កំពត ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជាបានប្រតិកម្មតបតទៅអតីតមេបក្សប្រឆាំង សម រង្ស៊ី ដែលមានផែនការត្រឡប់មកកម្ពុជាវិញ ដោយសម្តេចពន្យុះថែមឲ្យអតីតមេបក្សប្រឆាំង រូបនេះត្រឡប់មកកម្ពុជាឲ្យបានឆាប់ដូចការប្រកាសរបស់ខ្លួន។ សម្តេចប្រកាសថា ខ្ញុំរង់ចាំយ៉ាងអន្ទះសា។
សម្តេចតេជោនាយករដ្ឋមន្ត្រីបានសំដែងប្រតិកម្មតបតនេះនៅក្នុងពិធីជួបសំណេះសំណាលជាមួយកម្មករ-កម្មការិនីនៅខេត្តកំពតកាលពីព្រឹកថ្ងៃទី២៥ ខែមករា ឆ្នាំ២០១៩។
សម្តេចតេជោ ហ៊ុន សែម មានប្រសាសន៍ថា «ប្រកាសទៅផែនការរៀបចំយ៉ាងម៉េច ទៅពីព្រលានយន្តហោះណា អ្នកណា ទៅរង់ចាំកន្លែងណា ហើយអង្គការសហប្រជាជាតិអមដំណើរពេលណាធ្វើទៅ សូមអញ្ជើញ...តើ ហ៊ុន សែន ចាត់ការរបៀបណា»។
សម្តេចតេជោ ហ៊ុន សែន បន្តថា «ខ្ញុំក៏ចង់ឲ្យអ្នកមកទីកន្លែងដែលអ្នកត្រូវនៅ តាមសាលក្រមរបស់តុលាការ ។ ខ្ញុំរង់ចាំយ៉ាងអន្ទះសា ។ ស្តាយណាស់ដែលឲ្យអ្នកឯងរត់រួចឥឡូវបានអ្នកឯងមកវិញ គឺស្មើនឹងដើររកអុសប្រទះឈើងាប់»។ ជាមួយនេះ សម្តេចតេជោនាយករដ្ឋមន្ត្រីបានព្រមានចំពោះអ្នកដែលចង់រួមដំណើរជាមួយសមរង្ស៊ីថា «អ្នកមិនពាក់ព័ន្ធមិនចង់ចូលគុក កុំចង់ចូលប្រថុយជាមួយ»។
សម្តេចតេជោនាយករដ្ឋមន្ត្រីបានបន្តថា ម្សិលមិញសម្តេចក្រឡាហោម ស ខេង បានបញ្ជាក់ប្រាប់សម្តេចថា យើងបានទទួលពីតុលាការរួចហើយនូវដីកាចាប់ខ្លួន សម រង្ស៊ី។
សម្តេចក្រឡាហោម ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃបានបញ្ជាក់ជាថ្មីនៅលើបណ្តាញសង្គម Facebook កាលពីថ្ងៃទី ២៤ ខែមករា ឆ្នាំ២០១៩ថា សមត្ថកិច្ចបានទទួលដីកាតុលាការដើម្បីចាប់ខ្លួនទណ្ឌិត សម រង្ស៉ី មេចលនាសង្គ្រោះជាតិរួចហើយ។
សម្តេចក្រឡាហោម ស ខេង បានបញ្ជាក់ថា «ការលើកឡើងរបស់លោក សម រង្ស៊ី ដែលនិយាយថា ខ្ញុំបានហាមឃាត់គាត់មិនឲ្យវិលត្រឡប់មកប្រទេសវិញនោះ គឺជាពាក្យសម្តីមួលបង្កាច់ដើម្បីបិទបាំងភាពកំសាករត់គេចចេញពីសំណាញ់ច្បាប់របស់ខ្លួនតែប៉ុណ្ណោះ។ ក្នុងនាមជាអ្នកដែលចូលរួមក្នុងឆាកនយោបាយ ខ្ញុំដូចជាមិនដល់ថ្នាក់ឆោតល្ងង់ប្រាប់ សម រង្ស៊ី មិនឲ្យវិលចូលស្រុកនោះទេ។ ប្រការនេះខុសទាំងស្រុងពីច្បាប់រដ្ឋធម្មនុញ្ញនិងអាចផ្តល់ឱកាសគ្រប់ពេលវេលាឲ្យ សម រង្ស៊ី មានលេសវាយប្រហារមកលើរូបខ្ញុំវិញ នៅពេលដែលសមត្ថកិច្ចបានទទួលដីកាដើម្បីចាប់ខ្លួន សម រង្ស៊ី រួចហើយ»។
ការប្រកាសរបស់សម្តេចតេជោនាយករដ្ឋមន្ត្រីបានធ្វើឡើង បន្ទាប់ពីទណ្ឌិត សម រង្ស៊ី បានលើកឡើងជាបន្តបន្ទាប់ថា នឹងវិលត្រឡប់មកកម្ពុជាវិញ ។ កាលពីថ្ងៃទី២០ ខែមករា ឆ្នាំ២០១៩ អតីតមេគណបក្សប្រឆាំងបានបើកកិច្ចប្រជុំគណៈកម្មាធិការអចិន្ត្រៃយ៍របស់ខ្លួននៅសហរដ្ឋអាមេរិកដើម្បីកំណត់ផែនការជាក់លាក់ពីការធ្វើមាតុភូមិនិវត្តរបស់លោក សម រង្ស៊ី។
សម រង្ស៊ី បានប្រកាសជាច្រើនលើកច្រើនសា ថា នឹងចូលមកស្រុកខ្មែរវិញ នៅក្នុងឆ្នាំ២០១៩នេះ ប៉ុន្តែមិនដឹងថ្ងៃណាច្បាស់លាស់នោះទេ។ គណៈកម្មាធិការអចិន្ត្រៃយ៍គណបក្សសង្គ្រោះជាតិកាលពីថ្ងៃ២០ ខែមករា ឆ្នាំ២០១៩ កន្លងមកនេះថា បានរៀបចំឲ្យមានដំណើរវិលចូលស្រុករបស់លោក សម រង្ស៊ី ដោយធ្វើនយោបាយកៀរគរចំនួន ៥ ចំណុចរួមមាន៖ ទី១-រៀបចំកម្លាំងដើម្បីត្រៀមទទួលលោក សម រង្ស៊ី ចូលស្រុកវិញ។ ទី២- ពង្រីកសកម្មភាពការទូត។ ទី៣- ពង្រឹងនិងពង្រីកការផ្សព្វផ្សាយព័ត៌មានក្រោមការគ្រប់គ្រងរបប ហ៊ុន សែន។ ទី៤-ធ្វើទំនាក់ទំនងជាមួយអ្នកប្រជាធិបតេយ្យជាមួយគណបក្សសង្គ្រោះជាតិដើម្បីធ្វើផ្លាស់ប្តូរជាវិជ្ជាមាននៅឆ្នាំ២០១៩នេះ ។ ទី៥- រៀបចំថវិកាសម្រាប់ការវិលចូលរបស់លោកសម រង្ស៊ី។
ទោះជាយ៉ាងណាមជ្ឈដ្ឋានអ្នកនយោបាយមួយចំនួននិងប្រជាពលរដ្ឋកម្ពុជាហាក់គ្មានជំនឿថា អតីតមេគណបក្សប្រឆាំងរូបនេះវិលត្រឡប់មកកម្ពុជានោះទេ ព្រោះនេះមិនមែនជាលើកទី១ ដែលមេបក្សប្រឆាំងរូបនេះបានប្រកាសថានឹងត្រឡប់មកកម្ពុជានោះទេ។
ជាមួយគ្នានេះដែរ សម្តេចតេជោ ហ៊ុន សែន ក៏បានបបួលពួកមនុស្សមួយចំនួនដែលតែងប្រើពាក្យថា ធ្វើទៅចេះតែក្រទៅៗ។ សម្តេចតេជោហ៊ុន សែន បានលើកឡើងថា អ្នកដែលនិយាយមួលបង្កាច់គេមិនដែលហ៊ានស្បថទេ។ អ្នកខ្លះ គេនិយាយថា ហ៊ុន សែន កាន់អំណាចកាន់តែក្រទៅៗ ឥឡូវហ៊ានស្បថទេ ? អ្នកទាំងឡាយដែលហ៊ាននិយាយថា ធ្វើទៅកាន់តែក្រទៅៗ តើហ៊ានស្បថទេ ? ពួកគេហ៊ានទេ ឆ្នាំ១៩៧៩ គេអត់មានអីដែរ ធ្វើម៉េចគេហ៊ានស្បថ បើស្បថ គឺរន្ទះបាញ់ងាប់ ។ ព្រោះថា បើខ្ញុំបបួលស្បថគឺអត់ស្បថតូចទេ គឺស្បថឲ្យងាប់ទាំងខ្លួនឯង ងាប់ទាំងម៉ែ ទាំងឪ ទាំងពូជ ប៉ុន្មានផៅសន្ដាន។
សម្តេចតេជោ បានលើកជាសំណួរថា សួរការពិតនោះ អ្នកដែលនិយាយថា ធ្វើទៅកាន់តែក្រទៅៗ វាមានឡានជិះមានម៉ូតូជិះ…ទេ។ សម្តេចបន្តថា គ្មានពេលណាក្រជាងចេញពីរបប ប៉ុល ពត ទេ ...។ សម្តេច ក៏បានលើកឡើងថា អ្នកដែលធ្លាប់អត់ស្បែកជើងពាក់រហូតមានឡានជិះ បែរជាមកបង្អាប់ថា ធ្វើជានាយករដ្ឋមន្ត្រីឲ្យពលរដ្ឋកាន់តែក្រទៅៗ។ សម្តេចបន្តថា អ្នកខ្លះនៅផ្ទះ តាំងពីដំបូលស្លឹករហូតដល់ស័ង្កសី រហូតដល់ប្រក់ក្បឿង ចង់អស់ហើយ។
សម្តេចក៏បានបន្ថែមទៀតថា ចំពោះអ្នកដែលស្រែកថា កាន់អំណាចនេះ បានអស់នេះអស់នោះ សុំសាកគិតមើលឡើងវិញ របប លន់ ណុល កាន់អំណាចបានជាង ៥ ឆ្នាំ។ ប៉ុល ពត កាន់អំណាចសាវហាវឃោរឃៅប្រើអាវុធ បានកាន់អំណាចបាន៣ឆ្នាំ៨ខែ និង២០ ថ្ងៃ។ហ៊ុន សែន កាន់តំណែងសរុប៤០ឆ្នាំ ប៉ុន្តែតំណែងស្នួលអំណាចខ្ពស់៣៤ឆ្នាំ ហើយបូកនឹង៥ ឆ្នាំ ហើយបន្ត៥ទៀត អ្នកឯងចាំមើលទៅ ។ បើ ហ៊ុន សែន គ្មានប្រជាជនគាំទ្រនោះទេ ហ៊ុន សែន មិនអាចមកឈរនៅទីនេះបានទេ៕
Source: Kampuchea Thmey Daily
0 Comments