បើករថយន្តមិនត្រួតពិនិត្យ មុនពេលបើកបរ ចុះចំណោតសាងលេខ ច្រាលមកវិញ ជាន់ហ្វ្រាំងមិនស៊ី ក្រឡាប់ស្លាប់ និងរបួស

Cambodia News February 15, 2019

ពោធិ៍សាត់ ៖ ខ្វះការប្រុងប្រយ័ត្ន មិនត្រួតពិនិត្យរថយន្តមុនពេលបើកបរ បណ្ដាលឲ្យតៃកុងរថយន្តម្នាក់ស្លាប់កៀបជាប់រថយន្ត និងព្រូរងរបួសស្រាល ខណៈចុះចំណោតសាងលេខមិនចូល ហ្វ្រាំងជាន់មិនស៊ី ក្រឡាប់រថយន្ត។

ហេតុការណ៍នេះ បានកើតឡើងកាលពីវេលាម៉ោង៣និង១៥នាទី ថ្ងៃទី១៤ ខែកុម្ភៈ ឆ្នាំ២០១៩ ត្រង់ចំណុចបង្គោលគីឡូម៉ែត្រលេខ១៥១ ស្ថិតនៅលើផ្លូវជាតិលេខ៥៥ ក្នុងភូមិឯកភាព ឃុំថ្មដា ស្រុកវាលវែង ខេត្តពោធិ៍សាត់។

នគរបាលមូលដ្ឋានប៉ុស្តិ៍រដ្ឋបាលឃុំថ្មដាបានប្រាប់ថា ជនរងគ្រោះក្នុងឧប្បត្តិហេតុនេះ ទី១-ឈ្មោះ គឹម អៀង ភេទប្រុស អាយុ១៩ឆ្នាំ ជាអ្នកបើកបរ បានស្លាប់ភ្លាមៗនៅនឹងកន្លែង។ ទី២-ឈ្មោះ គឹម សុខ ភេទប្រុស អាយុ៤៩ឆ្នាំ ជាព្រូឡាន ត្រូវជាឪពុកបង្កើត រងរបួសស្រាល អ្នកទាំងពីរនាក់ មានទីលំនៅក្នុងភូមិព្រៃតូច ឃុំព្រៃតូច ស្រុកមោងឫស្សី ខេត្តបាត់ដំបង។

សមត្ថកិច្ចនគរបាលបន្តឲ្យដឹងថា មុនពេលកើតហេតុ គេបានឃើញរថយន្តម៉ាកហ៊ីយ៉ាន់ដាយមួយគ្រឿង ពណ៌បៃតង ពាក់ស្លាកលេខ ព្រះសីហនុ 3A 3083 បើកមកដល់ចំណុចកើតហេតុខាងលើ គឺអ្នកបើកបររថយន្តបានឡើងចំណោតផ្លូវ ដែលខ្ពស់ ដែលតំបន់នោះមានជួរភ្នំច្រើន ហើយផ្លូវបត់បែនទៀត។ លុះពេលកើតហេតុ ឡើងដល់ចំណោតហើយ ផ្លូវចុះវិញ រថយន្តចាប់ផ្ដើមបង្កើនល្បឿន អ្នកបើកបរនោះបានសាងលេខបន្ថយទប់ល្បឿន តែមិនអាចសាងលេខបាន ច្រាលមកវិញ ហើយជាន់ហ្វ្រាំងរថយន្តក៏វាមិនស៊ីទៀត ធ្វើឲ្យរថយន្តកាន់តែមានល្បឿនលឿន ក៏រេចង្កូតពេញផ្លូវ ហើយក្រឡាប់រថយន្ត បណ្ដាលឲ្យតៃកុងបើកបរកៀបជាប់នឹងចង្កូតរថយន្តស្លាប់ភ្លាមៗតែម្ដង ដោយឡែក ព្រូរថយន្តដែលអង្គុយក្បែរនោះ ត្រូវជាឪពុកតៃកុងបានព្យាយាមលូនចេញមកក្រៅតាមទ្វាររថយន្តគ្រាន់តែរបួសស្រាលប៉ុណ្ណោះ។

លោក ឈាន ឆោម អធិការរងនគរបាលសណ្ដាប់ធ្នាប់ស្រុកវាលវែងឲ្យដឹងថា ដោយសារតែខ្វះការប្រុងប្រយ័ត្ន មិនត្រួតពិនិត្យរថយន្តជាមុនសិន ទើបពេលបើកបរជួបឧបសគ្គ ក៏មានហេតុការណ៍អាក្រក់បែបនេះតែម្ដង។

សមត្ថកិច្ចយើង បានជួយអន្តរាគមន៍នៅកន្លែងកើតហេតុ ដោយយករថយន្តទៅជួយស្ទូចរថយន្តគ្រោះថ្នាក់នោះ ទៅរក្សាទុកបណ្ដោះអាសន្ននៅប៉ុស្តិ៍រដ្ឋបាលនគរបាលថ្មដា ចាំម្ចាស់រថយន្តនេះមកទៅវិញពេលក្រោយ៕