រតនគិរី ៖ បន្ទាប់ពី សម្ដេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ប្រកាសថា នៅឆ្នាំ២០២០ រាជរដ្ឋាភិបាល នឹងបង្កើនថវិកាអភិវឌ្ឍន៍តាមឃុំ-សង្កាត់នានា រហូតដល់ជាង៧ម៉ឺនដុល្លារសហរដ្ឋអាមេរិក និងបន្តបន្ថែមថវិកាជាបន្តបន្ទាប់ រហូតដល់១១ម៉ឺនដុល្លារសហរដ្ឋអាមេរិក នៅឆ្នាំ២០២៣ ហើយនោះ លោក ទុន ពៅ ចៅសង្កាត់កាចាញ ក្រុងបានលុង ខេត្តរតនគិរី បានថ្លែងប្រាប់ឲ្យដឹងនៅថ្ងៃទី១៤កុម្ភៈថា គម្រោងរបស់រាជរដ្ឋាភិបាល ដែលគ្រោងនឹងទម្លាក់កញ្ចប់ថវិកាអភិវឌ្ឍន៍ឃុំ-សង្កាត់ខាងលើនេះ នឹងកាន់តែអាចឆ្លើយតបទៅនឹងតម្រូវការ ក៏ដូចជាការសំណូមរបស់ប្រជាពលរដ្ឋក្នុងមូលដ្ឋាន និងកាន់តែធ្វើឲ្យប្រសើរឡើងចំពោះការអភិវឌ្ឍ និងការផ្តល់សេវាជូនប្រជាពលរដ្ឋក្នុងមូលដ្ឋាន។
ទន្ទឹមនឹងនោះ ចៅសង្កាត់កាចាញរូបនេះ ក៏បានបង្ហាញការសាទរចំពោះរាជរដ្ឋាភិបាល ដែលប្រកាសថា នៅឆ្នាំ២០២០ នឹងបង្កើនថវិកាអភិវឌ្ឍន៍តាមឃុំ-សង្កាត់នានា រហូតដល់ជាង៧ម៉ឺន ៣ពាន់ដុល្លារសហរដ្ឋអាមេរិក ហើយដែលបច្ចុប្បន្ន ថវិកាអភិវឌ្ឍន៍ឃុំ-សង្កាត់ មានត្រឹមតែជាង៣ម៉ឺន ៥ពាន់ដុល្លារសហរដ្ឋអាមេរិកតែប៉ុណ្ណោះ។
លោក ទុន ពៅ ក៏បានប្ដេជ្ញាថា នឹងប្រើប្រាស់កញ្ចប់ថវិកាអភិវឌ្ឍន៍ឃុំ-សង្កាត់ ដែលរាជរដ្ឋាភិបាលទម្លាក់ឲ្យនោះ យកទៅអនុវត្តន៍ឲ្យចំគោលដៅ និងសមស្របទៅតាមអ្វីដែលជាការស្នើសុំ ឬក៏តម្រូវការរបស់ប្រជាពលរដ្ឋចង់បាន។
បន្ថែមពីនេះ លោក ទុន ពៅ ក៏បានបញ្ជាក់អំពីវិសាលភាពរបស់សង្កាត់ថា សង្កាត់កាចាញ គឺជាសង្កាត់មួយដែលមានភូមិចំនួន៤ ចំណុះស្ថិតនៅក្នុងក្រុងបានលុង ហើយមានផ្ទៃដីចំនួន៤.៥០០ ហិកតា ក្នុងនោះដែរ មានចំនួនប្រជាពលរដ្ឋរស់នៅសរុប១.៦៩៣គ្រួសារ ស្មើនឹងចំនួនប្រជាពលរដ្ឋ ៦.៨៧៥នាក់៕
Source: Kampuchea Thmey Daily
0 Comments