្យ។
តារាសម្តែងដែលកំពុងលេចសកម្មភាពខ្លាំងលើការងារមនុស្សធម៌ កញ្ញា ពេជ្រ ចរណៃ បានប្រកាសជាសាធារណៈនៅលើបណ្តាញសង្គមហ្វេសប៊ុកផ្ទាល់ខ្លួនភ្ជាប់ជាមួយរូបដ៏គួរឲ្យអាណិតរបស់ក្មេងប្រុសរូបនោះថា សូមកុំដាច់ចិត្តអូសរំលងអី សូមជួយស៊ែរផង នាងខ្ញុំប្រកាសស្វែងរកក្មួយប្រុសម្នាក់នេះ បើមានបងប្អូនណាស្គាល់ក្មួយប្រុសក្នុងរូបនេះទេ សូមជួយទាក់ទងមកខ្ញុំផង តើក្មួយកុំពុងតែយំយ៉ាងណាទេ?។
តារាសម្តែងរូបស្រស់ កញ្ញា ពេជ្រ ចរណៃ បានធ្វើការបញ្ជាក់បន្ថែមទៀតថា ក្មួយពិបាកក្នុងខ្លួនខ្លាំងណាស់មែនទេ? ទ្រាំចាំបន្តិចណា មីង នឹងខំស្វែងរកក្មួយឲ្យឃើញក្នុងពេលឆាប់ៗនេះ ដើម្បីយកក្មួយមកព្យាបាលណា…..។ យ៉ាងណាមិញ គិតមកទល់ពេលនេះ គេពុំទាន់ដឹងច្បាស់នៅឡើយទេថា ក្មេងប្រុសកម្សត់ម្នាក់នេះមានទីកន្លែងស្នាក់នៅស្ថិតក្នុងភូមិ ស្រុក ឬខេត្តណានៅឡើយទេ ខណៈមានទស្សនិកជនជាច្រើនក៏បានបង្ហាញការអាណិតអាសូរផងនោះ។
ស្របពេលជាមួយគ្នា នៃការប្រកាសរបស់ កញ្ញា ពេជ្រ ចរណៃ នេះដែរ ក៏មានអ្នកលេងបណ្តាញសង្គមហ្វេសប៊ុកលើកឡើងថា តើក្មួយពិបាកយ៉ាងណាទៅ តែពេលនេះ ខ្ញុំសប្បាយចិត្តមានប្អូនស្រី ពេជ្រ ចរណៃ កំពុងចង់ជួយក្មួយ តែមិនដឹងទាក់ទងតាមណា? ហើយនៅកន្លែងណា? បើបងប្អូនដឹងថា ក្មួយនៅឯណាជួយប្រាប់ផង។ ដូច្នេះ តាមរយៈការប្រកាសខាងលើនេះ និងការផ្តល់ដំណឹងពីទីកន្លែងស្នាក់នៅរបស់ក្មេងប្រុសរូបនេះឆាប់ៗ ដើម្បីបាននាំគាត់យកជួយសង្គ្រោះពីជំងឺចម្លែកបែបនេះ៕
Source: Kampuchea Thmey Daily
0 Comments