យោធាដ៏មានឥទ្ធិពលរបស់ប្រទេសវេណេហ្ស៊ូអេឡាបានបង្ហាញការគាំទ្រដល់លោក Nicolas Maduro កាលពីថ្ងៃព្រហស្បតិ៍ ខណៈមេដឹកនាំបក្សប្រឆាំងលោក Juan Guaido ដែលគាំទ្រដោយសហរដ្ឋអាមេរិក បានជំរុញឲ្យមានការជំទាស់ដោយផ្ទាល់ចំពោះសិទ្ធិអំណាចរបស់គាត់ ហើយជោគវាសនានៃប្រទេសដែលរងគ្រោះដោយវិបត្តិមួយនេះ កំពុងស្ថិតក្នុងភាពស្រពេចស្រពិល។
ខណៈដែលចំនួនអ្នកស្លាប់ដោយសារបាតុកម្មតាមដងផ្លូវបានកើនឡើងដល់២៦នាក់នោះ លោក Maduro បានប្រកាសបិទស្ថានទូតនិងស្ថានកុងស៊ុលរបស់វេណេហ្ស៊ូអេឡាប្រចាំសហរដ្ឋអាមេរិក, មួយថ្ងៃបន្ទាប់ពីរដ្ឋបាលរបស់លោកប្រធានាធិបតី Donald Trump បានប្រកាសថា របបរបស់គាត់គឺ “មិនស្របច្បាប់”។
ប្រទេសសម្បូរប្រេងប៉ុន្តែមានសេដ្ឋកិច្ចទ្រុឌឌ្រោមមួយនេះបានធ្លាក់ចូលទៅក្នុងភាពមិនប្រាកដប្រជាកាលពីថ្ងៃពុធនៅពេលលោក Guaido ដែលជាប្រមុខរដ្ឋសភាវ័យ៣៥ឆ្នាំបានប្រកាសខ្លួនឯងថាជា “ប្រធានាធិបតីស្តីទី” ដោយទទួលបានការគាំទ្រយ៉ាងឆាប់រហ័សពីរដ្ឋធានីវ៉ាស៊ីនតោននិងមហាអំណាចក្នុងតំបន់ជាច្រើនរួមមានទាំងប្រេស៊ីល អាហ្សង់ទីននិងកូឡុំប៊ីផងដែរ។
ការជាប់ឆ្នោតជាថ្មីរបស់លោក Maduro កាលពីឆ្នាំមុនត្រូវបានជំទាស់ដោយគណបក្សប្រឆាំងនិងទទួលរងការរិះគន់ជាអន្ដរជាតិប៉ុន្តែរហូតមកដល់ពេលនេះ មេដឹកនាំសង្គមនិយមរូបនេះនៅតែរក្សាភក្ដីភាពជាមួយយោធា។
លោក Vladimir Padrino រដ្ឋមន្ត្រីក្រសួងការពារជាតិរបស់ប្រទេសនេះបានប្រកាសថា លោក Maduro វ័យ៥៦ឆ្នាំគឺជា “ប្រធានាធិបតីស្របច្បាប់” ហើយបានប្តេជ្ញាការពារសិទ្ធិអំណាចរបស់គាត់ប្រឆាំងនឹងការប៉ុនប៉ង “ធ្វើរដ្ឋប្រហារ”។
បន្ទាប់ពីការដឹកនាំរបស់លោក Padrino, មេបញ្ជាការប្រាំបីនាក់ទៀតបានអះអាងជាថ្មីអំពីភាពស្មោះត្រង់និងការស្តាប់បញ្ជារបស់ពួកគេចំពោះមេដឹកនាំសង្គមនិយមរូបនេះនៅក្នុងសារដែលផ្សាយលើកញ្ចក់ទូរទស្សន៍ជាតិ។
ហើយតុលាការកំពូលបានបញ្ជាក់ឡើងវិញនូវភក្ដីភាពរបស់ខ្លួនចំពោះ “អំណាចស្របច្បាប់” របស់លោក Maduro។
ចំណែកឯនៅរដ្ឋធានីវ៉ាស៊ីនតោនឯណោះវិញ រដ្ឋមន្ត្រីការបរទេសអាមេរិកលោក Mike Pompeo បានបន្តដាក់សម្ពាធលើមេដឹកនាំឆ្វេងនិយមរូបនេះខណៈដែលសហរដ្ឋអាមេរិកបានអំពាវនាវឲ្យមានកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិស្តីពីវិបត្តិនេះជាបន្ទាន់។
លោក Maduro ខឹងសម្បារយ៉ាងខ្លាំងកាលពីថ្ងៃពុធដោយបានចេញបញ្ជាឲ្យអ្នកការទូតអាមេរិកចាកចេញពីប្រទេសនេះក្នុងរយៈពេល៧២ម៉ោងហើយកាលពីថ្ងៃព្រហស្បតិ៍ លោកបាននិយាយថា លោកនឹងកោះហៅអ្នកការទូតវេណេហ្ស៊ូអេឡាទាំងអស់មកពីសហរដ្ឋអាមេរិក។
ទន្ទឹមនឹងនេះដែរ ក្រសួងការបរទេសអាមេរិកបានបញ្ជាឲ្យបុគ្គលិកមិនសំខាន់របស់ខ្លួនត្រូវចាកចេញពីប្រទេសវេណេហ្ស៊ូអេឡាប៉ុន្តែបានបដិសេធសម្រាប់ការបណ្តេញចេញទាំងស្រុងដោយនិយាយថា ខ្លួននឹងរក្សាចំណងទាក់ទងការទូតជាមួយរដ្ឋាភិបាលរបស់លោកប្រធានាធិបតីស្តីទី Guaido៕ AFP
Source: Kampuchea Thmey Daily
0 Comments