កំពង់ចាម ៖ មានការភ្ញាក់ផ្អើលមួយ បានកើតឡើង កាលពីថ្ងៃទី១៤ ខែកុម្ភៈ ឆ្នាំ២០១៩ វេលាម៉ោង១២និង០០នាទី នៅភូមិតាអុង ឃុំបឹងណាយ ស្រុកព្រៃឈរ ខេត្តកំពង់ចាម ដោយសារបុរសម្នាក់បានគំរាមសម្លាប់ និងដុតផ្ទះរបស់ខ្លួន។
ប៉ូលិសបានឲ្យដឹងថា ជនបង្កមានឈ្មោះ នួន ទីលុន ភេទប្រុស អាយុ៣៨ឆ្នាំ(មានជំងឺសរសៃប្រសាទ) រស់នៅភូមិតាអុក ឃុំបឹងណាយ ស្រុកព្រៃឈរ ខេត្តកំពង់ចាម បានដុតផ្ទះរបស់ខ្លួនមានទំហំ៧×៨ម៉ែត្រ ព្រមទាំងគំរាមកាប់សម្លាប់ប្រពន្ធកូនទៀតផង។
ប៉ូលិសបានបន្តថា នៅពេលនោះ ក្រុមគ្រួសារប្រពន្ធកូនបានផ្តិតមេដៃលើលិខិតសំណូមពរ សូមឲ្យសមត្ថកិច្ចជួយធ្វើអន្តរាគមន៍ចាប់ឃាត់ខ្លួនជនបង្កយកទៅផ្ដន្ទាទោសតាមច្បាប់ ក្នុងករណីអំពើហិង្សាក្នុងគ្រួសារ ដើម្បីធានាសុវត្ថិភាពរបស់ពួកគាត់។
ប៉ូលិសបានបន្តថា បន្ទាប់ពីបានទទួលសំណូមពរភ្លាម លោកវរសេនីយ៍ឯក កែវ ស៊ាងហ៊ាន់ អធិការនគរបាលស្រុកព្រៃឈរ បានដឹកនាំកម្លាំងនគរបាលអធិការដ្ឋាន និងប៉ុស្តិ៍រដ្ឋបាល ចុះជួយពន្លត់ភ្លើងបានទាន់ពេលវេលា។
ប៉ូលិសបានបន្តថា ចំណែក ឈ្មោះ នួន ទីលុន (ជាជនបង្ក) ដែលបានដុតផ្ទះនោះ ត្រូវកម្លាំងសមត្ថកិច្ចធ្វើការលួងលោម ចរចា តែមិនបានសម្រេច ដោយជនបង្កនៅក្នុងផ្ទះចាក់សោទ្វារពីខាងក្នុងនិងកាន់កាំបិតខ្វែវ, ពូថៅ ដាវ និងយកចម្ពាមកៅស៊ូបាញ់គ្រាប់ដែក មកលើសមត្ថកិច្ចបណ្ដាលឲ្យរងរបួស០៣នាក់ និងត្រូវប្រជាពលរដ្ឋរងរបួស០២នាក់ទៀត។
ប៉ូលិសបានបន្តថា រហូតដល់វេលាម៉ោង២១និង០៨នាទី ទើបសមត្ថកិច្ចបានការអនុញ្ញាតពីលោកព្រះរាជអាជ្ញា អមសាលាដំបូងខេត្តកំពង់ចាមសម្រេចគាស់ដំបូល និងរុះរើជញ្ជាំងសម្រុកឡើងលើដំបូលទៅបង្ក្រាបចាប់ឃាត់ខ្លួនបាន។
ប៉ូលិសបានបញ្ជាក់ថា បច្ចុប្បន្នជនសង្ស័យ ត្រូវបាននាំខ្លួនមកកាន់អធិការដ្ឋាននគរបាលស្រុកព្រៃឈរ ដើម្បីកសាងសំណុំរឿងចាត់ការតាមនីតិវិធី៕
Source: Kampuchea Thmey Daily
0 Comments