បាត់ដំបង ៖ សម្ភារៈមានតម្លៃមួយចំនួន ដែលជារបស់ទីចាត់ការសាលារៀន ត្រូវបានជនមិនស្គាល់មុខ ធ្វើសកម្មភាពគាស់សោទ្វារចូលប្រមូលយកគ្មានសល់ ដោយគ្មានបន្សល់នូវវត្ថុតាងអ្វីបន្តិចទាល់តែសោះ ហើយនេះក៏ជាករណី ស្ទើររាប់ភ្លេចទៅហើយ ក្នុងចំណោមករណីលួចនៅលើទឹកដីស្រុកថ្មគោល។
នៅថ្ងៃទី១៤ ខែកុម្ភៈ ឆ្នាំ២០១៩ វេលាម៉ោង៩និង៣០នាទីព្រឹក មានការឆោឡោមួយបានកើតឡើងនៅក្នុងបរិវេណសាលា បឋមសិក្សា គោកក្តួច ស្ថិតក្នុងស្រុកថ្មគោល ខេត្តបាត់ដំបង បន្ទាប់ពីលោកនាយកសាលា ឈ្មោះ ហង្ស ប៊ុនហៀង អាយុ៤៧ឆ្នាំ បានធ្វើដំណើរមកដល់ទីចាត់ការ ហើយបានឃើញសោទ្វារ មានស្នាមគាស់។
យោងតាមពាក្យបណ្ដឹងរបស់លោកនាយកបានបញ្ជាក់ថា ខណៈដែលលោក បានមកដល់បន្ទប់ទីចាត់ការ ឃើញទ្វារបន្ទប់របើកស្នាមគាស់សោ ទើបលោកបានចូលទៅមើលនៅខាងក្នុងបន្ទប់ គឺមានការបាត់បង់សម្ភារៈមួយចំនួនរួមមាន ៖ ហិបសង្គ្រោះចំនួន១ ទ្បេបថប ចំនួន៣គ្រឿង ( ម៉ាកសូនីពណ៌ខ្មៅ១ ម៉ាកHPពណ៌១ និង ម៉ាកMasterពណ៌ខ្មៅ១ ) ម៉ាស៊ីនព្រីនចំនួន១គ្រឿង ម៉ាកHPអំភ្លីចំនួន១គ្រឿង អំភ្លីបាស ចំនួន១គ្រឿង មីក្រូហ្វូន ចំនួន២ និង អេហ្វអឹមមីក្រូហ្វូនចំនួន១គ្រឿង សរុបជាទឹកប្រាក់ ចំនួន៥.៣៧០.០០០រៀល។
គួរបញ្ជាក់ថា កន្លងមកករណីគាស់ទម្លុះទម្លាយរបស់ជនមិនស្គាល់មុខ នៅលើទឹកដីស្រុកថ្មគោល ហាក់ដូចជាមិនរំខានដល់សមត្ថកិច្ច ពិសេសគឺ លោកអធិការ ផង់ សុភាព បន្តិចណាទាល់តែសោះ ដូច្នេះហើយបានជាករណីនេះចេះតែកើតមានឡើងជាហូរហែ ធ្វើឲ្យប្រជាពលរដ្ឋមានការព្រួយបារម្ភ ដែលបញ្ហានេះ គេមិនដឹងថា តើលោកអធិការកំពុងរវល់ការងារក្រៅ ឬក៏យ៉ាងណានោះទេ៕
Source: Kampuchea Thmey Daily
0 Comments