ភ្នំពេញ ៖ ជនសង្ស័យម្នាក់ ត្រូវបានប្រជាពលរដ្ឋនាំគ្នាព័ទ្ធចាប់វាយឡើងទ្រមខ្លួន ស្ទើរស្លាប់ ស្ទើររស់ បន្ទាប់ពីធ្វើសកម្មភាពលួចកាច់ សោ.ក ម៉ូតូគេបានសម្រេចទៅហើយ តែចៃដន្យឆ្កែព្រុស ដឹងដល់ម្ចាស់ចេញមកមើល ឃើញស្រែកចោរៗ ផ្អើលដល់ប្រជាពលរដ្ឋដេញចាប់បានភ្លាមៗ កាលពីវេលាម៉ោង១១និង២០នាទីព្រឹក ថ្ងៃទី១៥ ខែកុម្ភៈ ឆ្នាំ២០១៩ ស្ថិតនៅក្នុងភូមិត្រពាំងល្វា សង្កាត់កាកាប១ ខណ្ឌពោធិ៍សែនជ័យ។
ជនសង្ស័យ ឈ្មោះ យិន ដា ភេទប្រុស អាយុ២២ឆ្នាំ មុខរបរមិនពិតប្រាកដ យកផ្ទះសំណាក់៣ដុល្លារ ម្តុំភូមិត្រពាំងថ្លឹង សង្កាត់ចោមចៅ១ ធ្វើជាកន្លែងស្នាក់អាស្រ័យ មានស្រុកកំណើត ភូមិចាម ឃុំអ្នកលឿង ស្រុកពាមរក៍ ខេត្តព្រៃវែង។ ចំណែកនារីរងគ្រោះ ជាម្ចាស់ម៉ូតូ ឈ្មោះ បាន ធួន ភេទស្រី អាយុ២៨ឆ្នាំ មុខរបរកម្មកររោងចក្រ ស្នាក់នៅបន្ទប់ជួលជាន់ទី១ កន្លែងកើតហេតុ មានស្រុកកំណើត ភូមិប្រាសាទ ឃុំកំពែង ស្រុកគីរីវង់ ខេត្តតាកែវ។ ដោយឡែក ម៉ូតូដែលជនសង្ស័យលួចម៉ាក ស៊ុយសូគីនិច ពណ៌ស ស៊េរីឆ្នាំ២០១៨ ពាក់ស្លាកលេខ តាកែវ 1Q-4368។
តាមសម្ដីនារីរងគ្រោះ បានប្រាប់ឲ្យដឹងបែបជំនឿ មួយថា កាលពីយប់មិញនាងបានយល់សប្តិ « ឃើញម្តាយនាងមកប្រាប់ថា មានចោរលួចម៉ូតូ តែលួចមិនបានទេ មានគេប្រាប់ »។ ក្រោយពីសុបិនឃើញអាក្រក់បែបនេះ ធ្វើឲ្យនាងបង្កើនការប្រុងប្រយ័ត្ន លុះពេលដែលចេញពីធ្វើការរោងចក្រ ចតម៉ូតូទុកដាក់ចាក់សោ.ក រួចឡើងទៅបន្ទប់ជាន់ទីមួយហូបបាយ ស្រាប់តែនៅវេលាម៉ោងខាងលើ ឮសូរសំឡេងឆ្កែព្រុសប្លែក រួមផ្សំនឹងអារម្មណ៍នឹកឃើញពេលយល់សប្ដិផង ក៏ស្ទុះចេញមកអើតមើល ស្រាប់តែឃើញជនសង្ស័យ កាច់សោ.ក ម៉ូតូបាន ហើយ ឡើងជិះរៀបបើកចេញ ក៏ស្រែកឆោឡោ ផ្អើលអ្នកជិតខាងជួយចេញមកអន្តរាគមន៍ ព័ទ្ធចាប់បានស្វាគមន៍ដេកទ្រមខ្លួន រួចប្រគល់ជូនសមត្ថកិច្ច។
ជនសង្ស័យវិញបានឲ្យដឹងថា ខ្លួនពិតជាបានកាច់សោ.ក ម៉ូតូមួយគ្រឿងខាងលើពិតមែន រៀបនឹងជិះចេញហើយ សត្វឆ្កែមកព្រុស ផ្អើលម្ចាស់ស្រែក ពលរដ្ឋចាប់ខ្លួនតែម្តង។
ជនសង្ស័យ ត្រូវបានសមត្ថកិច្ចឃាត់ខ្លួន នាំទៅប៉ុស្តិ៍កាកាប១ ដើម្បីកសាងសំណុំរឿងបញ្ជូនទៅផ្នែកជំនាញអធិការដ្ឋានបន្តតាមនីតិវិធី៕
Source: Kampuchea Thmey Daily
0 Comments