រតនគីរី ៖ រថយន្តបាឡែនមួយគ្រឿង បើកបរលឿន បានជ្រុលចង្កូតទៅបុកបង្កាន់ដៃស្ពានរងការខូចខាតផ្នែកខាងមុខ តែមិនបណ្តាលឲ្យមនុស្សរងគ្រោះថ្នាក់ឡើយ។
ករណីបង្កគ្រោះថ្នាក់ចរាចរណ៍ដោយខ្លួនឯងបានកើតឡើង កាលពីវេលាម៉ោង៧និង៣០នាទីយប់ថ្ងៃព្រហស្បតិ៍ ៤រោច ខែបុស្ស ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី២៤ ខែមករា ឆ្នាំ២០១៩កន្លងទៅ តាមផ្លូវជាតិលេខ៧៨A ត្រង់ចំណុចស្ពានដែកមួយកន្លែង ស្ថិតក្នុងឃុំអូរជុំ ស្រុកអូរជុំ។
មន្ត្រីនគរបាលស្រុកអូរជុំបានឲ្យដឹងថា មុនពេលកើតហេតុរថយន្តបាឡែនបើកបរក្នុងទិសដៅពីត្បូងទៅជើង មកដល់ស្ពានទៅស្រុកវើនសៃ រថយន្តមួយគ្រឿងនេះ ក៏បានបើកគេចពីគោយន្តកែច្នៃជ្រុលចង្កូតទៅបុកចំពាក់កណ្តាលដៃស្ពាន បណ្តាលឲ្យរថយន្តរងការខូចខាតយ៉ាងដំណំ។
មន្ត្រីនគរបាលបន្តថា រថយន្តខាងលើនេះ ពណ៌ទឹកមាស ពាក់ស្លាកលេខភ្នំពេញ ២Y-០៣៣២ នៅក្នុងរថយន្តមានគ្នាចំនួន២នាក់ រួមទាំងអ្នកបើកបររថយន្តមិនត្រូវបានស្គាល់អត្តសញ្ញាណឡើយ។
បច្ចុប្បន្ន រថយន្ត ត្រូវបានម្ចាស់សណ្ដោងយកទៅជួសជុលនៅការ៉ាស់ដោយខ្លួនឯង មិនរំខានដល់សមត្ថកិច្ចមូលដ្ឋាននោះទេ។
ដោយឡែក ម្ចាស់រថយន្តបង្ក ធ្វើឲ្យរងការប៉ះពាល់ដល់ទ្រព្យសម្បត្តិរបស់រដ្ឋខាងលើ មិនត្រូវបានដឹងថា តើសមត្ថកិច្ចទាមទារសំណងប៉ុន្មាននោះឡើយ៕
Source: Kampuchea Thmey Daily
0 Comments