ការប្រកួតប្រដាល់ដណ្តើមពានរង្វាន់ជើងឯកTV5 Knock Out Series by K.Cement ទម្ងន់ ៥៧គីឡូក្រាម លើសង្វៀន TV5 ព្រែកកំពឹស នៅថ្ងៃសៅរ៍ ទី២៦ ខែមករា ឆ្នាំ២០១៩នេះ ជាការប្រកួត លើកចុងក្រោយក្នុងជម្រុះវគ្គ១ ភាគ៤ផ្ដាច់ព្រ័ត្រ(៨នាក់ចុងក្រោយ) ដែលមានអ្នកប្រដាល់៤រូប គឺ គួន ប៊ុនហ៊ីម អ្នកប្រដាល់ក្លិបពន្លឺសាមគ្គី ,យ៉ន ពិសី ក្លិបសាលវ័ន្តកីឡា,យុគយក្សផ្លែ ក្លិបបូរីរាជសីហ៍មានរិទ្ធ និងម៉ន សាម៉េត ក្លិបកងចក្ររាជសីហ៍ ដើម្បីដណ្តើមយកកៅអីសម្រាប់វគ្គពាក់កណ្ដាលផ្ដាច់ព្រ័ត្រ។
សម្រាប់ការប្រកួតជម្រុះ១ភាគ៤ផ្ដាច់ព្រ័ត្រ លើកចុងក្រោយនេះ គួន ប៊ុនហ៊ីម នឹងជួបប្រកួតជាមួយយ៉ន ពិសី ហើយយុគ យក្សផ្លែ ជួបជាមួយ ម៉ន សាម៉េត។
រវាងគួន ប៊ុនហ៊ីម និង យ៉ន ពិសី នេះ ពួកគេមិនធ្លាប់ជួបគ្នាទេកន្លងមក។ ដូច្នេះ ជាការជួបគ្នាលើកទី១ សម្រាប់អ្នកប្រដាល់ទាំងពីរនាក់នេះ។ គួន ប៊ុនហ៊ីម ជាអ្នកប្រដាល់ជើងចាស់ ឯ យ៉ន ពិសី ជាអ្នកប្រដាល់ស្រករក្រោយ។
ទោះជាយ៉ាងណា សម្រាប់ការជួបគ្នារវាង គួន ប៊ុនហ៊ីម និង យ៉ន ពិសី នេះ ក្រុមអ្នកវិភាគប្រដាល់បានអះអាងថា គួន ប៊ុនហ៊ីម នឹងបានកៅអីសម្រាប់វគ្គពាក់កណ្ដាលផ្ដាច់ព្រ័ត្រ ព្រោះថា ប៊ុនហ៊ីម ដែលគេដឹងច្បាស់ថា ជាចាស់ និងជាជើងខ្លាំងយូរហើយ គេវាយស៊ូខ្លាំងណាស់។ ប៊ុនហ៊ីម មានកណ្ដាប់ដៃ និងជង្គង់ល្អ ហើយថែមទាំងមានចិត្តប្រដាល់ធំថែមទៀត។ ចាំមើល តើ យ៉ន ពិសី អាចយកឈ្នះ គួន ប៊ុនហ៊ីម បាន ឬអត់?។
គួន ប៊ុនហ៊ីម ប្រកួតក្នុងជុំទី២ គេបានយកឈ្នះ ជា ចំរើន ក្លិបអេ ភូថងកីឡា ដោយពិន្ទុដាច់តែម្តង។ ចំណែក យ៉ន ពិសី ប្រកួតជុំទី២ គេបានឈ្នះ ជ័យ ប៊ុនសង់ អ្នកប្រដាល់ក្លិបគីសែមានរិទ្ធ ដោយស្វ័យប្រវត្តិ ដោយសារតែ ប៊ុនសង់ រក្សាទម្ងន់៥៧គីឡូក្រាមពុំបាន។
សូមបញ្ជាក់ថា ការប្រកួតក្នុងជុំទី៣នេះ គឺប្រកួតតែបីទឹក ដោយក្នុងមួយទឹកមាន៣នាទី សម្រាក២នាទី ដូចកាលប្រកួតក្នុងជុំទី២ដែរ ហើយអ្នកដែលឈ្នះបានឡើង និងអ្នកដែលចាញ់ត្រូវជ្រុះធ្លាក់ត្រឹមនេះ។ ចំពោះការប្រកួតមួយគូទៀតនោះ ជាការជួបគ្នារវាង យុគ យក្សផ្លែ និង ម៉ន សាម៉េត។ អ្នកប្រដាល់ទាំងពីរនាក់នេះ ជាអ្នកប្រដាល់ខ្លាំងជើងចាស់ដូចគ្នា ប៉ុន្តែពួកគេមិនធ្លាប់ប៉ះគ្នាទេកន្លងមក។
សម្រាប់ការជួបគ្នាលើកនេះ មិនដឹងថានរណា ជាអ្នកមានសំណាងបានឡើងទៅវគ្គពាក់កណ្ដាលផ្ដាច់ព្រ័ត្រនោះទេ? តែយ៉ាងណា គេមានជំនឿលើ ម៉ន សាម៉េត ច្រើនជាងយក្សផ្លែ។ ប៉ុន្តែ សាម៉េត ក៏មិនអាចធ្វេសប្រហែស ឬមើលស្រាលយក្សផ្លែបានដែរ ព្រោះយក្សផ្លែនេះ គេក៏វាយខ្លាំង និងល្អដែរ និយាយរួមពីរនាក់នេះ គឺត្រូវមានការប្រយ័ត្នរៀងៗខ្លួន។ យ៉ាងណា ការប្រកួតរវាងអ្នកប្រដាល់ទាំងពីរ ទោះជាអ្នកណាឈ្នះ ក៏ឈ្នះដោយវេទនាដែរ។ ចាំមើល រវាង យុគ យក្សផ្លែ និង ម៉ន សាម៉េត តើនរណាត្រូវដើរចេញពីការប្រកួតនេះ?។
សូមបញ្ជាក់ថា កាលពីជុំទី១ យុគ យក្សផ្លែ បានវាយឈ្នះ សេន កុសល អ្នកប្រដាល់ក្លិបមោងឬស្សីមរតកគុនខ្មែរដោយពិន្ទុ ហើយ ម៉ន សាម៉េត គេវាយឈ្នះសិស្សប្អូន រឿន សុខលី អ្នកប្រដាល់ ក្លិបការិយាល័យទី៥ កងទ័ពជើងគោក ដោយពិន្ទុដែរ៕
Source: Kampuchea Thmey Daily
0 Comments